കമ്യൂണിസ്റ്റ് പാര്‍ട്ടികളുടെ ഏകീകരണം സ്വപ്‌നംകണ്ട നേതാവിനെയാണ് എ.ബി.ബര്‍ദാന്റെ മരണത്തോടെ ഇന്ത്യന്‍ കമ്യൂണിസ്റ്റ് പ്രസ്ഥാനങ്ങള്‍ക്ക് നഷ്ടമായിരിക്കുന്നത്. പ്രമുഖ പാര്‍ട്ടികളായ സിപിഎമ്മും സിപിഐയും മാത്രമല്ല എല്ലാ ഗ്രൂപ്പുകളും ഏകീകരിച്ച് പ്രവര്‍ത്തിക്കണമെന്നായിരുന്നു അദ്ദേഹത്തിന്റെ സ്വപ്നം. ഇതിനായി അദ്ദേഹം പ്രവര്‍ത്തിച്ചെങ്കിലും തന്റെ ജീവിതകാലത്തില്‍ കമ്യൂണിസ്റ്റ് പ്രസ്ഥാനങ്ങളുടെ ഏകീകരണം കാണാന്‍ അദ്ദേഹത്തിനായില്ല.
മഹാരാഷ്ട്രയിലെ മില്‍ തൊഴിലാളികളുടെ ഇടയില്‍ പ്രവര്‍ത്തിച്ച് രാഷ്ട്രീയക്കാരനായ നേതാവായിരുന്നു അര്‍ത്ഥേന്ദു ഭൂഷണ്‍ ബര്‍ദന്‍. പാര്‍ലമെന്ററി വ്യാമോഹം തൊട്ടുതീണ്ടിയിട്ടില്ലാത്ത ആദര്‍ശ ശുദ്ധത അദ്ദേഹത്തെ മറ്റുനേതാക്കളില്‍ നിന്ന് വ്യത്യസ്തനാക്കി. 90 കളിലാണ് ഡല്‍ഹിയിലേക്ക് ബര്‍ദന്‍ എത്തുന്നത്. ഡല്‍ഹിയിലെ പാര്‍ട്ടി ആസ്ഥാനത്തെ കൊച്ചുമുറിയായിരുന്നു അദ്ദേഹത്തിന്റെ താവളം. മരണംവരെ പാര്‍ട്ടിക്കാര്യങ്ങളും എഴുത്തും വായനയുമായി അവിടെ അദ്ദേഹം കഴിഞ്ഞുകൂടി. ജീവിതത്തില്‍ ഒരിക്കല്‍പ്പോലും പിറന്നാള്‍ ആഘോഷിച്ചിട്ടാല്ലത്ത ബര്‍ദന്‍ ഓര്‍മ്മക്കുറുപ്പുകളോ ആത്മകഥകളോ എഴുതിയിട്ടില്ല. അതെല്ലാം, തന്നെ പുകഴ്ത്തി ഏര്‍പ്പാടുകളാണെന്നാണ് ബര്‍ദാന്റെ പക്ഷം. സ്വയം ന്യായീകരിക്കാനുള്ള ഏര്‍പ്പാടുകൂടിയാണ് ആത്മകഥകളെന്നും അദ്ദേഹം പറയും.
ജാതിവ്യവസ്ഥയെ മനസിലാക്കുന്നതില്‍ ഇന്ത്യന്‍ കമ്യൂണിസ്റ്റ് പ്രസ്ഥാനങ്ങള്‍ പരാജയപ്പെട്ടുവെന്ന് പറയാന്‍ ധൈര്യം കാണിച്ച ചുരുക്കം നേതാക്കളില്‍ ഒരാള്‍കൂടിയായിരുന്നു അദ്ദേഹം. ജാതിവ്യവസ്ഥയെ സംബോധന ചെയ്യുന്നതില്‍ കമ്യൂണിസ്റ്റുകള്‍ക്ക് കാതലായ പാളിച്ചകള്‍ സംഭവിച്ചതായും അദ്ദേഹം ഉറക്കെ പറഞ്ഞിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha