അദാനിയ്ക്ക് പണം ലഭ്യമാകുന്ന സ്രോതസുകളെക്കുറിച്ച് കൃത്യമായ അന്വേഷണം വേണം. ഓര്‍ഗനൈസ്ഡ് ക്രൈം ആന്റ് കറപ്ഷന്‍ റിപ്പോര്‍ട്ടിംഗ് പ്രൊജക്ടിന്റെ(ഒസിസിആര്‍പി) റിപ്പോര്‍ട്ട് പുറത്തുവന്നതിന് പിന്നാലെ അദാനി ഗ്രൂപ്പിനെതിരെ അന്വേഷണം ആവശ്യപ്പെട്ട് കോണ്‍ഗ്രസ് നേതാവ് രാഹുല്‍ ഗാന്ധി. ജി 20 യോഗത്തിന്റെ പശ്ചാത്തലത്തില്‍ ഗൗരവതരമായ ആരോപണങ്ങളാണ് ഉന്നയിക്കപ്പെട്ടതെന്നും പ്രധാനമന്ത്രി എന്ത് കൊണ്ട് അന്വേഷണം പ്രഖ്യാപിച്ചില്ല എന്നും അദ്ദേഹം ചോദിച്ചു. രാജ്യത്തിന്റെ പ്രതിച്ഛായയെ ബാധിക്കുന്ന പ്രശ്‌നമായതിനാല്‍ ജോയിന്റ് പാര്‍ലമെന്ററി കമ്മിറ്റിയെ അന്വേഷണത്തിനായി നിയോഗിക്കണമെന്നും കോണ്‍ഗ്രസ് എം പി ആവശ്യപ്പെട്ടു.

ജി 20 നേതാക്കള്‍ രാജ്യത്ത് എത്തുന്നതിന് മുന്‍പ് തന്നെ വിഷയത്തില്‍ വ്യക്തത വരുത്തേണ്ടത് പ്രധാനമന്ത്രിയുടെ ഉത്തരവാദിത്വമാണെന്ന് രാഹുല്‍ ഗാന്ധി പറഞ്ഞു. അദാനിയ്ക്ക് പണം ലഭ്യമാകുന്ന സ്രോതസുകളെക്കുറിച്ച് കൃത്യമായ അന്വേഷണം ആവശ്യപ്പെട്ടത് കൂടാതെ ചൈനീസ് പൗരനും അദാനിയും തമ്മിലുള്ള ബന്ധത്തെക്കുറിച്ചും രാഹുല്‍ ഗാന്ധി ആരോപണമുന്നയിച്ചു.

എന്ത് കൊണ്ടാണ് അദാനിയ്ക്ക് മാത്രമായി പ്രധാനമന്ത്രി സംരക്ഷണം നല്‍കുന്നത്?. വന്‍കിട കരാറുകളും രാജ്യത്തിന്റെ സ്വത്തുക്കളും ഒരാള്‍ക്ക് മാത്രമെങ്ങനെയാണ് ലഭിക്കുന്നത്. ഓഹരിയെ സ്വാധീനിക്കാന്‍ ഇത്രയും കോടികള്‍ എവിടെ നിന്നാണ് അദാനിയ്ക്ക് ലഭിച്ചത് രാഹുല്‍ ഗാന്ധി ചോദിച്ചു. തട്ടിപ്പിന് പിന്നിലെ സൂത്രധാരന്‍ അദാനി സഹോദരന്‍ വിനോദ് അദാനിയാണെന്നും രാഹുല്‍ ആരോപിച്ചു. നാസിര്‍ അലി ഷബാന്‍ അഹ്ലി, ചാങ് ചുങ് ലിംഗ് എന്ന ചൈനീസ് പൗരനും പങ്കുണ്ട്. രാഹുല്‍ ഗാന്ധി തുടര്‍ന്നു. വിഷയത്തില്‍ പ്രധാനമന്ത്രി പരിഭ്രാന്തനാണെന്നും ജി20 യോഗത്തിന് മുന്‍പ് ആരോപണങ്ങളില്‍ വ്യക്തത വരുത്തേണ്ടത് പ്രധാനമാണെന്നും അദ്ദേഹം കൂട്ടിച്ചേര്‍ത്തു.

അതേസമയം അദാനിയുടെ കുടുംബവുമായി ബന്ധമുള്ളവര്‍ മൗറീഷ്യസിലെ വ്യാജ കമ്പനികള്‍ വഴി അദാനിഗ്രൂപ്പിന്റെ വിവിധ കമ്പനികളില്‍ രഹസ്യ നിക്ഷേപം നടത്തിയെന്നാണ് ഒസിസിആര്‍പിയുടെ റിപ്പോര്‍ട്ടിലെ പ്രധാന ആരോപണം. ഓഹരി വില ഉയര്‍ത്താന്‍ വേണ്ടിയായിരുന്നു ഇതെന്നും ഇന്ത്യന്‍ സ്‌റ്റോക്ക് മാര്‍ക്കറ്റില്‍ വലിയ തട്ടിപ്പ് നടത്തിയെന്നും പറയുന്നുണ്ട്.