സമുദ്രോല്‍പ്പന്ന കയറ്റുമതിയില്‍ ഇക്കഴിഞ്ഞ സാമ്പത്തിക വര്‍ഷം ഇന്ത്യക്ക് സര്‍വ്വകാല റെക്കോര്‍ഡ്. 33,441 കോടി രൂപയുടെ വരുമാനം സമുദ്രോല്‍പ്പന്ന കയറ്റുമതിയിലൂടെ ഇന്ത്യ നേടി. ഇതിലൂടെ 551.112 കോടി അമേരിക്കന്‍ ഡോളറിന്റെ വിദേശ നാണ്യവും രാജ്യം കരസ്ഥമാക്കി. ശീതികരിച്ച ചെമ്മീന്‍ ആണ് കയറ്റുമതിയിലെ പ്രധാന ഇനം.

2014-15 സാമ്പത്തിക വര്‍ഷം 10,51243 മെട്രിക് ടണ്‍ സമുദ്രോല്‍പ്പന്നങ്ങള്‍ ആണ് ഇന്ത്യ കയറ്റി അയച്ചത്. മുന്‍ വര്‍ഷത്തെക്കാള്‍ 10.69 ശതമാനത്തിന്റെ വര്‍ദ്ധനവാണ് വരുമാനത്തില്‍ രേഖപ്പെടുത്തിയത്.

കയറ്റി അയച്ചതില്‍ 34.01 ശതമാനവും ചെമ്മീന്‍ ആണെന്ന് സമുദ്രോല്‍പ്പന്ന കയറ്റുമതി വികസന അതോറിറ്റി അധികൃതര്‍ അറിയിച്ചു. 3,57,505 മെട്രിക് ടണ്‍ ചെമ്മീന്‍ കഴിഞ്ഞ വര്‍ഷം ഇന്ത്യയില്‍ നിന്നും കയറ്റി അയച്ചു. അമേരിക്കയും യൂറോപ്യന്‍ യൂണിയനുമാണ് സമുദ്രോല്‍പ്പന്നങ്ങളുടെ പ്രധാന ഉപഭോക്താക്കള്‍.

മൂല്യ വര്‍ദ്ധിത ഉല്‍പ്പന്നങ്ങളുടെ കയറ്റുമതിയിലും വളര്‍ച്ച ഉണ്ടായി. ഉണക്കമത്സ്യ കയറ്റുമതിയില്‍ 3.89 ശതമാനം ആണ് വര്‍ദ്ധനവ് രേഖപ്പെടുത്തിയത്. വിശാഖ പട്ടണം, ഗുജറാത്തിലെ പിപവാവ്, കൊച്ചി, കൊല്‍ക്കത്ത, തൂത്തുക്കുടി, കൃഷ്ണപട്ടണം, മംഗലാപുരം തുടങ്ങിയ തുറമുഖങ്ങള്‍ വഴിയാണ് കൂടുതല്‍ കയറ്റുമതി നടന്നിരിക്കുന്നത്. ഈ സാമ്പത്തിക വര്‍ഷം 6.6 ബില്ല്യണ്‍ അമേരിക്കന്‍ ഡോളറിന്റെ കയറ്റുമതി ഇന്ത്യ ലക്ഷ്യമിടുന്നെന്നും അതോറിറ്റി അധികൃതര്‍ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha