ഛത്തീസ്ഗഡില് മാവോയിസ്റ്റ് ആക്രമണത്തില് സിആര്പിഎഫിന്റെ 'കോബ്ര' കമാന്ഡോ യൂണിറ്റിലെ ഭടനു വീരമൃത്യു
മാവോയിസ്റ്റുകള് ഛത്തീസ്ഗഡിലെ സുക്മ ജില്ലയില് നടത്തിയ സ്ഫോടനത്തില് സിആര്പിഎഫിന്റെ മാവോയിസ്റ്റ് വിരുദ്ധ വിഭാഗമായ 'കോബ്ര' കമാന്ഡോ യൂണിറ്റിലെ അസിസ്റ്റന്റ് കമന്ഡാന്റ് നിതിന് ഭാലെറാവുവിനു വീരമൃത്യു. ചിന്താല്നര് വനപ്രദേശത്ത് ശനിയാഴ്ച രാത്രി ഉണ്ടായ സ്ഫോടനത്തില് 9 കമാന്ഡോകള്ക്കും പരുക്കേറ്റിട്ടുണ്ട്. മഹാരാഷ്ട്രയിലെ നാസിക് സ്വദേശിയായ നിതിന് (33) ഇന്നലെ പുലര്ച്ചെയാണ് മരിച്ചത്.
കോബ്ര കമാന്ഡോ വിഭാഗത്തിലെ ഏറ്റവും മിടുക്കരില് ഒരാളായിരുന്നു അസിസ്റ്റന്റ് കമന്ഡാന്റ് നിതിന് ഭാലെറാവുവെന്നു സിആര്പിഎഫിലെ ഉദ്യോഗസ്ഥന് പറഞ്ഞു. നിതിന് വീരമൃത്യു വരിക്കുന്നതിന് ഏതാനും മണിക്കൂറുകള്ക്കു മുന്പ്, ബാച്ച്മേറ്റായ സൃഹൃത്തിനയച്ചതു പോരാട്ടവീര്യം ജ്വലിക്കുന്ന സന്ദേശം ആയിരുന്നു. മാവോയിസ്റ്റ് വിരുദ്ധ നടപടിക്കു തയാറെടുക്കുന്ന മറ്റൊരു കോബ്ര യൂണിറ്റ് അംഗമായ സുഹൃത്തിനു ശനിയാഴ്ച ഉച്ചയ്ക്ക് വാട്സാപ്പില് അയച്ച സന്ദേശങ്ങളിലൊന്നില് നിതിന് കുറിച്ചത്, 'ഓള് ദ് ബെസ്റ്റ്... കില് ദ് ബീസ്റ്റ്' എന്നായിരുന്നു.
നിതിന്റെ കുട്ടിക്കാലത്തു തന്നെ അച്ഛന് മരിച്ചിരുന്നു. അമ്മയും ഭാര്യയും 6 വയസ്സുള്ള മകളും ഉള്പ്പെട്ടതാണു കുടുംബം. ഡിസംബര് 21-ന് 34-ാം ജന്മദിനം ആഘോഷിക്കാനിരിക്കയായിരുന്നു.
ഡല്ഹിയില് പാര്ലമെന്റ് മന്ദിരത്തിന്റെ സംരക്ഷണച്ചുമതലയുള്ള സ്പെഷല് ഡ്യൂട്ടി സംഘത്തിന്റെ ഭാഗമായി സേവനമനുഷ്ഠിച്ച ശേഷം കോബ്ര സേനയില് ചേരാന് കഴിഞ്ഞ വര്ഷം സ്വയം മുന്നോട്ടു വരികയായിരുന്നു.
https://www.facebook.com/Malayalivartha