ഇഷ്ടമില്ലാത്ത വാക്കിന് ബീപ് ശബ്ദവും ചുംബനത്തിന് നിരോധനവുമേര്‍പ്പെടുത്തി വിവാദം ക്ഷണിച്ചുവരുത്തിയ ഫിലിം സെന്‍സര്‍ ബോര്‍ഡില്‍ കാതലായ മാറ്റങ്ങള്‍ വരുത്താന്‍ കേന്ദ്രം. 2014-ലെ പൊതുതിരഞ്ഞെടുപ്പില്‍ നരേന്ദ്രമോദിയ്ക്കായി ഡോക്യുമെന്ററികള്‍ സംവിധാനം ചെയ്ത പഹ്‌ലാജ് നിഹ്‌ലാനിയെ തലവനാക്കിയ ശേഷമുള്ള പ്രശ്‌നങ്ങളെ തുടര്‍ന്നാണ് പുതിയ നടപടി.

ബോര്‍ഡിന്റെ നവീകരണവും ഛായാഗ്രഹണ ചട്ടത്തില്‍ മാറ്റവും ലക്ഷ്യമിട്ട് ഫിലിം സെന്‍സര്‍ ബോര്‍ഡ് വിഖ്യാത സംവിധായകന്‍ ശ്യാം ബെനഗലിന്റെ നേതൃത്വത്തില്‍ കമ്മിറ്റി രൂപീകരിച്ചു. എന്നാല്‍, നിഹ്‌ലാനിയുടെ കാര്യത്തിലൊന്നും ചെയ്യാന്‍ കമ്മിറ്റിയ്ക്ക് കഴിയില്ലെന്ന് ബെനഗല്‍ പ്രതികരിച്ചു. രണ്ട് മാസത്തിനുള്ളില്‍ നിര്‍ദ്ദേശങ്ങള്‍ സമര്‍പ്പിക്കണമെന്നാണ് കമ്മിറ്റിയോട് അറിയിച്ചിട്ടുള്ളത്.

സെന്‍സറിംഗ് ചട്ടങ്ങളില്‍ കാലാനുസൃത മാറ്റങ്ങള്‍ നടത്താറുണ്ട്. മാറിക്കൊണ്ടേ ഇരിക്കുന്ന സമൂഹത്തിന്റെ കാഴ്ചയും കാഴ്ചപ്പാടും ദിനംപ്രതി മാറും. സാമൂഹ്യ കലാ ആവിഷ്‌കാരമായി സിനിമയെ കാണാനാകണമെന്നാണ് താന്‍ പ്രതീക്ഷിക്കുന്നതെന്നും ബെനഗല്‍ പറഞ്ഞു. നടന്‍ അനുപം ഖേര്‍, സെന്‍സര്‍ ബോര്‍ഡംഗം നന്ദിനി സര്‍ദേശായി എന്നിവരും ബെനഗലിന്റെ നിയമനത്തെ സ്വാഗതം ചെയ്തു.

സിനിമാ സെന്‍സറിംഗിന് എതിരായ അദ്ദേഹത്തിന്റെ നിലപാടുകള്‍ സിനിമയ്ക്ക് ഗുണം ചെയ്യുമെന്ന് നന്ദിനി അഭിപ്രായപ്പെട്ടു. സെന്‍സര്‍ ചെയ്യാത്തത് എന്ന വിഭാഗത്തില്‍ സിനിമകള്‍ പുറത്തിറങ്ങണമെന്നാണ് തീരുമാനത്തെ സ്വാഗതം ചെയ്ത മറ്റൊരു ബോര്‍ഡംഗം അശോക് പണ്ഡിറ്റിന്റെ അഭിപ്രായം. രാകേഷ് ഓംപ്രകാശ് മെഹ്‌റ, പീയൂഷ് പാണ്ഡെ, ഭാവനാ സൊമായാ, നിനാ ലത് ഗുപ്ത എന്നിവരാണ് കമ്മിറ്റിയിലെ മറ്റംഗങ്ങള്‍.

കാണാതെ തന്നെ പുതിയ ജെയിംസ്‌ബോണ്ട് സിനിമ സ്‌പെക്ടറിലെ ചുംബനരംഗം വെട്ടിമുറിച്ചത് വരെയെത്തുന്നതാണ് പുതിയ തലവനായ പഹ്‌ലാജ് നിഹ്‌ലാനിയുടെ സ്വേച്ഛാധിപത്യ തീരുമാനങ്ങള്‍. ഇക്കൊല്ലമാദ്യം ഫിഫ്റ്റി ഷെയ്ഡ്‌സ് ഓഫ് ഗ്രേ എന്ന സിനിമയുടെ പ്രദര്‍ശനം വിലക്കുകയും ചെയ്തു. അസഭ്യ ചുവയുണ്ടെന്ന് സ്വയം തോന്നിയ 13 ഇംഗ്ലീഷ് വാക്കുകളും 15 ഹിന്ദിവാക്കുകളും നീക്കുകയോ പകരം ബീപ് ശബ്ദം ഇടുകയോ വേണമെന്നതും \'ഭരണപരിഷ്‌കാര\'ത്തില്‍പെടും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha