കര്ഷകര് ഉപാധി തള്ളി, കര്ഷക സംഘടനകള് നാളെ മുതല് സമരം സംസ്ഥാനങ്ങളിലേക്ക് വ്യാപിപ്പിക്കുന്നു
കര്ഷക സംഘടനകള് ഡല്ഹിയുടെ അതിര്ത്തികളില് കുത്തിയിരിപ്പു സമരം ശക്തമാക്കി. ചര്ച്ചയ്ക്കു തയാറാണെങ്കിലും അതിന് ഉപാധികള് പറ്റില്ലെന്ന് അസന്ദിഗ്ധമായി പ്രഖ്യാപിച്ച ഓള് ഇന്ത്യ കിസാന് സംഘര്ഷ് കോ ഓര്ഡിനേഷന് കമ്മിറ്റി നാളെ മുതല് സമരം സംസ്ഥാനങ്ങളിലേക്കു കൂടി വ്യാപിപ്പിക്കാനും തീരുമാനിച്ചു.
സമരം ഡല്ഹി നഗരത്തിലേക്ക് മാറ്റാനുള്ള നീക്കം തല്ക്കാലം നിര്ത്തിവച്ചിരിക്കുകയാണ്. എല്ലാ കര്ഷക സംഘടനകളോടും ഡല്ഹിയിലേക്കെത്താനും സമരത്തില് പങ്കെടുക്കാനും സമിതി ആഹ്വാനം ചെയ്തു.
സമരം ബുറാഡിയെ നിരങ്കാരി മൈതാനത്തേക്കു മാറ്റിയാല് ചര്ച്ചയ്ക്കു തയാറാണെന്ന കേന്ദ്ര ആഭ്യന്തര മന്ത്രി അമിത് ഷായുടെ വാഗ്ദാനം കര്ഷകര് തള്ളി. പുതിയ 3 കര്ഷക നിയമങ്ങളും ഉപാധികളില്ലാതെ പിന്വലിക്കാമെങ്കില് മാത്രം ചര്ച്ച എന്നാണ് കര്ഷകരുടെ നിലപാട്. കര്ഷക നിയമങ്ങളുടെ ഗുണങ്ങളെക്കുറിച്ചു വിശദീകരിക്കാനുളള ചര്ച്ച വേണ്ടെന്ന് കര്ഷകര് വ്യക്തമാക്കി.
സമരം രാഷ്ട്രീയപ്രേരിതമാണെന്നു താന് പറഞ്ഞിട്ടില്ലെന്ന് അമിത് ഷാ ഹൈദരാബാദില് വിശദീകരിച്ചു. ഇന്നലെ രാവിലെ യോഗം ചേര്ന്ന ശേഷമാണ് നഗരാതിര്ത്തിയില് തുടരാന് കര്ഷകര് തീരുമാനിച്ചത്. എന്നാല് ബുറാഡി മൈതാനത്തേക്കു മാറിയാല് വിജ്ഞാന് ഭവനില് ഉന്നതതല മന്ത്രി സംഘം ചര്ച്ചയ്ക്കു തയാറാണെന്ന നിലപാട് ആവര്ത്തിക്കുകയാണ് കേന്ദ്രസര്ക്കാര് ചെയ്തത്.
തലസ്ഥാനത്തേക്കുള്ള 6 അതിര്ത്തികളിലേക്കും കര്ഷകരെത്തുന്നുണ്ട്. ഇവര്ക്കെതിരെ ഹരിയാന പൊലീസും ഡല്ഹി പൊലീസും ഒട്ടേറെ കേസുകളും റജിസ്റ്റര് ചെയ്തിട്ടുണ്ട്. ഇതുവരെ 12,000 എഫ്ഐആറുകള് റജിസ്റ്റര് ചെയ്തതായി എഐസിസി ജനറല് സെക്രട്ടറി രണ്ദീപ് സിങ് സുര്ജേവാല ആരോപിച്ചു.
https://www.facebook.com/Malayalivartha