ഒന്നര വര്‍ഷത്തിനിടെ 33ഓളം രാജ്യങ്ങള്‍ സന്ദര്‍ശിച്ച പ്രധാനമന്ത്രി നരേന്ദ്ര മോഡിയുടെ വിദേശയാത്രകള്‍ ഏറെ വിമര്‍ശം ക്ഷണിച്ചു വരുത്തിയിരുന്നു. എന്നാല്‍ യാത്രാച്ചെലവിനായി മോഡി ഇതുവരെ ചെലവഴിച്ചത് മുന്‍ പ്രധാനമന്ത്രി മന്‍മോഹന്‍ സിങ് ഒരുവര്‍ഷം കൊണ്ട് ചെലവിട്ട തുകയെക്കാള്‍ കുറവാണ്.
പ്രധാനമന്ത്രിയുടെയൂം മറ്റ് മന്ത്രിമാരുടെയും വിദേശയാത്രകള്‍ക്കായി ബജറ്റില്‍ അനുവദിച്ചിരുന്ന തുകയെക്കാള്‍ രണ്ടുകോടി രൂപ കുറച്ചാണ് മോഡിയും മന്ത്രിമാരും ചെലവിട്ടത്. 2014-15ലെ കണക്കുകള്‍ പ്രകാരം 316.76 കോടി രൂപയാണ് ബജറ്റില്‍ അനുവദിച്ചിരുന്നത്. ചെലവിട്ടതാകട്ടെ, 314.76 കോടി രൂപയും. പാര്‍ലമെന്റിന്റെ ശീതകാല സമ്മേളനത്തില്‍ സമര്‍പ്പിച്ച കണക്കുകളിലാണ് ഈ വിവരമുള്ളത്.
തന്റെയും മന്ത്രിമാരുടെയും ശമ്പളത്തിലും മറ്റ് അലവന്‍സുകളിലും വരുത്തിയ കുറവാണ് ചെലവ് പരിധികടക്കാതെ പിടിച്ചുനിര്‍ത്താന്‍ മോഡിയെ സഹായിച്ചത്. 2014-15 സാമ്പത്തിക വര്‍ഷത്തില്‍ 17 ശതമാനം മുതല്‍ 24 ശതമാനം വരെ ഈയിനത്തില്‍ കുറവുണ്ടായി. ശമ്പളത്തിനും മറ്റ് അലവന്‍സുകള്‍ക്കുമായി 4.40 കോടി രൂപയാണ് ചെലവിടേണ്ടിരുന്നത്. എന്നാല്‍ 3.63 കോടി രൂപയാണ് ചെലവാക്കിയത്. മന്ത്രിമാര്‍ക്കുള്ള അലവന്‍സ് 9.20 കോടി രൂപയില്‍നിന്ന് 7.20 കോടി രൂപയായും കുറഞ്ഞു.
മന്ത്രിമാരുടെ എണ്ണം കുറച്ചതുകൊണ്ടും വിദേശ യാത്രകളിലെ അനാവശ്യ ചെലവുകള്‍ ഒഴിവാക്കിയുമാണ് ചെലവ് ചുരുക്കിയതെന്ന് സര്‍ക്കാരിന്റെ വിശദീകരണത്തില്‍ കാണുന്നു. കാബിനറ്റ് മന്ത്രിമാര്‍, സഹമന്ത്രിമാര്‍, മുന്‍ പ്രധാനമന്ത്രിമാര്‍ എന്നിവരുടെ യാത്രാച്ചെലവും പ്രധാനമന്ത്രി, പ്രസിഡന്റ്, വൈസ് പ്രസിഡന്റ് എന്നിവര്‍ ഉപയോഗിക്കുന്ന വിമാനത്തിന്റെ അറ്റകുറ്റപ്പണികളും കണക്കാക്കിയാണ് ചെലവ് നിശ്ചയിച്ചിട്ടുള്ളത്.
മോഡിയും മന്ത്രിസഭാംഗങ്ങളും ചേര്‍ന്ന് ആദ്യവര്‍ഷം ചെലവിട്ടത് തൊട്ടുമുമ്പത്തെ മന്മോഹന്‍ സിങ് സര്‍ക്കാര്‍ അവസാന വര്‍ഷം ചെലവാക്കിയ തുകയെക്കാള്‍ വളരെക്കുറവായിരുന്നു. 56 കോടി രൂപയാണ് മോഡി സര്‍ക്കാര്‍ ആദ്യവര്‍ഷം ചെലവിട്ടത്. എന്നാല്‍, 2013-14 സര്‍ക്കാര്‍ അവസാന വര്‍ഷം ചെലവാക്കിയത് 258 കോടി രൂപയും. 2015-16 സാമ്പത്തിക വര്‍ഷം കണക്കാക്കുന്ന ചെലവ് 269 കോടി രൂപയാണ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha