ജമ്മു കശ്മീരിലെ ഉധംപൂരില്‍ ഭീകരനെ പിടികൂടിയ ഗ്രാമീണര്‍ക്ക് പുരസ്‌കാരം നല്‍കുമെന്ന് കേന്ദ്ര ആഭ്യന്തര മന്ത്രി രാജ്‌നാഥ് സിങ്ങ് പറഞ്ഞു. ഭീകരാക്രമണത്തില്‍ കൊല്ലപ്പെട്ട ബിഎസ്എഫ് ജവാന്‍മാരെ ആദരിക്കുമെന്നും അദ്ദേഹം രാജ്യസഭയെ അറിയിച്ചു. ജമ്മു കശ്മീരിലെ സമാധാന അന്തരീക്ഷം തകര്‍ക്കാനുള്ള പാക്കിസ്ഥാന്റെ ശ്രമം അപലപനീയമാണെന്നും രാജ്‌നാഥ് സിങ് വ്യക്തമാക്കി. അതിര്‍ത്തികടന്നുള്ള ഭീകരവാദത്തെ ശക്തമായി എതിര്‍ക്കുമെന്നും അദ്ദേഹം പറഞ്ഞു.

ജമ്മു-ശ്രീനഗര്‍ ദേശീയപാതയില്‍ ഉധംപൂരില്‍ ഇന്നലെ പുലര്‍ച്ചെയാണ് ഭീകരാക്രമണമുണ്ടായത്. ഏറ്റുമുട്ടലില്‍ രണ്ടു ബിഎസ്എഫ് ജവാന്‍മാര്‍ കൊല്ലപ്പെട്ടു. പുലര്‍ച്ചെ സമറോളി എന്ന സ്ഥലത്തു ഗ്രനേഡ് എറിഞ്ഞശേഷം ഭീകരര്‍ വെടിയുതിര്‍ക്കുകയായിരുന്നു. 11 പേര്‍ക്കു പരുക്കേറ്റു. ഹരിയാനാ സ്വദേശി റോക്കി, ബംഗാള്‍ സ്വദേശി ശുഭേന്ദു റോയ് എന്നീ സൈനികരാണു ഭീകരാക്രമണത്തില്‍ കൊല്ലപ്പെട്ടത്. രണ്ടു ഭീകരരില്‍ ഒരാളെ വധിക്കുകയും മുഹമ്മദ് നവീദ് എന്ന ഇരുപതുകാരനെ പിടികൂടുകയും ചെയ്തു. ആക്രമണത്തിനു ശേഷം രക്ഷപ്പെട്ട നവീദ് ഒരു സ്‌കൂള്‍ കെട്ടിടത്തില്‍ കയറി അഞ്ചുപേരെ ബന്ദികളാക്കി വച്ചു. തുടര്‍ന്നു അവര്‍ക്കു നേരെ തോക്കുചൂണ്ടി രക്ഷപ്പെടാനുള്ള വഴി കാണിച്ചുകൊടുക്കാന്‍ ആവശ്യപ്പെട്ടു. ഇതിനിടെ ബന്ദികളായ വിക്രംജിത്, രാകേഷ് എന്നിവര്‍ കാണിച്ച ധീരതയാണ് ഇയാളെ കുടുക്കിയത്. രാകേഷ് അയാളെ പിടിച്ചുവയ്ക്കുകയും വിക്രംജിത് തോക്കു തട്ടിമാറ്റുകയും ചെയ്തു.

ബലപ്രയോഗത്തിനിടെ അയാള്‍ വെടിവച്ചെങ്കിലും ആര്‍ക്കും ജീവാപായമുണ്ടായില്ല. ഇതിനിടെ പ്രദേശം വളഞ്ഞിരുന്ന പൊലീസും സൈന്യവും സ്ഥലത്തെത്തി ഇയാളെ കൊണ്ടുപോയി. ആക്രമണത്തില്‍ കൊല്ലപ്പെട്ട ബിഎസ്എഫ് ജവാന്‍മാരുടെ മൃതശരീരം ഔദ്യോഗിക ചടങ്ങുകള്‍ക്ക്‌ശേഷം നാട്ടിലേക്ക് അയച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha