ബിജെപിക്ക് രഹസ്യ ആപ് ! സംഘ പരിവാര്‍ അനുകൂല പോസ്റ്റുകളും കമന്റുകളും ട്രോളുകളുമൊക്കെ ഉണ്ടാക്കുന്നത് വ്യക്തികളല്ല, കൃത്രിമമായി സൈബര്‍ ഇടം കീഴടക്കാന്‍ ബിജെപി ഉപയോഗിക്കുന്ന ആപ്പിനെക്കുറിച്ചുള്ള ഞെട്ടിക്കുന്ന വിവരങ്ങള്‍ പുറത്ത്
രാഷ്ട്രീയ പാര്‍ട്ടികളുടെ സോഷ്യല്‍ മീഡിയ ഇടപെടലുകള്‍ പലപ്പോഴും ദുരൂഹത ഏറിയതാണ്. സൈബറിടങ്ങളില്‍ ജനപ്രീതിയുണ്ടാക്കാനും എതിര്‍ക്കുന്നവരെപ്പറ്റി വിദ്വേഷ പ്രചാരണം നടത്താനും ഓണ്‍ലൈന്‍ ട്രെന്‍ഡുകള്‍ മനസിലാക്കാനും സോഷ്യല്‍ മീഡിയയിലൂടെ ട്രോളുകള്‍ പ്രചരിപ്പിക്കാനുമൊക്കെ ടെക് ഫോഗ് എന്ന ആപ്പാണ് ബിജെപി സൈബര്‍ വിഭാഗം ഉപയോഗിക്കുന്നതെന്നാണ് ഞെട്ടിക്കുന്ന വെളിപ്പെടുത്തല്‍.
രണ്ട് വര്‍ഷത്തോളം നീണ്ടു നിന്ന അന്വേഷണങ്ങള്‍ക്കൊടുവില്‍ ദ് വയര്‍ പുറത്തുവിട്ട റിപ്പോര്‍ട്ടിലാണ് ബിജെപി സൈബര്‍ വിഭാഗത്തെ കുറിച്ചുള്ള സുപ്രധാന വിവരങ്ങള്‍ പുറത്തുവന്നിരിക്കുന്നത്. ആപ്പിന് പിന്നില്‍ പ്രവര്‍ത്തിച്ചവരുടെ വെളിപ്പെടുത്തലുകളും സ്‌ക്രീന്‍ ഷോട്ടുകളും സഹിതമാണ് ദ് വയര്‍ വിശദമായ റിപ്പോര്‍ട്ട് തയാറാക്കിയിരിക്കുന്നത്.
ദ് വയറിന്റെ കണ്ടെത്തല്‍ പ്രകാരം ലോകത്തെ വന്‍കിട ടെക് കമ്പനികളോട് കിടപിടിക്കുന്ന സാങ്കേതിക മികവാണ് ആപ്പിനുള്ളത്. ബിജെപി ഐടി സെല്ലും യുവജന വിഭാഗമായ ഭാരതീയ യുവമോര്‍ച്ചയുമാണ് ആപ്പിന് പിന്നിലെന്ന് ഇവര്‍ പറയുന്നു. സംഘ പരിവാര്‍ അനുകൂല പോസ്റ്റുകളും കമന്റുകളും ട്രോളുകളുമൊക്കെ ഉണ്ടാക്കുന്നത് വ്യക്തികളല്ല, കൃത്രിമമായാണെന്നും റിപ്പോര്‍ട്ടില്‍ പറയുന്നു. 2019 ല്‍ അധികാരത്തിലെത്തിയാല്‍ ഉന്നത സര്‍ക്കാര്‍ ജോലി തരാമെന്ന വാഗ്ദാനം ലംഘിക്കപ്പെട്ടതിനെ തുടര്‍ന്ന് അസംതൃപ്തനായ ബിജെപി ഐടി സെല്ലിലെ ഒരു ജീവനക്കാരനാണ് അധികമാര്‍ക്കും അറിവില്ലാത്ത ടെക് ഫോഗിനെപ്പറ്റി ആദ്യമായി വെളിപ്പെടുത്തിയതെന്നും അവര്‍ പറയുന്നു. അജ്ഞാതനായ ഒരാളുടെ ട്വിറ്റര്‍ അക്കൗണ്ടിലൂടെ 2020 ഏപ്രിലിലായിരുന്നു വെളിപ്പെടുത്തല്‍.
ട്വിറ്റര്‍, ഫെയ്‌സ്ബുക്ക് തുടങ്ങിയ പ്ലാറ്റ്‌ഫോമുകളില്‍ കൃത്രിമമായി ട്രെന്റുകളുണ്ടാക്കാനും തങ്ങളുടെ ആശയങ്ങള്‍ക്ക് കൂടുതല്‍ പ്രാമുഖ്യമുണ്ടെന്നു വരുത്താനും പാര്‍ട്ടിയുടെ ജനപ്രീതി വര്‍ധിപ്പിക്കാനും വിമര്‍ശകരെ അപകീര്‍ത്തിപ്പെടുത്താനും സംഘ് പരിവാറിനനുകൂലമായി പൊതുജനാഭിപ്രായം രൂപീകരിക്കാനും ഭരണകക്ഷിയുമായി ബന്ധപ്പെട്ട രാഷ്ട്രീയ പ്രവര്‍ത്തകര്‍ ഈ ആപ്പ് ഉപയോഗിക്കുന്നു എന്നായിരുന്നു അന്ന് ട്വീറ്റില്‍ വെളിപ്പെടുത്തിയിരുന്നത്.
ട്വിറ്ററിലെ ട്രെന്‍ഡിങ് എന്ന സെക്ഷനും ഫെയ്‌സ്ബുക്കിലെ ട്രെന്‍ഡ് എന്ന സെക്ഷനും ടെക് ഫോഗ് ഉപയോക്താക്കള്‍ക്ക് ഹൈജാക് ചെയ്യാനാകും. ചില ട്വീറ്റുകളും പോസ്റ്റുകളും ഓട്ടോ റീട്വീറ്റ് ചെയ്തും ഓട്ടോ ഷെയര്‍ ചെയ്തുമാണ് ഇത് സാധ്യമാക്കുന്നത്. സ്വകാര്യ വ്യക്തികളുടെ നിലവില്‍ ഉപയോഗിക്കാത്ത വാട്‌സാപ്പ് അക്കൗണ്ടുകള്‍ ഹൈജാക് ചെയ്ത് ആ ഫോണ്‍ നമ്പര്‍ ഉപയോഗിച്ച് കോണ്‍ടാക്ടുകളിലേക്ക് മെസേജുകള്‍ അയക്കാം.
"
https://www.facebook.com/Malayalivartha
