ഐഎന്എസ് വിക്രമാദിത്യയില് നിന്നു പരിശീലന പറക്കല് നടത്തുന്നതിനിടെ അറബിക്കടലില് വീണ മിഗ് പൈലറ്റിനായി തിരച്ചില് തുടരുന്നു
മിഗ് 29 കെ യുദ്ധവിമാനത്തിലെ പൈലറ്റ് ലഫ്. കമാന്ഡര് നിഷാന്ത് സിങ്ങിനായി തിരച്ചില് തുടരുകയാണെന്നു നാവികസേനാ വൃത്തങ്ങള് പറഞ്ഞു. വിമാനവാഹിനിക്കപ്പലായ ഐഎന്എസ് വിക്രമാദിത്യയില് നിന്നു പരിശീലന പറക്കല് നടത്തുന്നതിനിടെ നിയന്ത്രണംവിട്ട് അറബിക്കടലില് വീഴുകയായിരുന്നു.
2 പൈലറ്റുമാരില് ഒരാളെ രക്ഷിച്ചു. നിരീക്ഷണ വിമാനങ്ങളും ഹെലികോപ്റ്ററുകളും കപ്പലുകളുമാണ് തിരച്ചില് തുടരുന്നത്.
കഴിഞ്ഞ മേയില് വിവാഹത്തിന് അനുമതി തേടി കമാന്ഡിങ് ഓഫിസര്ക്ക് അയച്ച നര്മം നിറഞ്ഞ കത്ത് നിഷാന്ത് സിങ് അപകടത്തില്പെട്ട വിവരം പുറത്തുവന്നതിനു പിന്നാലെ സമൂഹമാധ്യമങ്ങളില് പ്രചരിച്ചു. 'ബുള്ളറ്റിനിരയാകാനുള്ള അനുമതി' എന്നാണു തലക്കെട്ട്. കാമുകിയായിരുന്ന നയാബ് റണ്ധാവയ്ക്കൊപ്പം ചെലവഴിച്ച പ്രണയനാളുകളെ സേനയുടെ സാങ്കേതിക പദങ്ങളിലാണ് നിഷാന്ത് ഉപമിച്ചിരിക്കുന്നത്.
'മാതാപിതാക്കള് സൂം മീറ്റിങ്ങിലൂടെ വിവാഹം നടത്താന് അനുമതി നല്കിയിരിക്കുന്നു. അതിനാല് ആത്മഹത്യാപരമായ ഈ തീരുമാനത്തിനു താങ്കളുടെ അനുമതി തേടുന്നു. ആ അപകടത്തിനു സാക്ഷിയാവാനും ദമ്പതികളെ അനുശോചനം അറിയിക്കാനും താങ്കളെ ക്ഷണിക്കുന്നു' എന്നെഴുതിയാണ് കത്ത് അവസാനിപ്പിച്ചത്.
https://www.facebook.com/Malayalivartha
