കോവിഡ്​ രാജ്യത്ത്​ മഹാദുരന്തം വിതച്ച് കൊണ്ടിരിക്കുകയാണ്. വളരെയധികം പ്രതിസന്ധി ഘട്ടത്തിലൂടെയാണ് നാം കടന്നു പോയിക്കൊണ്ടിരിക്കുന്നത്. എന്നാൽ ഈ ഘട്ടത്തിൽ പ്രതീക്ഷ കൈവിടരുതെന്നും ഈ പ്രതിസന്ധിയെയും നാം അതിജീവിക്കുമെന്നും പ്രാര്‍ഥിച്ച്‌​ കോണ്‍ഗ്രസ്​ നേതാവ്​ പ്രിയങ്ക ഗാന്ധി രംഗത്ത് വന്നിരിക്കുകയാണ്.

ഭരണകൂടം ജനങ്ങള്‍ക്കു വേണ്ടത്​ ചെയ്​തു കൊടുക്കുന്നതില്‍ ദയനീയ പരാജയമാവുകയും ഉത്തരവാദിത്വത്തില്‍നിന്ന്​ ഒഴിഞ്ഞുമാറുകയും​ ചെയ്​തിട്ടുണ്ടെങ്കിലും നാം അതിജീവിക്കുക ത​ന്നെ ചെയ്യുമെന്ന്​ സമൂഹ മാധ്യമത്തില്‍ പങ്കുവെച്ച സ​ന്ദേശത്തില്‍ അവര്‍ പറയുന്നു.

പ്രിയങ്കയുടെ വാക്കുകള്‍ ഇങ്ങനെ; 'ഹൃദയം തകര്‍ന്നാണിത്​ കുറിക്കുന്നത്​. കഴിഞ്ഞ ആഴ്​ചകളില്‍ പലര്‍ക്കും ഉറ്റവരെ നഷ്​ടമായി. അതിലേറെ പേര്‍ ജീവനുവേണ്ടി പൊരുതുന്നു​. എന്തു സംഭവിക്കുമെന്നറിയാതെ കുറെയാളുകള്‍ വീടുകളില്‍ രോഗവുമായി മല്ലിടുന്നു.

ഈ ഭീകരത തലക്കുമുകളില്‍ വന്നു പതിക്കാതെ ഒരാള്‍ പോലുമുണ്ടാകില്ല നമ്മളില്‍. രാജ്യത്തുടനീളം ജനം ഇറ്റു ശ്വാസത്തിനായി പാടുപെടുന്നു. ആതുര ശുശ്രൂഷക്കും ജീവന്‍ രക്ഷിക്കാന്‍ ഒരു ഡോസ്​ മരുന്നിനും വേണ്ടി പ്രയാസപ്പെടുന്നു.

ഇതുപോലൊരു പ്രതിസന്ധി ഘട്ടത്തില്‍ ഭരണകൂടം ഉത്തരവാദിത്വ നിര്‍വഹണത്തില്‍നിന്നും നേതൃത്വത്തില്‍നിന്നും ഇങ്ങനെ ഒഴിഞ്ഞുമാറി നില്‍ക്കുമെന്ന്​ എതിരാളികള്‍ പോലും കരുതിയിട്ടുണ്ടാകില്ല.

ഇനിയെങ്കിലും അവര്‍ മനുഷ്യ ജീവന്‍ രക്ഷിക്കാന്‍ വേണ്ടത്​ ചെയ്യുമെന്ന്​ നമുക്ക്​ പ്രത്യാശിക്കാം.അങ്ങനെയൊക്കെയാണെങ്കിലും മനുഷ്യര്‍ പരസ്​പരം സഹായവുമായി എത്തി വെല്ലുവിളി ഏറ്റെടുത്തു .

' മുമ്പും വലിയ വേദനയും പ്രയാസങ്ങളും ​ നാട്​ കണ്ടതാണ്​. ചുഴിലക്കാറ്റുകളും പട്ടിണിയും വലിയ ഭൂചലനങ്ങളും വെള്ളപ്പൊക്കങ്ങളും നാം അതിജീവിച്ചു. ദുരിത പര്‍വങ്ങളില്‍ നിങ്ങളെയും എന്നെയും പോലുള്ള സാധാരണക്കാര്‍ മുന്നോട്ടു​വന്നിട്ടുണ്ട്​. മനുഷ്യത്വം ഒരിക്കലും നമുക്കു മുമ്പില്‍ പരാജയപ്പെട്ടിട്ടില്ലെന്നും അവർ വ്യക്തമാക്കി.

ഓരോ ഗ്രാമത്തിലും ജില്ലയിലും പട്ടണത്തിലും പിന്നെ മറ്റിടങ്ങളിലും നിരവധി സംഘടനകളും വ്യക്തികളും ദുരന്തമുഖത്ത്​ സഹായ ഹസ്​തവുമായി എത്തുന്നുണ്ട്​. ഈ അടിസ്​ഥാന നന്മ ഇപ്പോഴും​ നിലനില്‍ക്കുന്നുണ്ട് .

പരിധികളില്‍ തളക്കാനാകാത്ത ധീരതയോടെ ഈ നിസ്സഹായ​തയോടും ഭീതിയോടും പൊരുതി നില്‍ക്കുകയെന്ന വെല്ലുവിളിയാണ്​ നമുക്കു മുന്നില്‍. ഈ പോരാട്ടത്തില്‍ ജാതിയും ജാതിയും വര്‍ഗവും മറ്റു വിവേചനങ്ങളും മറന്ന്​ നാം ഒന്നാകണം, വൈറസ്​ അവയെ വേര്‍തിരിച്ചുകാണാറില്ല''.

നമ്മെ ഇന്ത്യക്കാരാക്കുന്ന സഹാനുഭൂതിയും തിരിച്ചുവരാനുള്ള പക്വതയും നാം പരസ്​പരം കാണിക്കണം. ജീവിതം വഴിമുട്ടിയ ഈ പ്രത്രിസന്ധിയില്‍ ഓരോരുത്തര്‍ക്കും ബാക്കിയുള്ളവനാണ്​ ഏറ്റവും വലിയ കരുത്ത്​. ചുറ്റും കനംതൂങ്ങി നില്‍ക്കുന്ന ഇരുട്ട്​ മാറ്റി ഒരുനാള്‍ നാം വെളിച്ചത്തിലേക്ക്​ വരുമെന്നാണ് പ്രിയങ്ക ഗാന്ധി പറയുന്നത്.