'കര്‍ഷകര്‍ക്ക് പിന്തുണ അറിയിച്ച് ഗ്രേറ്റ് കലി'; വിവാദ കര്‍ഷക നിയമത്തിനെതിരായ കര്‍ഷക പ്രതിഷേധത്തിന് പിന്തുണയുമായി റെസ്‍ലിങ് താരം
വിവാദ കര്‍ഷക നിയമത്തിനെതിരായ കര്‍ഷക പ്രതിഷേധത്തിന് പിന്തുണയുമായി മുന്‍ ഡബ്ല്യു.ഡബ്ല്യു.ഇ ചാമ്ബ്യന്‍ ഗ്രേറ്റ് കലി. കര്‍ഷകര്‍ക്ക് പിന്തുണ അറിയിച്ച റെസ്‍ലിങ് താരം, പ്രതിഷേധക്കാര്‍ക്കൊപ്പമുള്ള ദൃശ്യങ്ങളും സമൂഹ മാധ്യമങ്ങളിലൂടെ പങ്കുവെച്ചു.
വിവാദ നിയമത്തിനെതിരായ പ്രക്ഷോഭത്തിന് പിന്തുണ അറിയിച്ച ദലീപ് സിങ് റാണ എന്ന ഗ്രേറ്റ് കലി, പ്രതിഷേധം നടക്കുന്ന അതിര്‍ത്തി പ്രദേശമായ തിക്രിയില്‍ നിന്നുള്ള ദൃശ്യങ്ങളും സോഷ്യല്‍ മീഡിയയിലൂടെ പങ്കുവെച്ചു. 'ജയ് ജവാന്‍, ജയ് കിസാന്‍' എന്ന തലക്കെട്ടോടെയായിരുന്നു കലി വീഡിയോ ദൃശ്യങ്ങള്‍ പോസ്റ്റ് ചെയ്തത്. കര്‍ഷക പ്രതിഷേധത്തിന് രാജ്യത്തിന്റെ വിവിധ ഭാഗങ്ങളിലുള്ള ജനങ്ങള്‍ പിന്തുണ വേണമെന്നും അദ്ദേഹം അറിയിച്ചു. അതിനിടെ, ഡല്‍ഹിയുടെ വിവിധ അതിര്‍ത്തി പ്രദേശങ്ങളി‍ല്‍ നടക്കുന്ന കര്‍ഷക സമരം തുടര്‍ച്ചയായ ആറാം ദിവസം പിന്നിട്ടു.
നേരത്തെ, കര്‍ഷക സമരത്തിന് പിന്തുണ അറിയിച്ച് പത്മ - അര്‍ജുന ജേതാക്കളായ നിരവധി കായിക താരങ്ങള്‍ രംഗത്തെത്തിയിരുന്നു. സമരം അടിച്ചമര്‍ത്തുന്നതില്‍ പ്രതിഷേധിച്ച്‌ പുരസ്കാരങ്ങള്‍ തിരിച്ചു നല്‍കുമെന്ന് ചിലര്‍ ഭീഷണിയും മുഴക്കിയിരുന്നു. പത്മശ്രീ, അര്‍ജുന ജേതാവായ റെസ്‍ലര്‍ കര്‍തര്‍ സിങ്, അര്‍ജുന ജേതാക്കളായ ബാസ്ക്കറ്റ് ബോള്‍ താരം സജ്ജന്‍ സിങ് ചീമ, ഹോക്കി താരം രാജ്‍ബീര്‍ കൗര്‍ എന്നവരാണ് പുരസ്കാരങ്ങള്‍ തിരിച്ചേല്‍പ്പിക്കുമെന്ന് പ്രഖ്യാപിച്ച്‌ രംഗത്തെത്തിയ പ്രമുഖര്‍.
അതിനിടെ, പ്രക്ഷോഭം രാജ്യവ്യാപകമാക്കാന്‍ കര്‍ഷക സംഘടനകള്‍ ആഹ്വാനം ചെയ്തു. കേന്ദ്ര കൃഷിമന്ത്രിയുമായി കഴിഞ്ഞ ദിവസം നടത്തിയ ചര്‍ച്ച പരാജയപ്പെട്ട പശ്ചാത്തലത്തില്‍ ഡിസംബര്‍ അഞ്ചിന് ദേശവ്യാപക പ്രക്ഷോഭ ദിനം ആചരിക്കാനും തീരുമാനമായിട്ടുണ്ട്. കര്‍ഷകര്‍ക്ക് പിന്തുണയുമായി ചരക്ക് വാഹന സംഘടനയും രംഗത്തെത്തി. സമരം അവസാനിപ്പിക്കാന്‍ സര്‍ക്കാര്‍ അടിയന്തരമായി ഇടപെട്ടില്ലെങ്കില്‍ ആദ്യം ഉത്തരേന്ത്യയിലും പിന്നീട് രാജ്യവ്യാപകമായും ചരക്ക് ഗതാഗതം സ്തംഭിപ്പിക്കുമെന്ന് ആള്‍ ഇന്ത്യ മോട്ടോര്‍ ട്രാന്‍സ്പോര്‍ട്ട് കോണ്‍ഗ്രസ് അറിയിച്ചു.
https://www.facebook.com/Malayalivartha
