ഈ വര്ഷവും വര്ക്ക് ഫ്രം ഹോം തുടരുമോ ? ഗര്ഭിണികളെയും ഭിന്നശേഷിക്കാരെയും ഓഫിസില് വരുന്നതില് നിന്ന് ഒഴിവാക്കി; ഐടി കമ്പനികള് പറയുന്നത് ഇങ്ങനെ
കൊവിഡും ഒമിക്രോണുമെല്ലാം വീണ്ടും വ്യാപിച്ചതോടെ മൂന്നാം തരംഗത്തിന്റെ ആശങ്കയിലാണ് രാജ്യമിപ്പോള്. മാത്രമല്ല രാജ്യത്തിപ്പോള് ഓരോ ദിവസവും കൊവിഡ് കേസുകളുടെ എണ്ണം കൂടിക്കൊണ്ടിരിക്കുകയും ചെയ്യുകയാണ്.
ഡല്ഹി, മഹാരാഷ്ട്ര, പശ്ചിമബംഗാള്, തമിഴ്നാട് എന്നിവയുള്പ്പെടെ നിരവധി സംസ്ഥാനങ്ങള് വീണ്ടും നിയന്ത്രണങ്ങള് ഏര്പ്പെടുത്തിയതോടെ രാജ്യം വീണ്ടും സ്തംഭിക്കുന്ന സ്ഥിതിയിലേക്ക് കാര്യങ്ങള് നീങ്ങുകയാണ്. രോഗവ്യാപനം കണക്കിലെടുത്ത് കേന്ദ്രം സംസ്ഥാനങ്ങളോട് ജാഗ്രത പാലിക്കാനും സാമൂഹിക അകലം പാലിക്കാനും മാസ്ക് ധരിക്കാനും വാക്സിന് എടുക്കാനുമൊക്കെ പൗരന്മാര്ക്ക് നിര്ദേശം നല്കിയിട്ടുണ്ട്.
രോഗബാധ പടരുന്നത് തടയാനുള്ള ശ്രമത്തിന്റെ ഭാഗമായി ഓഫിസിലെ ഹാജര് സംബന്ധിച്ച നിര്ദേശങ്ങളും സര്ക്കാര് കഴിഞ്ഞ ദിവസങ്ങളില് പുറപ്പെടുവിച്ചിരുന്നു. ജീവനക്കാരെ തിരികെ വിളിക്കരുതെന്നും വര്ക്ക് ഫ്രം ഹോം സംവിധാനം പരമാവധി നടപ്പിലാക്കണമെന്നും ആരോഗ്യമന്ത്രാലയം ഓഫിസുകള്ക്ക് നിര്ദേശം നല്കിയിട്ടുണ്ട്.
അണ്ടര് സെക്രട്ടറി തലത്തിന് താഴെയുള്ള 50 ശതമാനം ജീവനക്കാരും വീട്ടിലിരുന്ന് ജോലി ചെയ്യണമെന്ന് ജനുവരി മൂന്ന് തിങ്കളാഴ്ച പുറത്തിറക്കിയ ഉത്തരവില് പേഴ്സണല് മന്ത്രാലയം അറിയിച്ചു. ഗര്ഭിണികളെയും ഭിന്നശേഷിക്കാരെയും ഓഫിസില് വരുന്നതില് നിന്ന് ഒഴിവാക്കി.
നിര്ദ്ദേശങ്ങള് ഇങ്ങനെ...
1. അണ്ടര് സെക്രട്ടറി തലത്തിന് താഴെയുള്ള സര്ക്കാര് ജീവനക്കാരില് നേരിട്ട് ഓഫിസില് എത്തേണ്ടവരുടെ എണ്ണം 50 ശതമാനമായി കുറയ്ക്കും. 50 ശതമാനം ജീവനക്കാര് വീട്ടിലിരുന്ന് ജോലി ചെയ്യണം.
2. അണ്ടര് സെക്രട്ടറി തലത്തിലും അതിനുമുകളിലും ഉള്ള എല്ലാ ഉദ്യോഗസ്ഥരും പതിവായി ഓഫീസില് ഹാജരാകണം.
3. ഭിന്നശേഷിക്കാരും ഗര്ഭിണികളും വീട്ടില് ഇരുന്ന് ജോലി ചെയ്താല് മതി.
4. ഓഫീസുകളില് ആളുകളുടെ തിരക്ക് ഒഴിവാക്കാന് ഉദ്യോഗസ്ഥര്/ ജീവനക്കാര് കൃത്യമായ സമയക്രമം പാലിക്കണം.
5. കണ്ടെയ്ന്മെന്റ് സോണില് താമസിക്കുന്ന എല്ലാ ഓഫീസര്മാരെയും ജീവനക്കാരെയും, കണ്ടെയ്ന്മെന്റ് സോണ് പിന്വലിച്ചുകൊണ്ടുള്ള ഉത്തരവ് വരുന്നത് വരെ ഓഫീസുകളില് വരുന്നതില് നിന്ന് ഒഴിവാക്കും.
6. പൊതുതാല്പ്പര്യം കണക്കിലെടുത്ത് അത്യാവശ്യമല്ലാത്ത യോഗങ്ങള് കഴിവതും വീഡിയോ കോണ്ഫറന്സിങ് മുഖേന നടത്തണം.
7. എല്ലാ ഓഫീസര്മാരും/ സ്റ്റാഫുകളും കൊവിഡ് മാനദണ്ഡങ്ങള്ക്ക് അനുസൃതമായ പെരുമാറ്റച്ചട്ടം കര്ശനമായി പാലിക്കുന്നുണ്ടെന്ന് ഉറപ്പാക്കണം. കൈകള് ഇടയ്ക്കിടെ കഴുകുക/അണുവിമുക്തമാക്കുക. മാസ്ക്/ഫേസ് ഷീല്ഡ് ധരിക്കുക, എല്ലായ്പ്പോഴും സാമൂഹിക അകലം പാലിക്കുക.
സര്ക്കാര് ഓഫീസുകളില് മാത്രമല്ല, ഐടി കമ്പനികളും വര്ക്ക് ഫ്രം ഹോം തുടരാന് ആലോചിക്കുന്നുണ്ട്. ടിസിഎസ്, വിപ്രോ, ഇന്ഫോസിസ് തുടങ്ങിയ ഐടി ഭീമന്മാരും ഇതില് ഉള്പ്പെടുന്നു. നേരത്തെ രോഗത്തിന്റെ രണ്ടാം തരംഗം കുറയുന്ന സാഹചര്യം കണക്കിലെടുത്ത് ജീവനക്കാരെ ഓഫീസുകളിലേക്ക് തിരികെ വിളിക്കാനുള്ള ആഗ്രഹം ടിസിഎസ്, ഇന്ഫോസിസ്, എച്ച്സിഎല് ടെക്നോളജീസ് തുടങ്ങിയ ഐടി കമ്പനികള് പ്രകടിപ്പിച്ചിരുന്നു.
എന്നാല് നിലിവിലെ സാഹചര്യത്തില് അതിന് സാധ്യതയുണ്ടെന്ന് തോന്നുന്നില്ല. ജീവനക്കാരെ തിരികെ വിളിക്കരുതെന്നും വര്ക്ക് ഫ്രം ഹോം സംവിധാനം പരമാവധി നടപ്പിലാക്കണമെന്നും ആരോഗ്യ മന്ത്രാലയം ഓഫീസുകള്ക്ക് നിര്ദ്ദേശം നല്കി.
അതേസമയം വിവിധ കമ്പനികള് പ്രത്യേകിച്ച് ഐടി മേഖലയിലെ സ്ഥാപനങ്ങള് ജീവനക്കാരെ വീട്ടിലിരുന്ന് ജോലി തുടരാന് അനുവദിക്കാനുള്ള താല്പര്യം അറിയിച്ചിട്ടുണ്ട്. ഒമിക്രോണ് കേസുകള് സൂക്ഷ്മമായി നീരിക്ഷിക്കണമെന്നും വ്യാപനം ഉണ്ടാകാതിരിക്കാന് കരുതല് നടപടികള് സ്വീകരിക്കണമെന്നും ജില്ലാ ഭരണകൂടങ്ങളുമായി സഹകരിച്ച് വേണം നടപടികള് സ്വീകരിക്കേണ്ടതെന്നും കേന്ദ്രം സംസ്ഥാനങ്ങള്ക്ക് നിര്ദേശം നല്കിയിട്ടുണ്ട്.
"
https://www.facebook.com/Malayalivartha