പിക്‌നിക്കിന് പോകാന്‍ മാതാപിതാക്കള്‍ പണം നല്‍കാന്‍ വിസമ്മതിച്ചതിനെ തുടര്‍ന്ന് ഒമ്പതാം ക്ലാസ് വിദ്യാര്‍ത്ഥിനി ജീവനൊടുക്കി. മോണിക്ക ഗോവിന്ദ് അര്യാല്‍(14) എന്ന കുട്ടിയാണ് ആത്മഹത്യ ചെയ്തത്. സ്‌കൂളില്‍ നിന്നും വിനോദയാത്രയ്ക്ക് പോകാന്‍ 750 രൂപയാണ് കുട്ടി ആവശ്യപ്പെട്ടത്. എന്നാല്‍ ഇത് നല്‍കാന്‍ മാതാപിതാക്കള്‍ തയ്യാറാകാതിരുന്നതോടെ കുട്ടി ജീവനൊടുക്കുകയായിരുന്നു.

ഞായറാഴ്ചയാണ് സംഭവം നടന്നത്. മുംബൈയില്‍ ആസാദ് ഗൗണ്‍ പ്രദേശത്താണ് മോണിക്ക താമസിച്ചു വന്നത്. സ്‌കൂളില്‍ നിന്നും വിനോദയാത്രയ്ക്കായി താനും ഉണ്ടാകുമെന്ന് പെണ്‍കുട്ടി സുഹൃത്തുക്കള്‍ക്ക് ഉറപ്പ് കൊടുത്തിട്ടാണ് വീട്ടില്‍ എത്തിയത്. സ്‌കൂളില്‍ പണം കൊടുക്കേണ്ട അവസാന ദിനം തിങ്കളാഴ്ചയായിരുന്നു . എന്നാല്‍ ഞായറാഴ്ച രാത്രി ആയിട്ടും മാതാപിതാക്കള്‍ പണം നല്‍കാന്‍ തയ്യാറായില്ല. തുടര്‍ന്ന് പ്രദേശത്തെ പണി പുരോഗമിക്കുന്ന ഫഌറ്റിന്റെ അഞ്ചാം നിലയില്‍ നിന്നും പെണ്‍കുട്ടി ചാടി ജീവനൊടുക്കുകയായിരുന്നു.

പ്രദേശത്ത് കട നടത്തുകയായിരുന്ന മാതാപിതാക്കള്‍ കട അടച്ച് വീട്ടില്‍ എത്തിയപ്പോള്‍ പണം കൊടുക്കേണ്ട അവസാന ദിവസം നാളെയാണെന്ന് പെണ്‍കുട്ടി ഓര്‍മപ്പെടുത്തി. എന്നാല്‍ നിലവിലെ സാമ്പത്തിക സ്ഥിതി വച്ച് ഇപ്പോള്‍ വിനോദയാത്രയ്ക്കായി പണം മുടക്കാന്‍ സാധിക്കില്ലെന്നാണ് മാതാപിതാക്കള്‍ പറഞ്ഞത്. എന്നാല്‍ ഇത് അംഗീകരിക്കാന്‍ പെണ്‍കുട്ടി തയ്യാറായില്ല.

തുടര്‍ന്ന് പെണ്‍കുട്ടി വഴക്കുണ്ടാക്കാന്‍ ആരംഭിച്ചതോടെ അമ്മ കുട്ടിയെ മര്‍ദിച്ചു. പിന്നീട് പുലര്‍ച്ചെ രണ്ട് മണിയോടെ സമീപവാസികളില്‍ ഒരാള്‍ എത്തി ആത്മഹത്യക്കു ശ്രമിച്ച കുട്ടിയെ ആശുപത്രിയില്‍ കൊണ്ടുപോയ വിവരം മാതാപിതാക്കളെ അറിയിക്കുകയായിരുന്നു.സമീപത്തെ പണി നടക്കുന്ന ഫ്ലാറ്റില്‍ നിന്നും കുട്ടി ചാടുകയായിരുന്നു. ചാട്ടത്തില്‍ തലയ്ക്ക് സാരമായി പരുക്ക് പറ്റിയ കുട്ടി തല്‍ക്ഷണം മരിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക