ലോക്ക്ഡൗണ്‍ കാലം ആഘോഷമാക്കി കുട്ടികള്‍ക്കൊപ്പം സ്വിമ്മിങ് പൂളില്‍ ചിലവഴിക്കുന്ന ചിത്രം പങ്കുവെച്ചതാണ് കര്‍ണാടക മെഡിക്കല്‍ വിദ്യാഭ്യാസ വകുപ്പ് മന്ത്രി കെ. സുധാകര്‍. പക്ഷേ ആ ട്വീറ്റിലൂടെ പണി ഇരന്നു വാങ്ങുകയായിരുന്നു മന്ത്രി. സംസ്ഥാനത്തെ കോവിഡ് റെസ്പോണ്‍സ് ടീമിന്റെ ചാര്‍ജ് വഹിക്കുന്ന മന്ത്രി കെ. സുധാകര്‍ ഈ പ്രവര്‍ത്തിയുടെ വളരെ നിരുത്തരവാദിത്തപരമായാണ് പെരുമാറുന്നതെന്ന തരത്തിലാണ് അതിനുതാഴെ കമന്റുകള്‍ പ്രത്യക്തപ്പെട്ടത്. മാത്രമല്ല വിമര്‍ശനവുമായി കോണ്‍ഗ്രസ് അധ്യക്ഷന്‍ ഡി.കെ. ശിവകുമാറും രംഗത്തെത്തി. സംസ്ഥാനത്തെ കോവിഡ് റെസ്പോണ്‍സ് ടീമിന്റെ ചാര്‍ജ് വഹിക്കുന്ന മന്ത്രി കെ. സുധാകര്‍ ഇത്രയും നിരുത്തരവാദിത്തപരമായി പെരുമാറരുത് എന്ന് ശിവകുമാറും വിമര്‍ശിച്ചു.

കര്‍ണാടകയില്‍ കോവിഡ് പ്രതിരോധ പ്രവര്‍ത്തനങ്ങള്‍ക്ക് മേല്‍നോട്ടം വഹിക്കുന്ന മന്ത്രിയായ സുധാകര്‍ ഞായാറാഴ്ചയാണ് മക്കള്‍ക്കൊപ്പം പൂളില്‍ ചെലവഴിക്കുന്ന ചിത്രം ട്വിറ്ററില്‍ പോസ്റ്റ് ചെയ്തത്. എന്നാല്‍ പോസ്റ്റിനു വിമര്‍ശനങ്ങള്‍ വന്നതോടെ ചിത്രം ഡിലീറ്റ് ചെയ്തത്. ഇതിനെതിരെയാണ് വലിയരീതിയിലുള്ള വിമര്‍ശനം ഉയര്‍ന്നതും അതും ഉയര്‍ത്തിക്കൊണ്ട് ഡി.കെ. ശിവകുമാര്‍ രംഗത്തെത്തിയതും.

ലോകത്ത് എല്ലാവരും വലിയ ആരോഗ്യപ്രതിസന്ധിയിലൂടെ കടന്നുപോവുമ്പോള്‍  കോവിഡ് ചാര്‍ജുള്ള മന്ത്രി സ്വിമ്മിങ് പൂളില്‍ സമയം ചെലവഴിച്ചുകൊണ്ട് നിരുത്തരവാദിത്തപരമായി പെരുമാറുകയാണ്. ഇത് ധാര്‍മികതയെ ബാധിക്കുന്ന വിഷയമാണ്. മന്ത്രിസഭയില്‍ നിന്നും സുധാകര്‍ രാജിവെക്കണമെന്നും മുഖ്യമന്ത്രി അദ്ദേഹത്തെ സഭയില്‍ നിന്നും പുറത്താക്കണമെന്നും  ശിവകുമാര്‍ ട്വിറ്ററിലൂടെ ആവശ്യപ്പെട്ടു.

കഴിഞ്ഞ വര്‍ഷം കര്‍ണാടകയില്‍ നടന്ന രാഷ്ട്രീയ അട്ടിമറിയില്‍ കോണ്‍ഗ്രസ് വിട്ട് ബിജെപിയില്‍ ചേര്‍ന്ന എംഎല്‍എമാരില്‍ ഒരാളാണ് കെ. സുധാകര്‍. കര്‍ണാടകയില്‍ 17 പേര്‍ക്കു കൂടി രോഗം സ്ഥിരീകരിച്ചതോടെ കോവിഡ് ബാധിതരുടെ എണ്ണം 232 ആയി. കലബുറഗിയില്‍ രോഗം സ്ഥിരീകരിച്ച 3 പേരില്‍ 2 വയസ്സുകാരനും. വാഡി സ്വദേശിയായ കുട്ടിയെ കടുത്ത ശ്വാസതടസ്സത്തെ തുടര്‍ന്ന് കലബുറഗി ജില്ലാ ആശുപത്രിയില്‍ പ്രവേശിപ്പിച്ചു. ഇന്തൊനീഷ്യയില്‍ നിന്നു മാര്‍ച്ച് 21ന് മടങ്ങിയെത്തിയ ബെംഗളൂരു സ്വദേശിക്ക് ഉള്‍പ്പെടെ ബിബിഎംപി പരിധിയില്‍ ഇന്നലെ മാത്രം 3 പേര്‍ക്ക് രോഗം സ്ഥിരീകരിച്ചു. വിജയപുര-6, ബെളഗാവി-4 എന്നിങ്ങനെയാണു മറ്റു പുതിയ രോഗികള്‍. വിജയപുരയില്‍ നിന്നുള്ള ഒരാള്‍ ഒഴിച്ച് മറ്റ് 5 രോഗികളുടെയും രോഗസമ്പര്‍ക്കം തിരിച്ചറിഞ്ഞിട്ടില്ല. ഇതില്‍, 13, 12, 10 വയസ്സുള്ള കുട്ടികളും ഉള്‍പ്പെടുന്നു. ബെംഗളൂരു നഗരത്തില്‍ രോഗികളുടെ എണ്ണം 76 ആയി. ഇതില്‍ 23 സുഖപ്പെട്ടതും ചെയ്തതും ഒരാള്‍ മരിച്ചതും ഒഴികെ വിവിധ ആശുപത്രികളില്‍ ചികിത്സയിലുള്ളത് 52 പേര്‍.

മൈസൂരു നഞ്ചന്‍ഗുഡ് ജൂബിലന്റ് ലൈഫ് സയന്‍സ് ഫാര്‍മ കമ്പനിയുമായി ബന്ധപ്പെട്ട് ഒരാള്‍ക്കുകൂടി സ്ഥിരീകരിച്ചതോടെ ഇവിടെ നിന്നുള്ള കോവിഡ് ബാധിതര്‍ 37 ആയി ഉയര്‍ന്നു. മൈസൂരു ജില്ലയില്‍ ആകെ 48 കേസുകളാണുള്ളത്. കമ്പനി ജീവനക്കാരനുമായി സമ്പര്‍ക്കം പുലര്‍ത്തിയ യുവാവിനാണ് (32) ഏറ്റവുമൊടുവില്‍ കോവിഡ് സ്ഥിരീകരിച്ചത്.

കഴിഞ്ഞ ഫെബ്രുവരിയില്‍ ഈ ഫാര്‍മ സന്ദര്‍ശിച്ച ജപ്പാന്‍, ഓസ്‌ട്രേലിയ എന്നിവിടങ്ങളില്‍ നിന്നുള്ളവരെ ചുറ്റിപ്പറ്റിയാണ് അന്വേഷണം പുരോഗമിക്കുന്നത്. യാത്രാ നിരോധനം നടപ്പിലാക്കും മുന്‍പായിരുന്നു സന്ദര്‍ശനം. സിസിടിവി ദൃശ്യങ്ങളും കമ്പനി റജിസ്റ്ററും പരിശോധിച്ചാണ് വിശദാംശങ്ങളെടുക്കുന്നത്. രോഗം സ്ഥിരീകരിച്ച ജീവനക്കാര്‍ക്കോ ഇവരുമായി സമ്പര്‍ക്കം പുലര്‍ത്തിയവര്‍ക്കോ വിദേശയാത്ര ചരിത്രമില്ല. മാര്‍ച്ച് 26ന് ഇവിടെ ആദ്യമായി കോവിഡ് സ്ഥിരീകരിച്ചത്.

കമ്പനി മാനേജ്‌മെന്റ് ഇതേവരെ അന്വേഷണവുമായി സഹകരിക്കാത്തതിനെ തുടര്‍ന്ന് നോട്ടിസ് നല്‍കിയിട്ടുണ്ടെന്ന് മൈസൂരു എസ്പി സി.ബി.റിഷ്യന്ത് പറഞ്ഞു. ഫാര്‍മയില്‍ മരുന്നു നിര്‍മാണത്തിനായി ചൈനയില്‍ നിന്നിറക്കുമതി ചെയ്ത അസംസ്‌കൃത വസ്തുക്കള്‍ പുണെ ഇന്‍സ്റ്റിറ്റ്യൂട്ട് ഓഫ് വൈറോളജിയില്‍ പരിശോധനയ്ക്ക് അയച്ചിട്ടുണ്ട്. ചെന്നൈ വഴിയാണ് ഫെബ്രുവരിയില്‍ ഇവയെത്തിച്ചത്.

നിരീക്ഷണത്തില്‍ 19658 പേര്‍

വീടുകളിലും പൊതു ക്വാറന്റീനുകളിലും നിരീക്ഷണത്തിലുള്ളവര്‍- 19658.ആശുപത്രികളില്‍ നിരീക്ഷണത്തിലുള്ളവര്‍ - 614. ഇന്നലെ മാത്രം പ്രവേശിപ്പിച്ചത് - 131. ബെംഗളൂരുവില്‍ മാത്രം 11. 9251 രക്തസാംപിള്‍ പരിശോധിച്ചതില്‍ 8831 നെഗറ്റീവ്. ബാക്കി ഫലം വരാനുണ്ട്. ബിബിഎംപി പരിധിയിലുള്ള പനി ക്ലിനിക്കുകളില്‍ ഇതേവരെ പരിശോധിച്ചത്  3131.  പരാതിയെ തുടര്‍ന്ന് 7 പേരെ വീടുകളില്‍ നിര്‍ബന്ധിത നിരീക്ഷണത്തിലാക്കി.