ഉയര്‍ന്ന ജാതിയില്‍പ്പെട്ട വിദ്യാര്‍ത്ഥികള്‍ കഴിക്കുന്ന പാത്രത്തില്‍ ഭക്ഷണം കഴിച്ചുവെന്ന് ആരോപിച്ച് ദളിത് വിദ്യാര്‍ത്ഥിയെ അധ്യാപകന്‍ ക്രൂരമായി മര്‍ദിച്ചതായി പരാതി. ഗാന്ധിജയന്തിയുടെ തലേദിവസമാണ് സംഭവമുണ്ടായത്. എന്നാല്‍ ഇപ്പോഴാണ് സംഭവം പുറം ലോകമറിയുന്നത്. ജോധ്പൂരിലെ ഒരു സര്‍ക്കാര്‍ സ്‌കൂളിലാണ് സംഭവമുണ്ടാകുന്നത്.
ഉയര്‍ന്ന ജാതിയില്‍പ്പെട്ട വിദ്യാര്‍ഥികള്‍ക്ക് വേണ്ടി വച്ചിരുന്ന പാത്രം താന്‍ അറിയാതെ എടുക്കുകയായിരുന്നു എന്നാണ് വിദ്യാര്‍ഥി പറയുന്നത്. ഇത് കണ്ടുവന്ന അധ്യാപകന്‍ തന്നെ ക്രൂരമായി മര്‍ദ്ദിക്കുകയായിരുന്നു. തലയില്‍ അടിയേറ്റ് താന്‍ കുഴഞ്ഞുവീഴുകയും ഛര്‍ദ്ദിക്കുകയും ചെയ്തു.സ്‌കൂളില്‍ ഓരോ ജാതിയില്‍പ്പെട്ട വിദ്യാര്‍ത്ഥികള്‍ക്കും ഭക്ഷണം കഴിക്കാന്‍ ഓരോ നിറത്തിലുള്ള പാത്രമാണുള്ളതെന്ന് ദളിത് അധികാര്‍ നെറ്റ് വര്‍ക്ക് തങ്ങളുടെ റിപ്പോര്‍ട്ടില്‍ പറയുന്നു.
ദളിത് വിദ്യാര്‍ഥികള്‍ക്ക് ചുവന്ന നിറമുള്ള പാത്രങ്ങളും ഉയര്‍ന്ന ജാതിക്കാരായ കുട്ടികള്‍ക്ക് പച്ച നിറമുള്ള പാത്രങ്ങളുമായിരുന്നു ഉണ്ടായിരുന്നത്. അധ്യാപകന്റെ മര്‍ദനമേറ്റ് അവശനായ കുട്ടിയെ ജോധ്പൂരിലെ ഉമൈദ് ആശുപത്രിയിലാണ് ചികിത്സിച്ചത്. 6 ദിവസം കുട്ടിക്ക് ആശുപത്രിയില്‍ കഴിയേണ്ടിവന്നു. ദളിത് അധികാര്‍ നെറ്റ് വര്‍ക്ക് ജോധ്പൂരില്‍ സംഘടിപ്പിച്ച പൊതുപരിപാടിയില്‍ വെച്ചാണ് ഈ സംഭവം പുറത്തറിഞ്ഞത്.
സ്‌കൂളിലെ പാചകക്കാരനാണ് കുട്ടി പാത്രം മാറി എടുക്കുന്നത് ആദ്യം കണ്ടതെന്നും ഇയാള്‍ അധ്യാപകനോട് പരാതിപ്പെടുകയായിരുന്നു എന്നുമാണ് റിപ്പോര്‍ട്ടുകള്‍. ഇക്കാര്യം ചോദിക്കാനായി ചെന്ന തന്നെയും അധ്യാപകന്‍ മര്‍ദ്ദിച്ചു എന്നാണ് കുട്ടിയുടെ പിതാവ് പറയുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha