ബി.ജെ.പിയോട് മുട്ടാന് രാഹുലിന് സാധിക്കില്ല; രൂക്ഷമിര്ശനവുമായി ശരദ് പവാര്; രാഹുല് സ്വന്തം പാര്ട്ടിയില് നിന്നുപോലും എതിര്പ്പ് നേരിടുന്നു; ശരദ് പവാറിന്റെ പ്രതികരണത്തില് ഞെട്ടിത്തരിച്ച് കോണ്ഗ്രസ് നേതൃത്വം
ബി.ജെ.പി വിരുദ്ധചേരിയെ ഒരുമിപ്പിക്കാന് രാഹുല് ഗാന്ധിക്ക് സാധിക്കില്ലെന്ന് തുറന്നടിച്ച് എന്.സി.പി അധ്യക്ഷന് ശരദ് പവാര്. രാഹുല് ഗാന്ധിയുടെ നേതൃപാടവത്തില് സ്ഥിരത ഇല്ലെന്ന രൂക്ഷമായ വിമര്ശനവും അദ്ദേഹം നടത്തി. മറാത്തി ദിനപത്രമായ ലോക്മത് സംഘടിപ്പിച്ച പരിപാടിയില് സംസാരിക്കുകയായിരുന്നു അദ്ദേഹം. രാഹുലിനെ നേതാവായി രാജ്യം സ്വീകരിക്കുമോ എന്ന ചോദ്യത്തിനുള്ള മറുപടിയായാണ് ശരദ് പവാറിന്റെ മറുപടി.
മഹാരാഷ്ട്രയുടെ മാതൃകയില് ബി.ജെ.പി വിരുദ്ധ ചേരിയെ ഒരുമിപ്പിക്കാന് രാഹുല് ഗാന്ധിക്ക് സാധിക്കുന്നില്ല. നേതാവ് എന്ന രീതിയില് രാഹുല് ഗാന്ധിക്ക് സ്ഥിരത ഇല്ലാത്തതാണ് കാരണം. കോണ്ഗ്രസിലെ മുതിര്ന്ന പരിചയ സമ്പന്നരായ നേതാക്കള്ക്ക് പോലും രാഹുല് ഗാന്ധിയുടെ പ്രവര്ത്തന രീതിയില് എതിര്പ്പുണ്ട്. സ്വന്തം പാര്ട്ടിയില് എതിര്പ്പ് ഉയരുമ്പോള് രാഹുലിന് മറ്റ് പാര്ട്ടികളുടെ കൂട്ടായ്മയുടെ നേതൃപദവി വഹിക്കാന് സാധിക്കില്ലെന്നും പവാര് വിമര്ശിച്ചു. രാഹുല് ഗാന്ധി കോണ്ഗ്രസിന്റെ വളര്ച്ചയ്ക്ക് ഏതെങ്കിലും തരത്തിലുള്ള പ്രതിബന്ധമാണോ എന്ന ചോദ്യത്തിന് ' ഏത് പാര്ട്ടിയുടേയും നേതൃത്വം എന്നത് അവര്ക്ക് ആ പാര്ട്ടിക്കുള്ളില് ലഭിക്കുന്ന സ്വീകാര്യതയെ അടിസ്ഥാനപ്പെടുത്തിയാവുമെന്നായിരുന്നു മറുപടി.
രാഹുലിനെക്കുറിച്ച് മുന് യുഎസ് പ്രസിഡന്റ് ബരാക് ഒബാമ ഉന്നയിച്ച വിമര്ശനങ്ങളെക്കുറിച്ചും പവാര് പ്രതികരിച്ചു. ഒരു വിഷയത്തിലും താല്പര്യമില്ലാത്തയാളാണ് രാഹുല് എന്നായിരുന്നു ഒബാമ രാഹുലിനെക്കുറിച്ച് എ പ്രോമിസ്ഡ് ലാന്ഡ് എന്ന പുസ്തകത്തില് പരാമര്ശിച്ചത്. 'എല്ലാവരുടേയും അഭിപ്രായത്തെ വിലക്കെടുക്കേണ്ട ആവശ്യമില്ല, എല്ലാവരും ഒരു പരിധി സൂക്ഷിക്കേണ്ടതുണ്ട്. എന്നാല് ഒബാമ ആ പരിധി വിട്ടുവെന്നാണ് തനിക്ക് തോന്നുന്നത്' പവാര് പറഞ്ഞു.
മഹാരാഷ്ട്രയിലെ മഹാ വികാസ് അഖാഡി സഖ്യം അധികാരത്തില് ഒരു വര്ഷം തികയ്ക്കുന്ന പശ്ചാത്തലത്തില് ആഘോഷപരിപാടികള് സംഘടിപ്പിക്കാനാണ് കോണ്ഗ്രസ്, എന്.സി.പി, ശിവസേന പാര്ട്ടികളുടെ തീരുമാനം. ഇതിനിടെയാണ് രാഹുല് ഗാന്ധിയുടെ നേതൃത്വപാടവത്തെ കുറിച്ച് പവാര് സംശയം പ്രകടിപ്പിച്ച് രംഗത്തെത്തിയത്. ലോക്സഭാ തിരഞ്ഞെടുപ്പിലും വിവിധ സംസ്ഥാനങ്ങളിലെ നിയമസഭാ തിരഞ്ഞെടുപ്പുകളിലും കോണ്ഗ്രസ് കനത്ത പരാജയം നേരിട്ടതിനു പിന്നാലെ കോണ്ഗ്രസ് നേതൃത്വത്തിനെതിരെ പര്ട്ടിക്കുള്ളില് തന്നെ വിമര്ശനമുയര്ന്നിരുന്നു.
അതേസമയം പവാറിന്റെ ആക്ഷേപങ്ങളോട് പ്രതികരിച്ച് കോണ്ഗ്രസ് വക്താവ് സച്ചിന് സാവന്ത് രംഗത്തെത്തി. 'ഏത് സാഹചര്യത്തിലാണ് ശരത് പവാര് ഇത്തരം വിമര്ശനമുയര്ത്തിയതെന്ന് വ്യക്തമല്ല, എന്നിരുന്നാലും ബിജെപിക്കും ആര്എസ്എസിനുമെതിരെ പ്രതിപക്ഷനിരയില് ഏറ്റവും സ്ഥിരതയോടെ നിലകൊള്ളുന്ന നേതാവാണ് രാഹുല്' എന്നായിരുന്നു സച്ചിന് സാവന്തിന്റെ പ്രതികരണം. ഭരണഘടനാസ്ഥാപനങ്ങള് പോലും വിശ്വാസ്യത നഷ്ടപ്പെട്ട് നിസ്സഹായരായി നിലകൊള്ളുന്ന സാഹചര്യത്തില് രാജ്യത്തെ നിലവിലെ അവസ്ഥയിലും ഏറ്റവും ധീരമായ അഭിപ്രായങ്ങള് പറയുന്നയാളാണ് രാഹുല് എന്നും സച്ചിന് സാവന്ത് പറഞ്ഞു.
എന്നാല് എന്.സി.പിയുടെ വിമര്ശനം രാഷ്ട്രീയ ആയുധമാക്കാനുള്ള ഒരുക്കത്തിലാണ് ബി.ജെ.പി. അധികാരത്തിനായി പഠിച്ച പണി പതിനെട്ടും നോക്കിട്ടും മഹാരാഷ്ട്രയില് അധികാരത്തില് വരാന് ബി.ജെ.പിക്ക് സാധിച്ചിരുന്നില്ല. ഇതിനിടെ ഉദവ്താക്കറുടെ സര്ക്കാര് ഒരു വര്ഷം പൂര്ത്തിയാക്കുകയും ചെയ്തു. ഈ ക്ഷീണം മറികടക്കാന് സഖ്യത്തിനുള്ളിലെ പടലപിണക്കം തുറന്നുകാട്ടാന് ബി.ജെ.പി ശ്രമിക്കുമെന്ന കാര്യത്തില് സംശയമില്ല.
https://www.facebook.com/Malayalivartha
