കരള്‍രോഗത്തെത്തുടര്‍ന്നു ചികിത്സയിലാണെന്ന അഭ്യൂഹങ്ങള്‍ക്കിടെ തമിഴ്‌നാട് മുഖ്യമന്ത്രി ജയലളിത വീണ്ടും പൊതുവേദിയില്‍. തമിഴ്‌നാട്ടില്‍ സന്ദര്‍ശനത്തിനെത്തിയ പ്രധാനമന്ത്രി നരേന്ദ്ര മോദിയെ ജയലളിത ചെന്നൈ വിമാനതാവളത്തിലെത്തി സ്വീകരിച്ചു. പ്രഥമ ദേശീയ കൈത്തറിദിനം ഉദ്ഘാടനം ചെയ്യാനെത്തിയ മോദിക്കു കൈത്തറി നെയ്ത ഷാള്‍ നല്കിയാണു തലൈവി സ്വീകരിച്ചത്.
പോയസ് ഗാര്‍ഡനിലെ ജയലളിതയുടെ വസതിയില്‍ ഇരുവരും നടത്തിയ കൂടിക്കാഴ്ച രാഷ്ട്രീയ വൃത്തങ്ങളില്‍ ചര്‍ച്ചയായി. പ്രധാനമന്ത്രിയായി അധികാരമേറ്റ ശേഷമുള്ള മോദിയുടെ ആദ്യ ചെന്നൈ സന്ദര്‍ശനമാണിത്. 45 മിനിറ്റോളം മോദി ജയയുടെ വസതിയില്‍ ചെലവഴിച്ചു. കഴിഞ്ഞ ജൂണില്‍ ദേശീയ തെരഞ്ഞെടുപ്പ് പ്രചാരണ പരിപാടിക്കായാണ് അദ്ദേഹം അവസാനമായി നഗരത്തിലെത്തിയത്. അന്ന് ജയലളിതയെ സന്ദര്‍ശിക്കാതെ മോദി പോയത് സൂപ്പര്‍താരം രജനീകാന്തിനെ കാണാനായിരുന്നു.
പ്രസന്നവതിയായി കാണപ്പെട്ട ജയലളിത വിമാനത്താവളത്തില്‍ വെച്ച് മോദിയുമായി പതിനഞ്ചുമിനിറ്റോളം സംസാരിച്ചു. ഗവര്‍ണര്‍ കെ. റോസയ്യയും ചെന്നൈ വിമാനത്താവളത്തിലെത്തിയിരുന്നു. എന്നാല്‍ മദ്രാസ് യൂണിവേഴ്‌സിറ്റി ക്യാംപസില്‍ നടന്ന ദേശീയ കൈത്തറി ദിനാഘോഷത്തില്‍ ജയലളിത പങ്കെടുത്തില്ല. നേരത്തേ മുന്‍ രാഷ്ട്രപതി എ.പി.ജെ. അബ്ദുള്‍ കലാമിന്റെ സംസ്‌കാര ചടങ്ങുകള്‍ക്കും രാമേശ്വരത്ത് ജയലളിത എത്തിയിരുന്നില്ല.

2016ല്‍ നിയമസഭാ തെരഞ്ഞെടുപ്പ് നടക്കാനിരിക്കെ തമിഴ്‌നാട്ടില്‍ ബി.ജെ.പിയുടെ സ്വാധീനം വ്യാപിപ്പിക്കാന്‍ ജയലളിതയോട് അടുക്കുന്നുവെന്ന അഭ്യൂഹവും ശക്തമാണ്. രാജ്യസഭയില്‍ ബി.ജെ.പി ന്യൂനപക്ഷമായതിനാല്‍ വിവിധ ബില്ലുകള്‍ പാസാക്കുന്നതിന് അണ്ണാ ഡി.എം.കെ അടക്കമുള്ള ചെറുപാര്‍ട്ടികളുടെ പിന്തുണ നിര്‍ണായകമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha