ഇഎസ്‌ഐ സേവന പരിധി വര്‍ധിപ്പിക്കാന്‍ തീരുമാനം. ഇതിന്റെ ഭാഗമായി നിര്‍മാണ തൊഴിലാളികള്‍, ഓട്ടോറിക്ഷ ഡ്രൈവര്‍മാര്‍, അങ്കണവാടി ജീവനക്കാര്‍, ആശ ആരോഗ്യ പദ്ധതി പ്രവര്‍ത്തകര്‍, സൈക്കിള്‍ റിക്ഷ തൊഴിലാളികള്‍, വിദ്യാലയങ്ങളിലെ ഉച്ചഭക്ഷണ പദ്ധതി തൊഴിലാളികള്‍ തുടങ്ങിയ വിഭാഗങ്ങളെ ഇഎസ്‌ഐ സേവന പരിധിയില്‍ ഉള്‍പ്പെടുത്താന്‍ ഇഎസ്‌ഐ കോര്‍പറേഷന്‍ തീരുമാനിച്ചു. കേന്ദ്ര തൊഴില്‍ സഹമന്ത്രി ബണ്ഡാരു ദത്താത്രേയയുടെ അധ്യക്ഷതയില്‍ വെള്ളിയാഴ്ച്ച ചേര്‍ന്ന ഇഎസ്‌ഐ കോര്‍പറേഷന്‍ ബോര്‍ഡ് യോഗത്തിലാണ് സുപ്രധാനമായ തീരുമാനമുണ്ടായത്.
അസംഘടിത മേഖലയിലെ തൊഴിലാളികളെ കൂടി ഉള്‍പ്പെടുത്തിയുള്ള ഇഎസ്‌ഐ പ്രത്യേക പാക്കേജ് തയ്യാറാക്കുന്നതിനു സമിതി രൂപീകരിക്കുമെന്നു കേന്ദ്രമന്ത്രി യോഗത്തില്‍ അറിയിച്ചു.
അതേസമയം, ഇ.എസ്.ഐ.യില്‍ അംഗമാകുന്നതിനുള്ള തൊഴിലാളിയുടെ ശമ്പളപരിധി 15,000 രൂപയില്‍നിന്ന് 25,000 രൂപയായി ഉയര്‍ത്തണമെന്ന മുന്‍തീരുമാനം കേന്ദ്രസര്‍ക്കാര്‍ അംഗീകരിച്ച് വിജ്ഞാപനം പുറപ്പെടുവിക്കാത്തതില്‍ ശക്തമായ പ്രതിഷേധവും യോഗത്തിലുയര്‍ന്നു. എന്നാല്‍ ഇതുസംബന്ധിച്ച് മന്ത്രി ഉറപ്പുനല്‍കിയില്ല. ഇ.എസ്.ഐയുടെ പരിധി വ്യാപിപ്പിക്കണമെന്ന് കഴിഞ്ഞമാസം ചേര്‍ന്ന ഇന്ത്യന്‍ ലേബര്‍ കോണ്‍ഫറന്‍സ് തീരുമാനിച്ചിരുന്നു. അതിനു തുടര്‍ച്ചയായിട്ടാണ് തൊഴില്‍മന്ത്രി ഭണ്ഡാരു ദത്താത്രേയയുടെ അധ്യക്ഷതയില്‍ വെള്ളിയാഴ്ച യോഗം ചേര്‍ന്നത്.

നിലവില്‍ ഇഎസ്‌ഐ പദ്ധതിയിലുള്ള അംഗങ്ങളില്‍ നിന്ന് ശമ്പളത്തിന്റെ 1.75 ശതമാനവും തൊഴിലുടമയില്‍ നിന്ന് 4.75 ശതമാനവുമടക്കം ആകെ ശമ്പളത്തിന്റെ 6.5% തുകയാണു വിഹിതമായി കോര്‍പറേഷനിലേക്ക് അടയ്ക്കുന്നത്. അസംഘടിത മേഖലയിലെ തൊഴിലാളികളുടെ വിഹിതമുള്‍പ്പെടെ സമിതി തീരുമാനിക്കും. ഇഎസ്‌ഐ പദ്ധതിയില്‍ രാജ്യത്താകെ രണ്ടു കോടി അംഗങ്ങളടക്കം എട്ടു കോടിയോളം ഗുണഭോക്താക്കളാണുള്ളത്. പദ്ധതി വിപുലീകരിക്കുന്നതോടെ അംഗങ്ങളുടെയും ഗുണഭോക്താക്കളുടെയും എണ്ണം ഇരട്ടിയിലധികമാകുമെന്നാണു കണക്ക്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha