പത്താന്‍കോട്ട് വ്യോമതാവളത്തില്‍ ഒളിച്ചിരുന്ന രണ്ടു ഭീകരരെയും വധിച്ചതായി റിപ്പോര്‍ട്ട്. ഒരു ഭീകരന്‍ ചാവേറായി സ്വയം പൊട്ടിത്തെറിച്ചപ്പോള്‍ അടുത്തയാളെ സൈന്യം വെടിവച്ചുകൊലപ്പെടുത്തുകയായിരുന്നെന്നാണ് സൂചന. ഇതില്‍ ഒരാളുടെ മൃതദേഹം ചിന്നിച്ചിതറിയ നിലയില്‍ കണ്ടെത്തിയിട്ടുണ്്ട്. വ്യോമതാവളത്തിന് ഭീകരാക്രമണ മുന്നറിയിപ്പ് നല്‍കുന്നതിനുമുമ്പ് തന്നെ ഭീകരര്‍ പത്താന്‍കോട്ട് വ്യോമതാവളത്തില്‍ കടന്നതായാണ് സൂചന. രണ്ടു സംഘങ്ങളായാണ് ഭീകരര്‍ ആക്രമണം നടത്തിയതെന്ന് ഉന്നത സൈനിക വൃത്തങ്ങള്‍ അറിയിച്ചു. റിപ്പോര്‍ട്ടുകള്‍ ശരിയായാല്‍ ഏറ്റുമുട്ടലില്‍ കൊല്ലപ്പെട്ട ഭീകരരുടെ എണ്ണം ഇതോടെ ആറായി.
അതേസമയം, ഭീകരാക്രമണത്തിന്റെ ഉത്തരവാദിത്വം യുണൈറ്റഡ് ജിഹാദ് കൗണ്‍സില്‍ ഏറ്റെടുത്തു. കാഷ്മീരിലും പാക്കിസ്ഥാനിലും പ്രവര്‍ത്തിക്കുന്ന 13 ഭീകരസംഘടനകളുടെ കൂട്ടായ്മയാണ് ഇത്. ഹൈവേ സ്‌ക്വാഡ് എന്ന ചാവേര്‍ സംഘമാണ് ആക്രമണം നടത്തിയതെന്നു സൂചന.
നേരത്തെ, വ്യോമസേന താവളത്തില്‍ രാവിലെ വീണ്ടും സ്‌ഫോടനം നടന്നതായി റിപ്പോര്‍ട്ടുണ്ടായിരുന്നു. വ്യോമസേന ഉദ്യോഗസ്ഥര്‍ താമസിക്കുന്ന കെട്ടിടത്തിലാണു ഭീകരര്‍ ഒളിച്ചിരിക്കുന്നത്. വ്യോമസേന, കരസേന, കേന്ദ്ര സായുധ സേന, പഞ്ചാബ് പോലീസ് എന്നീ വിഭാഗങ്ങളുടെ നേതൃത്വത്തിലാണ് ഓപ്പറേഷന്‍ നടക്കുന്നത്.
അതേസമയം, ഭീകരരെ കീഴടക്കാനുള്ള ഏറ്റുമുട്ടല്‍ അവസാനഘട്ടത്തിലാണെന്ന് എന്‍എസ്ജി മേജര്‍ ജനറല്‍ ദുഷ്യന്ത് സിംഗ് നേരത്തെ അറിയിച്ചിരുന്നു. നാലു ഭീകരരെ വധിച്ചു. മറ്റു രണ്ടു ഭീകരരെ കണ്ടെത്താനുള്ള തെരച്ചില്‍ തുടരുകയാണ്. എന്‍എസ്ജിയും ഗരുഡ് സേനയും സംയുക്തമായാണ് ഏറ്റുമുട്ടല്‍ നടത്തുന്നത്. എല്ലാവിധ സുരക്ഷയും ഉറപ്പാക്കിയാണ് നടപടി. വ്യോമസേന താവളത്തിലെ വിമാനങ്ങളും ആയുധങ്ങളും തകര്‍ക്കുകയായിരുന്നു ഭീകരരുടെ ഉദ്ദേശ്യം. എന്നാല്‍ ആ നീക്കത്തെ പരാജയപ്പെടുത്താനായെന്നും ജനറല്‍ ദുഷ്യന്ത് സിംഗ് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക