വെടി നിര്‍ത്തല്‍ ലംഘനമുണ്ടാകില്ലെന്ന് ഇരു രാജ്യങ്ങളും ഉറപ്പിച്ച് ഒരു ദിവസത്തിനുള്ളില്‍ പാകിസ്ഥാന്റെ കരാര്‍ ലംഘനം. അതിര്‍ത്തിക്കപ്പുറത്ത് നിന്നുള്ള വെടിയേറ്റ് ബി.എസ്.എഫ് എ.എസ്.ഐ മരിച്ചു. ജമ്മു കാശ്മീരിലെ രാജൗരി മേഖലയിലെ നിയന്ത്രണ രേഖയിലാണ് സംഭവം.
വെടി നിര്‍ത്തല്‍ കരാര്‍ ലംഘിക്കില്ലെന്ന് കഴിഞ്ഞ ദിവസം നടന്ന ബി.എസ്.എഫ് റേഞ്ചഴ്‌സ് സംയുക്ത യോഗത്തില്‍ ഇരു തലവന്മാരും ഉറപ്പു നല്‍കിയിരുന്നു. പോസ്റ്റില്‍ ജോലിയിലുണ്ടായിരുന്ന സോഹന്‍ ലാലാണ് മരിച്ചതെന്ന് സ്ഥിരീകരിച്ചിട്ടുണ്ട്. നിയന്ത്രണ രേഖയില്‍ കരസേനയ്ക്കാണ് സംരക്ഷണ ചുമതലയെങ്കിലും ചിലയിടങ്ങളില്‍ ബി.എസ്.എഫിനെയും നിയോഗിച്ചിട്ടുണ്ട്.
അന്താരാഷ്ട്ര അതിര്‍ത്തിയായ സാംബ ജില്ലയില്‍ ഞായറാഴ്ച രാവിലെയും വെടിനിര്‍ത്തല്‍ ലംഘനമുണ്ടായതായി റിപ്പോര്‍ട്ടുണ്ട്. ചെറിയ ആയുധങ്ങള്‍ കൊണ്ട് മൂന്ന് റൗണ്ട് വെടിയുതിര്‍ക്കുകയായിരുന്നു. സാംബയിലെ ഔട്ട് പോസ്റ്റായിരുന്നു ലക്ഷ്യമെന്നാണ് കരുതുന്നത്. എന്നാല്‍ ബി.എസ്.എഫ് തിരിച്ചടിച്ചില്ലെന്നാണ് ഔദ്യോഗിക വിശദീകരണം.
ഇന്ത്യ പാക് ബന്ധം വഷളാക്കി ജമ്മു കാശ്മീരില്‍ അടുത്തിടെ വെടിനിര്‍ത്തല്‍ ലംഘനങ്ങള്‍ തുടര്‍ക്കഥയാവുകയായിരുന്നു. കാശ്മീര്‍ ചര്‍ച്ചയാക്കുമെന്ന പാകിസ്ഥാന്റെ അറിയിപ്പിനെ തുടര്‍ന്ന് ഉപദേഷ്ടാവ് തല ചര്‍ച്ച റദ്ദാക്കിയിരുന്നു. ജൂലായ് 26 വരെ അന്തര്‍ ദേശീയ അതിര്‍ത്തിയില്‍ പാകിസ്ഥാന്‍ 192 തവണ വെടി നിര്‍ത്തല്‍ ലംഘിച്ചെന്ന് സര്‍ക്കാര്‍ ലോക്‌സഭയെ അറിയിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha