പത്താന്‍കോട്ട് ഭീകരാക്രമണത്തിന് മുമ്പ് ഭീകരരില്‍ ഒരാള്‍ പാകിസ്താനിലുള്ള അമ്മയെ ഫോണ്‍ വിളിച്ചിരുന്നതായി രഹസ്യാന്വേഷണ വിഭാഗം കണ്ടെത്തി. വെള്ളിയാഴ്ച പുലര്‍ച്ചെ 12.35ന് ശേഷം നാല് കോളുകളാണ് ഭീകരര്‍ പാകിസ്താനിലേക്ക് വിളിച്ചതെന്നും റിപ്പോര്‍ട്ടുകളില്‍ പറയുന്നു.
പത്താന്‍കോട്ട് വ്യോമസേനാ കേന്ദ്രത്തില്‍ ആക്രമണം നടത്തുന്നതിനെ കുറിച്ച് ഫോണിലൂടെ ഭീകരരില്‍ ഒരാള്‍ മാതാവുമായി സംസാരിച്ചിരുന്നു. മരിക്കുന്നതിന് മുമ്പ് ആഹാരം കഴിക്കൂ എന്നായിരുന്നു ഫോണ്‍കോളിന് മാതാവിന്റെ മറുപടി. ഏഴുപേരാണ് ആക്രമണത്തിന് നേതൃത്വം നല്‍കിയതെന്നും ഫോണ്‍ കോളുകളില്‍നിന്ന് വ്യക്തമായതായി രഹസ്യാന്വേഷണ വിഭാഗം അവകാശപ്പെടുന്നു.
മുള്‍ട്ടാനി, പഞ്ചാബി ഭാഷകളിലായിരുന്നു ഫോണ്‍ സംഭാഷണങ്ങള്‍. മറ്റ് മൂന്ന് ഫോണ്‍ കോളുകളില്‍ നിന്നും ഭീകരര്‍ക്ക് വ്യോമകേന്ദ്രത്തില്‍ ആക്രമണം നടത്തേണ്ടതിന്റെ വ്യക്തമായ നിര്‍ദേശങ്ങള്‍ ലഭിച്ചു. ഹെലികോപ്റ്ററുകള്‍, വിമാനങ്ങള്‍ തുടങ്ങിയവ തകര്‍ക്കാനും താവളത്തിന് പരമാവധി നാശനഷ്ടങ്ങള്‍ വരുത്താനുമായിരുന്നു നിര്‍ദേശങ്ങളുടെ ഉള്ളടക്കം. ഭീകരര്‍ തട്ടിയെടുത്ത പോലീസ് ഉദ്യോഗസ്ഥന്റെ ഫോണും സംഭാഷണങ്ങള്‍ക്കായി ഉപയോഗിച്ചിരുന്നതായി രഹസ്യാന്വേഷണ വിഭാഗം വ്യക്തമാക്കി.
ആക്രമണത്തില്‍ പങ്കെടുത്ത എല്ലാ ഭീകരരും പാകിസ്താനിലെ ബഹവാല്‍പൂര്‍, മുള്‍ട്ടാന്‍ സ്വദേശികളാണെന്ന റിപ്പോര്‍ട്ടുകളുമുണ്ട്. ജയ്ഷ്ഇ മുഹമ്മദ് ഭീകരര്‍ പാക് രഹസ്യാന്വേഷണ വിഭാഗത്തിന്റെ(ഐ.എസ്.ഐ) അറിവോടെയാണ് ആക്രമണം നടത്തിയതെന്ന റിപ്പോര്‍ട്ടുകളും പുറത്തുവരുന്നുണ്ട്. ആക്രമണത്തില്‍ നാല് ഭീകരരും നാല് സുരക്ഷാ ഉദ്യോഗസ്ഥരും കൊല്ലപ്പെട്ടതായി റിപ്പോര്‍ട്ടുകളുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha