അനധികൃത സ്വത്ത് സമ്പാദന കേസില്‍ ജയലളിതക്കെതിരെ കര്‍ണാടക ഹൈക്കോടതി തിങ്കളാഴ്ച്ച വിധി പറയാനിരിക്കെ അവര്‍ക്കു വേണ്ടി പ്രത്യേക പൂജകളും വഴിപാടുകളും നടത്തുന്ന തിരക്കിലാണ് എ.ഐ.എ.ഡി.എം.കെ പ്രവര്‍ത്തകര്‍.
അമ്മയ്ക്ക് അനുകൂലമായ വിധി പ്രതീക്ഷിച്ച് സംസ്ഥാനത്ത് വിവിധ ഇടങ്ങളില്‍ പാല്‍ക്കുടങ്ങളേന്തിയും മണ്‍വിളക്കുകളേന്തിയും വനിതാ പ്രവര്‍ത്തകര്‍ പ്രദക്ഷിണം നടത്തി. തിരുവാരൂരില്‍ ആറായിരം വനിതാ പ്രവര്‍ത്തകര്‍ തലയില്‍ പാല്‍ക്കുടങ്ങളേന്തി നഗരത്തില്‍ പ്രദക്ഷിണം നടത്തുകയും ത്യാഗരാജ ക്ഷേത്രത്തില്‍ പ്രത്യേക പ്രാര്‍ത്ഥനകള്‍ നടത്തുകയും ചെയ്തു. പുതുക്കോട്ടൈ ജില്ലയില്‍ ആരോഗ്യ മന്ത്രിയായ വിജയ ഭാസ്‌കര്‍ 1,008 വിളക്കു പൂജ അമ്മയുടെ മോചനത്തിനായി ക്ഷേത്രങ്ങളില്‍ നേര്‍ന്നു. പളനി ക്ഷേത്രത്തില്‍ ഒരു ഭക്തന്‍ 1006 തീര്‍ത്ഥക്കുടങ്ങള്‍ നേര്‍ന്നു. തിരുവള്ളൂര്‍ ജില്ലയിലെ പ്രശസ്തമായ വീരരാഘവസ്വാമി ക്ഷേത്രം ഉള്‍പ്പെടെ ഒമ്പത് വൈഷ്ണവ ക്ഷേത്രങ്ങളില്‍ പ്രത്യേക പൂജകള്‍ നടത്താനുള്ള സജ്ജീകരണങ്ങള്‍ ഒരുക്കിയിരുന്നു. കാരൂരിലെ ശ്രീ കല്യാനാന പശുപതീശ്വര ക്ഷേത്രത്തില്‍ പ്രവര്‍ത്തകര്‍ ഒരുലക്ഷത്തി എട്ട് വിളക്കുകള്‍ തെളിച്ച് അമ്മ എന്നെഴുതി. ഇവിടെ മഹായജ്ഞ ഹോമവും നടന്നു.
മധുരൈ മീനാക്ഷി ക്ഷേത്രത്തില്‍ പ്രവര്‍ത്തകര്‍ അമ്മയ്ക്കായി 1008 നാളികേരം ഉടച്ചു. ക്ഷേത്രങ്ങളില്‍ ശത്രുസംഹാര പൂജയ്ക്കായിരുന്നു തിരക്കേറെയും. വിവിധ ക്ഷേത്രങ്ങളില്‍ ഞായറാഴ്ച അന്നദാനവും നടന്നു. കോയന്പത്തൂരില്‍ എ.ഐ.എ.ഡി.എം.കെ പ്രവര്‍ത്തകര്‍ ഗജപൂജ നടത്തി. പരിസ്ഥിതി വകുപ്പ് മന്ത്രിയായ എന്‍.ഡി വെങ്കടാചലം ഈരോഡ് വച്ച് മഹാസുദര്‍ശന ഹോമവും അന്നദാനവും അമ്മക്ക് വേണ്ടി നടത്തി.
അതേസമയം, കോടതി വിധി വരുന്നത് കണക്കിലെടുത്ത് കര്‍ണാടക തമിഴ്‌നാട് അതിര്‍ത്തിയില്‍, പ്രത്യേകിച്ച് ഹോസുര്‍ മേഖലയില്‍, പൊലീസ് കനത്ത ജാഗ്രത പുലര്‍ത്തുന്നുണ്ടെന്ന് സേലം പൊലീസ് അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha