ഹരിയാനയിലെ റോഹ്തക്കില്‍ ബുദ്ധിമാന്ദ്യമുള്ള നേപ്പാളി യുവതിയെ കൂട്ടബലാത്സംഗത്തിനിരയാക്കി കൊലപ്പെടുത്തിയ ഏഴു പേര്‍ക്ക് പ്രത്യേക കോടതി വധശിക്ഷ വിധിച്ചു. അക്രമത്തിലുള്‍പ്പെട്ട പ്രായപൂര്‍ത്തിയാകാത്തയാളുടെ വിചാരണ ജുവനൈല്‍ കോടതിയില്‍ തുടരുകയാണ്. ഒമ്പതാം പ്രതി നേരത്തെ ആത്മഹത്യ ചെയ്തിരുന്നു.

28 വയസുള്ള യുവതിയെ കൊന്നശേഷം റോഹ്തക്ക് ഹിസാര്‍ റോഡിലെ അക്ബര്‍പൂര്‍ ഗ്രാമത്തില്‍ ഉപേക്ഷിക്കുകയായിരുന്നു. ആഴത്തില്‍ മുറിവുകളേറ്റ യുവതിയുടെ വയറ്റില്‍ നിന്ന് കല്ലുകളും ബ്ലേഡുകളും കണ്ടെത്തിയത് ക്രൂരതയുടെ ആഴം വെളിവാക്കി. ഇക്കൊല്ലം ഫെബ്രുവരിയിലായിരുന്നു നടുക്കുന്ന ഈ അക്രമം നടന്നത്.

പ്രതികള്‍ക്കുള്ള ശിക്ഷയില്‍ വാദം കേട്ട അഡീഷണല്‍ ഡിസ്ട്രിക്ട് ആന്റ് സെഷന്‍സ് ജഡ്ജി സീമാ സിംഗാള്‍ ഓരോ പ്രതികളും 1.75 ലക്ഷം രൂപ വീതം നഷ്ടപരിഹാരം നല്‍കണമെന്നും വിധിച്ചു. പദം,പവന്‍, സുനില്‍, സര്‍വാര്‍, രാജേഷ്,സുനില്‍,മന്‍ബീര്‍ എന്നീ യുവാക്കളാണ് പ്രതികള്‍.
ഒരു നിയമഉദ്യോഗസ്ഥ എന്നതിനപ്പുറം താനൊരു മനുഷ്യജീവിയാണെന്നും ഇരയുടെ രോദനം താന്‍ കേള്‍ക്കുണ്ടെന്നും വധശിക്ഷ വിധിച്ചശേഷം വികാരാധീനയായി ജഡ്ജി പറഞ്ഞു. നമ്മുടെ സമൂഹത്തില്‍ സ്ത്രീകള്‍ വിവേചനം നേരിടുന്നുണ്ട്. വ്യവസ്ഥിതിയില്‍ പുരുഷ മേധാവിത്വം നിലനില്‍ക്കുന്നതും യാഥാര്‍ത്ഥ്യമാണ്.

പ്രതികള്‍ക്കുള്ള ശിക്ഷ കരുത്തുള്ള മുന്നറിയിപ്പാവണമെന്നും അവര്‍ പറഞ്ഞു. നിര്‍ഭയ തുടങ്ങിയ പേരുകളില്‍ വ്യക്തിത്വം ഒളിപ്പിക്കാതെ അഭിമാനത്തോടെ സ്വന്തം പേരുച്ചരിക്കാന്‍ സ്ത്രീകള്‍ക്ക് കഴിയണമെന്നും സീമാ സിംഗാള്‍ പ്രത്യാശിച്ചു.

കഴിഞ്ഞ 10 മാസമായി തുടരുന്ന വിചാരണയുടെ ഭാഗമായി 66 സാക്ഷികളാണ് മൊഴി രേഖപ്പെടുത്തിയത്. ഇതിലേറെയും പൊലീസുകാരായിരുന്നു.

അന്വേഷണത്തെക്കുറിച്ച് വിധിയ്ക്ക് ശേഷവും പ്രതിഭാഗം വാദിച്ചെങ്കിലും കോടതി തള്ളി. വെള്ളിയാഴ്ചയാണ് ഇവര്‍ കുറ്റക്കാരാണെന്ന് കോടതി കണ്ടെത്തിയത്. വിധിയ്‌ക്കെതിരെ മേല്‍ക്കോടതിയെ സമീപിക്കുമെന്ന് പ്രതിഭാഗം അഭിഭാഷകന്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha