ഞങ്ങളെ ആരും കേട്ടില്ല! തെരഞ്ഞെടുപ്പ് അടുക്കാറാകുമ്പോള്‍ പലതരം വാഗ്ദാനങ്ങളുമായി അവര്‍ വരും; മൊബൈല്‍ ടവര്‍ ഉദ്ഘാടനത്തിനെത്തിയ എംഎല്‍എയ്ക്ക് മുട്ടന്‍ പണി കൊടുത്ത് ഗ്രാമവാസികള്‍
അധികാരികളുടെ കണ്ണ് തുറപ്പിക്കാന്‍ ചിലപ്പോള്‍ വേറിട്ട രീതിയിലുള്ള പ്രതിഷേധങ്ങളിലേക്ക് വരെ ആളുകള്‍ തിരിഞ്ഞെന്ന് വരും. ഇപ്പോള്‍ അത്തരത്തിലുണ്ടായ ഒരു പ്രതിഷേധമാണ് സമൂഹമാധ്യമങ്ങളില്‍ നിറയുന്നതും. പുതിയതായി നിര്‍മിച്ച മൊബൈല്‍ ടവറിന്റെ ഉദ്ഘാടനത്തിന് ക്ഷണിക്കാനായാണ് ഒഡീഷയിലെ ബന്ദപരി നിവാസികള്‍ ബിജെഡി എംഎല്‍എ പ്രദീപ് കുമാര്‍ ദിഷാരിയുടെ ഓഫിസിലെത്തിയത്.
പ്രദീപ് കുമാറിന്റെ മണ്ഡലമായ ബൗത്തിഖാമാനില്‍ ഉള്‍പ്പെടെ തെരഞ്ഞെടുപ്പ് നടക്കാനിരിക്കുന്ന സമയമായതിനാല്‍ അദ്ദേഹം മറുത്ത് ഒരു വാക്ക് പോലും മിണ്ടാതെ ക്ഷണം സ്വീകരിക്കുകയും ചെയ്തു. ഉദ്ഘാടന ദിവസം കൃത്യസമയത്ത് തന്നെ എംഎല്‍എ ടവര്‍ സ്ഥാപിച്ച ഗ്രാമത്തിലെത്തി. എന്നാല്‍ എംഎല്‍എയെ അവിടെ കാത്തിരുന്നത് വമ്പന്‍ ട്വിസ്റ്റാണ്.
മുളങ്കമ്പുകള്‍ കൊണ്ട് കെട്ടിത്തൂക്കിയ ഒരു ഡമ്മി ടവര്‍ ആണ് മൊബൈല്‍ ടവറിന് പകരം എംഎല്‍എയെ കാത്തിരുന്നത്. ഇതിന് മുന്നിലായി ബിഎസ്എന്‍എല്‍ 4ജി എന്നെഴുതിയ ബാനറും കെട്ടിതൂക്കിയിട്ടുണ്ട്.
അതുമാത്രമല്ലനമ്മുടെ പുതിയ മൊബൈല്‍ ടവര്‍ ബഹുമാനപ്പെട്ട എംഎല്‍എ പ്രദീപ് കുമാര്‍ ദിഷാരി ഉദ്ഘാടനം ചെയ്യുന്നുവെന്നും ബാനറില്‍ എഴുതിയിട്ടുണ്ട്. എംഎല്‍എയ്ക്ക് ചുറ്റും രോഷാകുലരായി നാട്ടുകാരും കൂടി. ഗ്രാമത്തില്‍ ഒരു മൊബൈല്‍ ടവര്‍ ഇല്ലാത്തതിന്റെ പ്രതിഷേധമാണ് അവര്‍ പ്രകടിപ്പിച്ചത്. നെറ്റ്വര്‍ക്കിന് തീരെ റേഞ്ചില്ലാതെ ഗ്രാമവാസികള്‍ വലിയ ദുരിതത്തിലുമാണ്.
ഗ്രാമത്തില്‍ ഒരു മൊബൈല്‍ ടവറിനായി നിരന്തരം അവര്‍ കയറി ഇറങ്ങാത്ത ഓഫിസുകളില്ല. എന്നാല്‍ അവരുടെ ഈ ചെറിയ ആവശ്യം പോലും അധികൃതര്‍ മുഖവിലയ്‌ക്കെടുത്തില്ല.
ഈ വ്യാജ ഉദ്ഘാടനം രാഷ്ട്രീയക്കാരോടും അവരുടെ കള്ള വാഗ്ദാനങ്ങളോടുമുള്ള ഞങ്ങളുടെ പ്രതിഷേധ മാര്‍ഗമാണ്. ഒരു മൊബൈല്‍ ടവറിനായി ഞങ്ങള്‍ ഇവിടുത്തെ രാഷ്ട്രീയക്കാരോട് പല തവണ കേണപേക്ഷിച്ചു. മൊബൈല്‍ കണക്ടിവിറ്റി ഇല്ലാത്തതിനാല്‍ മുതിര്‍ന്നവരും കുട്ടികളും ഒരേ പോലെ ദുരിതത്തിലാണ്. എന്നാല്‍ എല്ലാ അപേക്ഷകളും വെറുതേയാകുകയായിരുന്നു.
ഞങ്ങളെ ആരും കേട്ടില്ല. തെരഞ്ഞെടുപ്പ് അടുക്കാറാകുമ്പോള്‍ പലതരം വാഗ്ദാനങ്ങളുമായി അവര്‍ വരും. എന്നാല്‍ അത് പിന്നീട് മറക്കും. സഹികെട്ടിട്ടാണ് ഞങ്ങള്‍ ഇത്തരത്തില്‍ പ്രതിഷേധിച്ചത്- ഗ്രാമവാസിയായ തരുണ ദളപതി ദേശീയ മാധ്യമങ്ങളോട് വ്യക്തമാക്കി. ഒരു ഫോണ്‍ വിളിക്കാനായി 4 കിലോ മീറ്ററോളം സഞ്ചരിക്കണമെന്നും കൃത്യസമയത്ത് ആംബുലന്‍സ് വിളിക്കാനാകാത്തതിനാല്‍ ഈയടുത്ത് 27 വയസുള്ള ഗര്‍ഭിണി മരിച്ചെന്നും ദളപതി പറയുന്നു.
സ്‌കൂളുകളില്‍ ക്ലാസുകള്‍ ഓണ്‍ലൈന്‍ ആക്കിയപ്പോള്‍ കുട്ടികളും ദുരിതത്തിലായി. അവര്‍ മലമുകളിലുള്ള ഒരു സ്ഥലത്തെത്തിയാണ് ക്ലാസില്‍ പങ്കെടുത്തിരുന്നതെന്നും ഗ്രാമവാസികള്‍ പ്രതികരിച്ചു.
"
https://www.facebook.com/Malayalivartha
