രാജ്യത്ത് അസഹിഷ്ണുതയില്ലെന്ന് ഇന്ത്യന്‍ പൗരത്വം സ്വീകരിച്ച പാക് ഗായകന്‍ അഡ്‌നാന്‍ സമി. രാജ്യത്തെങ്ങും അസഹിഷ്ണുത വ്യാപിക്കുകയാണെന്ന ബോളിവുഡ് സൂപ്പര്‍ താരം ഷാരൂഖ് ഖാന്റെ പ്രസ്താവനയോടു പ്രതികരിക്കുകയായിരുന്നു അദ്ദേഹം. ഷാരൂഖിന്റേത് വ്യക്തിപരമായ അഭിപ്രായമാണ്. അനുഭവത്തിന്റെ അടിസ്ഥാനത്തിലാകും അദ്ദേഹം ഇത്തരമൊരു അഭിപ്രായപ്രകടനം നടത്തിയതെന്നും അദ്ദേഹം പറഞ്ഞു.
രാജ്യത്ത് അസഹിഷ്ണുത നിലനിന്നിരുന്നെങ്കില്‍ താന്‍ ഇന്ത്യന്‍ പൗരത്വം സ്വീകരിക്കില്ലായിരുന്നു. തനിക്കൊരിക്കലും അത്തരത്തിലൊരു അനുഭവം ഉണ്ടായിട്ടില്ലെന്നും സമി പറഞ്ഞു. കേന്ദ്ര ആഭ്യന്തര സഹമന്ത്രി കിരണ്‍ റിജിജുവില്‍നിന്നു പൗരത്വ സര്‍ട്ടിഫിക്കറ്റ് സ്വീകരിച്ചുകൊണ്ടാണു സമി ഇക്കാര്യം പറഞ്ഞത്.
ഇതൊരു പുതുജന്മമാണ്. പുതിയ തുടക്കം. പുതിയ രാജ്യം ജയ്ഹിന്ദ്-സമി ട്വിറ്ററില്‍ കുറിച്ചു. ഇന്ത്യന്‍ പൗരത്വം അനുവദിച്ചതിനു പ്രധാനമന്ത്രി നരേന്ദ്ര മോദിയോടും കേന്ദ്ര ആഭ്യന്തരമന്ത്രി രാജ്‌നാഥ് സിംഗിനും അദ്ദേഹം ട്വിറ്ററില്‍ നന്ദി രേഖപ്പെടുത്തി. നാല്പത്താറുകാരനായ ഗായകന്‍ ഏതാനും വര്‍ഷങ്ങളായി ഇന്ത്യയിലാണു താമസിക്കുന്നത്. കഴിഞ്ഞ മേയ് 26നാണു പൗരത്വം അനുവദിക്കുന്നതിനായി സമി അപേക്ഷ സമര്‍പ്പിച്ചത്.
പാക്കിസ്ഥാനിലെ ലാഹോറില്‍ ജനിച്ച സമി 2001 മാര്‍ച്ച് 13നാണ് ഇന്ത്യയില്‍ താമസമാരംഭിച്ചത്. ഇസ്‌ലാമാബാദിലെ ഇന്ത്യന്‍ ഹൈക്കമ്മീഷന്‍ അനുവദിച്ച ഒരുവര്‍ഷത്തെ കാലാവധിയുള്ള സന്ദര്‍ശകവീസയിലായിരുന്നു ഇത്. അതിനുശേഷം കാലാകാലങ്ങളായി ഇന്ത്യ വീസ പുതുക്കിനല്‍കുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha