റഷ്യ സന്ദര്‍ശനം പൂര്‍ത്തിയാക്കി പ്രധാനമന്ത്രി നരേന്ദ്ര മോഡി അഫ്ഗാനിസ്ഥാനില്‍ എത്തി. കാബൂളില്‍ എത്തിയ പ്രധാനമന്ത്രിയെ അഫ്ഗാന്‍ ദേശീയ സുരക്ഷാ ഉപദേഷ്ടാവ് മുഹമ്മദ് ഹാനിഫ് അട്മറും ഹേമന്ത് കര്‍സായിയും ചേര്‍ന്ന് സ്വീകരിച്ചു. അഫ്ഗാനിസ്ഥാന്‍ പ്രസിഡന്റ് അഷ്‌റഫ് ഗാനിയുമായും മറ്റു മുതിര്‍ന്ന നേതാക്കളുമായും മോഡി കൂടിക്കാഴ്ച നടത്തും. ഇന്ത്യ നിര്‍മിച്ചു നല്‍കിയ പാര്‍ലമെന്റ് കെട്ടിടത്തിന്റെ ഉദ്ഘാടനവും മോഡി നിര്‍വഹിക്കും.
രണ്ടു ദിവസത്തെ റഷ്യ സന്ദര്‍ശനം പൂര്‍ത്തിയാക്കിയാണ് മോഡി അഫ്ഗാനിസ്ഥാനിലെത്തിയത്. പതിനാറാമതു വാര്‍ഷിക ഉച്ചകോടിയില്‍ പങ്കെടുക്കുന്നതിനായാണ് മോഡി റഷ്യയിലെത്തിയത്. പ്രധാനമന്ത്രി നരേന്ദ്ര മോഡിയും റഷ്യന്‍ പ്രസിഡന്റ് വ്‌ലാഡിമിര്‍ പുടിനും തമ്മില്‍ നടന്ന ചര്‍ച്ചയോടെയാണു ഉച്ചകോടിക്കു തുടക്കമായത്. പ്രതിരോധ ആണവോര്‍ജ മേഖലകളില്‍ സഹകരണം ശക്തിപ്പെടുത്താനും ഇന്ത്യന്‍ കമ്പനികള്‍ക്കു റഷ്യയിലെ എണ്ണ പ്രകൃതിവാതക മേഖലയില്‍ പങ്കാളിത്തം നല്‍കാനും ഇന്ത്യ റഷ്യ വാര്‍ഷിക ഉച്ചകോടിയില്‍ തീരുമാനമായി. 
ഉഭയകക്ഷി ചര്‍ച്ചകള്‍ക്കൊടുവില്‍ റഷ്യന്‍ പ്രസിഡന്റ് വ്‌ലാഡിമിര്‍ പുടിനും മോഡിയും 16 കരാറുകളില്‍ ഒപ്പുവച്ചു. പ്രതിരോധ രംഗത്ത് ശക്തി കൂട്ടുന്നതിനായി ഹെലികോപ്ടറുകള്‍ സംയുക്തമായി നിര്‍മ്മിക്കാന്‍ ഇന്ത്യയും റഷ്യയും തീരുമാനിച്ചു. കമോവ് 226ടി ഹെലികോപ്ടറുകള്‍ നിര്‍മ്മിക്കാനാണ് പ്രധാന തീരുമാനം. ഇതിനൊപ്പം ഇന്ത്യയില്‍ രണ്ട് സ്ഥലങ്ങളിലായി 12 റഷ്യന്‍ ആണവ റിയാക്ടറുകള്‍ നിര്‍മ്മിക്കാനും ധാരണയായി. തുടര്‍ന്ന് ഫ്രണ്ട്‌സ് ഓഫ് ഇന്ത്യ എന്ന മോസ്‌കോയിലെ ഇന്ത്യന്‍ സമൂഹത്തിന്റെ കൂട്ടായ്മയിലും മോഡി പങ്കടുത്തു. മൂവായിരത്തോളം പേര്‍ മോഡിയുടെ പ്രസംഗം കേള്‍ക്കാന്‍ എത്തിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha