പത്താന്‍കോട്ട് വ്യോമസേനാ താവളത്തില്‍ ആക്രമണം നടത്തിയ ഭീകരര്‍ പ്രകടിപ്പിച്ച പോരാട്ടവീര്യവും തന്ത്രങ്ങളും പ്രൊഫഷണല്‍ സൈനികരെ അതിശയിക്കുന്ന തരത്തിലെന്ന് ഇന്ത്യന്‍ സുരക്ഷാ സേന. 26/11 ലെ മുംബൈ ആക്രമണം നടത്തിയവര്‍ക്ക് ലഭിച്ചതിനേക്കാള്‍ മികച്ച പരിശീലനമാണ് പത്താന്‍കോട്ടില്‍ ആക്രമണം നടത്താന്‍ എത്തിയവര്‍ക്ക് ലഭിച്ചതെന്നാണ് സുരക്ഷാ വിഭാഗം നല്‍കുന്ന സൂചന. ഇതോടെ, ആക്രമണവുമായി ബന്ധപ്പെട്ട് നിലവില്‍ സംശയത്തിന്റെ നിഴലിലുള്ള പാക്കിസ്ഥാന്‍ സൈന്യത്തിന്റെ പങ്ക് കൂടുതല്‍ വ്യക്തമാവുകയാണ്.
വലിയ അളവിലുള്ള സ്‌ഫോടകവസ്തുക്കളും റൈഫിളുകളും റോക്കറ്റ് ലോഞ്ചറുകളും ആക്രമണം നടന്ന സ്ഥലത്തുനിന്ന് കണ്ടെത്തിയിട്ടുണ്ട്. പ്രൊഫണല്‍ പോരാളികളുടേതിന് സമാനമായ നീക്കങ്ങളാണ് ആക്രമണം നടത്തിയ ഭീകരരുടേതെന്നാണ് ഇന്ത്യന്‍ സുരക്ഷാ ഉദ്യോഗസ്ഥരുടെ പ്രാഥമിക വിലയിരുത്തല്‍. ജാഗ്രത പുലര്‍ത്തുന്നതില്‍ സൈനികര്‍ അയവു വരുത്തുന്ന വെളുപ്പാന്‍ കാലത്ത്, പ്രത്യേകിച്ച് പുലര്‍ച്ചെ മൂന്ന് മണിയോടെ ആക്രമണം നടത്തിയതും, ആയുധങ്ങള്‍ കരുതിവച്ചുകൊണ്ടുള്ള ആക്രമണവും കൃത്യമായ പരിശീലനത്തിന്റെ സൂചനയാണെന്ന് വിദഗ്ധര്‍ ചൂണ്ടിക്കാട്ടുന്നു.

മാത്രമല്ല, ഭീകരരെല്ലാം കൊല്ലപ്പെട്ടുവെന്ന പ്രതീതിയുണര്‍ത്തി ഏറെ സമയത്തേക്ക് നിശബ്ദത പാലിച്ചതിനുശേഷം പൂര്‍വാധികം ശക്തിയോടെ തിരിച്ചടിക്കുന്ന തരത്തിലുള്ള തന്ത്രങ്ങളും ഭീകരര്‍ പ്രയോഗിച്ചിരുന്നു. തന്‍മൂലം, സൈനിക നടപടി അവസാനിച്ചുവെന്ന് കാട്ടി കേന്ദ്ര ആഭ്യന്തരമന്ത്രി പോലും ട്വീറ്റ് ചെയ്തിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha