ശ്രീലങ്ക ഇന്ത്യയോട് അടുക്കുന്നതില്‍ ആശങ്കപ്പെട്ട് ചൈന, മൂന്നു ദിവസത്തെ സന്ദര്‍ശനത്തിന് ശ്രീലങ്കന്‍ പ്രധാനമന്ത്രി ഇന്ത്യയില്‍
മൂന്ന് ദിവസത്തെ ഇന്ത്യയിലെത്തിയ ശ്രീലങ്കന്‍ പ്രധാനമന്ത്രി റനില്‍ വിക്രമസിംഗെക്ക് ഇജ്ജ്വല സ്വീകരണം. ഇന്നലെയാണ് വിക്രമ സിംഗെ ഇന്ത്യയിലെത്തിയത്. പക്ഷേ ശ്രീലങ്കന്‍ പ്രധാനമന്ത്രിയുടെ സന്ദര്‍ശനം ചൈന അതീവ് ഗൗരവത്തോടെയാണ് വീക്ഷിക്കുന്നത്. പ്രധാനമന്ത്രി നരേന്ദ്രമോഡിയുമായി വിക്രമസിംഗെ നടത്തിയ കൂടികാഴ്ചയില്‍ ഇന്ത്യയില്‍നിന്നുള്ള സ്വകാര്യ സംരംഭകരെക്കൂടി ശ്രീലങ്കയുടെ സാമ്പത്തിക വികസന പദ്ധതികളില്‍ ഉള്‍പ്പെടുത്തണമെന്നു പ്രധാനമന്ത്രി നരേന്ദ്ര മോഡി ആവശ്യപ്പെട്ടു. സമഗ്ര സാമ്പത്തിക പങ്കാളിത്തത്തിനുള്ള കരാര്‍ അടുത്ത വര്‍ഷം മധ്യത്തില്‍ ഒപ്പുവയ്ക്കുമെന്ന് മോഡിയുമായുള്ള ചര്‍ച്ചയ്ക്കുശേഷം ശ്രീലങ്കന്‍ പ്രധാനമന്ത്രി പറഞ്ഞു.പ്രതിരോധം, സുരക്ഷ തുടങ്ങിയ മേഖലകളില്‍ സര്‍ക്കാര്‍തല സഹകരണം ഊര്‍ജിതപ്പെടുത്താനുള്ള താല്‍പര്യം മോദി അടിവരയിട്ടു പറഞ്ഞു. അടിസ്ഥാനസൗകര്യ വികസനം, ഊര്‍ജം, ഗതാഗതം തുടങ്ങിയവയില്‍ ഇന്ത്യയില്‍നിന്നുള്ള സ്വകാര്യ സംരംഭകര്‍ക്കു മുതല്‍മുടക്കാനാവുമെന്ന പ്രതീക്ഷയും പ്രധാനമന്ത്രി പങ്കുവച്ചു.
ശ്രീലങ്കയിലെ തമിഴ് വംശജരും ഇന്ത്യന്‍ മല്‍സ്യത്തൊഴിലാളികളും നേരിടുന്ന പ്രശ്‌നങ്ങളും പരാമര്‍ശിക്കപ്പെട്ടു. തമിഴ് വംശജര്‍ക്കു തുല്യതയും നീതിയും സമാധാനവും അന്തസ്സും ഉറപ്പാക്കാന്‍ ആത്മാര്‍ഥമായ നടപടികള്‍ വേണമെന്നു മോഡി പറഞ്ഞു.
ശ്രീലങ്കയുടെ വടക്ക്, കിഴക്കന്‍ പ്രവിശ്യകളിലെ പുനര്‍നിര്‍മാണ പദ്ധതികളില്‍ ഇന്ത്യ നല്‍കുന്ന സഹായത്തിനു നന്ദി പറഞ്ഞ വിക്രമസിംഗെ, തമിഴ് വംശജരുമായി അധികാരം പങ്കിടാനുള്ള ഭരണഘടനാപരമായ നടപടികള്‍ക്കാണു ശ്രമമെന്നു വ്യക്തമാക്കി.
ശ്രീലങ്കന്‍ സമുദ്രാതിര്‍ത്തി കടക്കുന്ന മല്‍സ്യത്തൊഴിലാളികള്‍ക്കെതിരെ വിക്രമസിംഗെ നേരത്തേ കടുത്ത നിലപാടെടുത്തിരുന്നു. ഇതുകൂടി കണക്കിലെടുത്താവണം, വിഷയത്തെ നിത്യജീവിതത്തെ ബാധിക്കുന്ന മാനുഷിക പ്രശ്‌നമായി പരിഗണിക്കണമെന്നു മോഡി അഭ്യര്‍ഥിച്ചു. പ്രശ്‌നപരിഹാരത്തിന് ഇരുപക്ഷത്തെയും മല്‍സ്യത്തൊഴിലാളി അസോസിയേഷനുകള്‍ ശ്രമിക്കേണ്ടതുണ്ടെന്നു നേതാക്കള്‍ വിലയിരുത്തി.
വ്യാപാരം, നിക്ഷേപം, സാങ്കേതികവിദ്യ എന്നിവയ്ക്ക് ഊന്നല്‍ നല്‍കിയുള്ളതാവും സമഗ്ര സാമ്പത്തിക പങ്കാളിത്ത കരാറെന്നു വിക്രമസിംഗെ പറഞ്ഞു. ഇരുരാജ്യങ്ങളിലെയും സ്വകാര്യ മേഖലയുടെ സഹകരണം പ്രതീക്ഷിക്കുന്നു. കരാറിന് ഈ വര്‍ഷം അവസാനത്തോടെ തത്വത്തില്‍ അംഗീകാരം നല്‍കാനാവുമെന്ന് അദ്ദേഹം വിശദീകരിച്ചു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
