കര്ഷകരുടെ സമരം തീര്ക്കാന് അമിത് ഷാ മുന്നോട്ടു വച്ച ഉപാധികള് പ്രതിഷേധക്കാര് തള്ളി; കര്ഷകരുടെ പ്രതിഷേധത്തെ രാഷ്ട്രീയ പ്രേരിതമെന്ന് ഒരിക്കലും വിളിച്ചിട്ടില്ലെന്ന് അമിത് ഷാ
കര്ഷകരുടെ സമരം തീര്ക്കാന് ആഭ്യന്തര മന്ത്രി അമിത് ഷാ തന്നെ നേരിട്ട് ഇടപെട്ടെങ്കിലും, ഷാ മുന്നോട്ടു വച്ച ഉപാധികള് പ്രതിഷേധക്കാര് തള്ളിയിരുന്നു. കേന്ദ്രസര്ക്കാര് പ്രതിഷേധം അടിച്ചമര്ത്താന് ശ്രമിച്ചാല് കൂടുതല് കര്ഷകര് പ്രതിഷേധത്തില് പങ്കുചേരുമെന്ന് കര്ഷക സംഘടനകള് അറിയിച്ചു. അതേസമയം കര്ഷകരുടെ പ്രതിഷേധത്തെ രാഷ്ട്രീയ പ്രേരിതമെന്ന് ഒരിക്കലും വിളിച്ചിട്ടില്ലെന്ന് അമിത് ഷാ. ഗ്രേറ്റര് ഹൈദരാബാദ് തെരഞ്ഞെടുപ്പ് പ്രചാരണ പരിപാടിയില് സംസാരിക്കുകയായിരുന്നു ഷാ. 'കര്ഷകരുടെ പ്രതിഷേധത്തെ രാഷ്ട്രീയ പ്രേരിതമെന്ന് ഞാന് ഒരിക്കലും വിളിച്ചിട്ടില്ല, തത്കാലം അങ്ങനെ വിളിക്കുന്നില്ല. ഒരു ജനാധിപത്യത്തില്, എല്ലാവര്ക്കും ഒരേ കാര്യത്തെക്കുറിച്ച് വ്യത്യസ്ത കാഴ്ചപ്പാടുകള് ഉണ്ടായിരിക്കാനുള്ള അവകാശമുണ്ട്. മൂന്ന് നിയമങ്ങളും കര്ഷകര്ക്ക് പ്രയോജനകരമാണ്' ഷാ പറഞ്ഞു.
കര്ഷകര് ബുറാഡിയിലെ സമരവേദിയിലേക്കു മാറാനായിരുന്നു സര്ക്കാറിന്റെ നിര്ദേശം. എന്നാല്, വേദി മാറില്ലെന്നും ഉപാധിവച്ചുള്ള ചര്ച്ചയ്ക്ക് താല്പര്യമില്ലെന്നും ചര്ച്ച വേണമെങ്കില് സമരവേദിയിലേക്കു വരണമെന്നും കര്ഷക സംഘടനകള് അറിയിക്കുകയായിരുന്നു.
പ്രധാനമായും പഞ്ചാബില്നിന്നുള്ള കര്ഷകരാണ് സിന്ഖു ദേശീയ പാത ഉപരോധിച്ച് സമരം ചെയ്യുന്നത്. സമരവേദി മാറ്റില്ലെന്ന് ആദ്യം തന്നെ കര്ഷകര് വ്യക്തമാക്കിയിരുന്നു. ഓള് ഇന്ത്യ കിസാന് സംഘര്ഷ് കമ്മിറ്റിയുമായും മറ്റു സംഘടനകളുടെ അഭിപ്രായവും ആരാഞ്ഞതിനു പിന്നാലെയാണ് അന്തിമതീരുമാനത്തിലേക്ക് എത്തിച്ചേര്ന്നിരിക്കുന്നത്. ഡല്ഹിയിലും പരിസരപ്രദേശങ്ങളിലുമായി തമ്ബടിച്ചിരിക്കുകയാണ് ആയിരക്കണക്കിന് വരുന്ന കര്ഷകര്. കര്ഷക നിയമങ്ങള് പിന്വലിക്കണമെന്ന ആവശ്യത്തില്നിന്ന് ഒരിഞ്ചു പിന്നോട്ടില്ലെന്നാണ് കര്ഷകരുടെ നിലപാട്. കൂടുതല് കര്ഷകര് പ്രതിഷേധത്തില് പങ്കെടുക്കാന് എത്തുന്നതോടെ ഡല്ഹി ഹരിയാന അതിര്ത്തിയില് സുരക്ഷ ശക്തമാക്കി. കൂടുതല് സുരക്ഷ സേനയെ അതിര്ത്തിയിലെ സിന്ഖുവില് വിന്യസിച്ചു.
https://www.facebook.com/Malayalivartha
