കനത്ത മഴക്ക് മതത്തിന്റെ വേലിക്കെട്ടുകളെ നിഷ്പ്രയാസം തകര്‍ത്തെറിയാന്‍ കഴിയുമോ. ഇതിനുത്തരം ചെന്നൈ പറയും. കനത്ത മഴയെ തുടര്‍ന്നുണ്ടായ പ്രളയത്തില്‍ വലയുന്ന തമിഴ്‌നാട്ടില്‍ മത സൗഹാര്‍ദ്ദത്തിന്റെ ചരിത്രമെഴുതി ഒരു കൂട്ടം യുവാക്കള്‍. വെള്ളപ്പൊക്കത്തെ തുടര്‍ന്ന് മലിന ജലവും അഴുക്കും ഒലിച്ചിറങ്ങിയ ചെന്നൈയിലെ ക്ഷേത്രങ്ങളില്‍ ജാതിയുടെയോ മതത്തിന്റെയോ വേര്‍തിരിവില്ലാതെയാണ് ജനങ്ങള്‍ ശുചീകരണ പ്രവര്‍ത്തനങ്ങളുമായി രംഗത്തെത്തിയത്.
ദേവാലയങ്ങള്‍ ശുചിയാക്കുകയെന്ന ലക്ഷ്യവുമായി അമ്പതോളം ജമാഅത്തെ ഇസ്ലാമി പ്രവര്‍ത്തകരാണ് തെരുവിലിറങ്ങിയത്. കോട്ടൂര്‍പുരം സൈദാപ്പട്ട് തുടങ്ങിയ സ്ഥലങ്ങളിലെ ക്ഷേത്രങ്ങളും പള്ളികളുമാണ് യുവാക്കളുടെ നേതൃത്വത്തില്‍ വൃത്തിയാക്കിയത്. നടപടിയുമായി മുന്നിട്ടിറങ്ങിയ യുവാക്കളെ ദേവാലയങ്ങളുടെ മുന്നില്‍ മതത്തിന്റെ പേരു പറഞ്ഞ് ആരും തടഞ്ഞില്ല. പകരം യുവാക്കള്‍ക്കൊപ്പം ജാതി മത ചിന്തകള്‍ മാറ്റി നിര്‍ത്തി പ്രദേശവാസികള്‍ ഒന്നടങ്കം അണിനിരന്നു. എഞ്ചിനീയറിംഗ് വിദ്യാര്‍ത്ഥിയായ പീര്‍മുഹമ്മദിന്റെ നേതൃത്വത്തില്‍ ആയിരുന്നു ഈ മഹത് പ്രവര്‍ത്തി നടന്നത്.
ഏതായാലും വര്‍ഗീയതയുടെയും വെറുപ്പിന്റെയും അസഹിഷ്ണുതയുടെയും വാര്‍ത്തകള്‍ മാത്രം കേള്‍ക്കുന്ന ഇക്കാലത്ത് ഒരു കൂട്ടം മുസ്ലീം ചെറുപ്പക്കാര്‍ മഴവെള്ള കെടുതിയില്‍ വൃത്തിഹീനമായ കൊട്ടൂര്‍പുരം സൈതപട്ട് എന്നിവിടങ്ങളിലെ ഹിന്ദു ക്ഷേത്രങ്ങള്‍ വൃത്തിയാക്കി ശുചീകരിച്ചു എന്ന വാര്‍ത്ത ഇന്ത്യയിലെ പൊതു സമൂഹത്തിനു നല്‍കുന്നത് വലിയ പ്രതീക്ഷയുടെ പൊന്‍ കിരണം തന്നെയാണ്. പ്രകൃതി തിരിഞ്ഞാല്‍ മനുഷ്യന്‍ വെറും നോക്കുകുത്തി മാത്രം എന്നും ജാതിമത വ്യത്യാസം ഇല്ലാതെ ഭക്ഷണത്തിനായി എല്ലാവരും കരഞ്ഞ് കൈ നീട്ടുമ്പോള്‍ ജാതി തിട്ടൂരങ്ങള്‍ എങ്ങും കാണാനില്ലായിരുന്നു. ചെന്നൈ എല്ലാ അര്‍ത്ഥത്തിലും ഒരു തിരിച്ചറിവാകട്ടെ എല്ലാവര്‍ക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha