പി.എസ്.എല്‍.വി എക്‌സ് എല്‍ - 57 നാളെ ഇന്ത്യയുടെ ആദ്യ സൂര്യപര്യവേക്ഷണ പേടകം ആദിത്യ എല്‍- വണ്ണുമായി ശ്രീഹരിക്കോട്ടയിലെ വിക്ഷേപണ കേന്ദ്രത്തില്‍ നിന്ന് കുതിച്ചുയരും....സൂര്യനെ നിരീക്ഷിക്കാനായി ഏഴ് ഉപകരണങ്ങളാണ് ആദിത്യയിലുള്ളത്.

ഭൂമിയുടെ 800 കിലോമീറ്റര്‍ മേലെയുള്ള ഭ്രമണപഥത്തില്‍ ആദിത്യയെ എത്തിക്കുകയും അവിടെ നിന്ന് സൂര്യനു നേരെ 15 ലക്ഷം കിലോമീറ്റര്‍ അകലെയുള്ള ഒന്നാം ലെഗ്രാന്‍ജിയന്‍ പോയിന്റ് എന്ന ലക്ഷ്യത്തിലേക്ക് ആദിത്യ സ്വയം പ്രയാണം തുടങ്ങുകയും ചെയ്യും.

1500 കിലോ ഭാരമുള്ള പേടകം നാലു മാസത്തോളം യാത്ര ചെയ്ത് 2023 ഡിസംബറിലോ അടുത്തവര്‍ഷം ജനുവരിയിലോ ലക്ഷ്യസ്ഥാനത്തെത്തും. ലെഗ്രാന്‍ജിയന്‍ പോയിന്റിന്റെ ചുറ്റുമായുള്ള ഒരു ഭ്രമണപഥത്തിലാണ് ആദിത്യ എത്തേണ്ടത്. ഭൂമിയില്‍ നിന്ന് സൂര്യനിലേക്കുള്ള ദൂരത്തിന്റെ ഒരു ശതമാനം മാത്രമാണിത്. ഭൂമിയില്‍ നിന്ന് ചന്ദ്രനിലേക്കുള്ള ദൂരത്തിന്റെ നാല് മടങ്ങ് വരും.

ആദിത്യ അവിടെ ഒരു പ്രത്യേക ഭ്രമണപഥത്തില്‍ സൂര്യനെ ഒരു കൃത്രിമഗ്രഹമായി ചുറ്റിക്കൊണ്ടിരിക്കും.ഇന്ത്യയുടെ ഒബ്സര്‍വേറ്ററി ഭൂമിയെപ്പോലെ ആദിത്യയും 365 ദിവസം കൊണ്ടാകും സൂര്യനെ കറങ്ങി വരിക. ഇതാണ് എല്‍-1 പോയിന്റില്‍ എത്തുന്നതിന്റെ നേട്ടം. ആദിത്യ ഒരിക്കലും ഭൂമിയുടെയോ ചന്ദ്രന്റെയോ നിഴലിലേക്ക് പോവില്ല.

വര്‍ഷം മുഴുവന്‍ രാപകലില്ലാതെ സൂര്യനെ നിരീക്ഷിക്കാനാകും. ഭ്രമണപഥത്തില്‍ നിലനിറുത്താന്‍ ഇടയ്ക്കൊക്കെ കുറച്ച് ഇന്ധനം ഉപയോഗിക്കേണ്ടിവരും ഉപകരണങ്ങള്‍ പ്രവര്‍ത്തിപ്പിക്കാനും വാര്‍ത്താവിനിമയം നടത്താനുമുള്ള വൈദ്യുതി സോളാര്‍ പാനലുകള്‍ നല്‍കുകയും ചെയ്യും.