ഭക്തി ദുരന്തത്തിന് വഴിമാറിയപ്പോള്‍ ചുറ്റും ശവങ്ങള്‍ മാത്രം. മരിച്ചവരില്‍ ഭൂരിപക്ഷം പേരും സ്ത്രീകള്‍. നദികളെ ആരാധിക്കുന്ന ഗോദാവരി പുഷ്‌കരലു മേളയ്ക്കിടെ തിക്കിലും തിരക്കിലും പെട്ട് 27 പേര്‍ മരിച്ചു. മരണസംഖ്യ ഉയരാന്‍ ഇടയുണ്ടെന്നാണു സൂചന.
ആന്ധ്രാപ്രദേശില്‍ 144 വര്‍ഷത്തിലൊരിക്കല്‍ നടക്കുന്ന മഹാപുഷ്‌കരം ചടങ്ങിനിടെയാണ് അപകടം. മേളയ്ക്കായി കനത്ത സുരക്ഷയാണ് ഒരുക്കിയിരുന്നത്. നദികളെ ആരാധിക്കുന്ന ഈ ഉത്സവത്തിന്റെ ചെറുരൂപമായ പുഷ്‌കരലു മേള 12 വര്‍ഷത്തിലൊരിക്കല്‍ നടക്കാറുണ്ട്.
സ്‌നാനം ചെയ്യുന്നതിനായി തീര്‍ത്ഥാടകര്‍ കൂട്ടമായി ഗോദാവരി നദി തീരത്തെ പ്രവേശന കവാടത്തിലേക്ക് വന്നപ്പോഴാണ് അപകടമുണ്ടായത്. ഗോദാവരിയെ പൂജിക്കുന്ന ചടങ്ങിനിടെ കൊട്ടഗുമ്മം പുഷ്‌കര്‍ കവാടത്തിലാണ് അപകടമുണ്ടായത്.
ആന്ധ്രാ മുഖ്യമന്ത്രി ചന്ദ്രബാബു നായിഡുവും തെലങ്കാനാ മുഖ്യമന്ത്രി ചന്ദ്രശേഖര റാവുവും രാവിലെ തന്നെ ഇവിടെയെത്തി ആചാരത്തിന്റെ ഭാഗമായി ഗോദാവരിയില്‍ മുങ്ങിക്കുളിച്ചിരുന്നു. തിക്കും തിരക്കും കണക്കിലെടുത്ത് കൂടുതല്‍ സുരക്ഷാ സന്നാഹങ്ങള്‍ ഒരുക്കിയിരുന്നതായി ചന്ദ്രബാബു നായിഡു വ്യക്തമാക്കിയിരുന്നു.
12 ദിവസം നീണ്ടു നില്‍ക്കുന്ന ഉത്സവത്തില്‍ ഒരു കോടിയോളം തീര്‍ത്ഥാടകരാണ് പങ്കെടുക്കുന്നത്. ദക്ഷിണേന്ത്യയിലെ കുംഭമേളയായാണ് ഈ ഉത്സവത്തെ വിശേഷിപ്പിക്കുന്നത്. ഗോദാവരിയില്‍ ഈ ദിവസങ്ങളില്‍ മുങ്ങിക്കുളിക്കുന്നത് ഗംഗയിലെ സ്‌നാനത്തിനു സമാനമായാണു വിശ്വാസികള്‍ കരുതുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha