ഹവീല്‍ദാര്‍ ജഗദീശ് ചന്ദ് ചരിത്രത്താളുകളിലേക്ക്. പത്താന്‍കോട്ട് വ്യോമസേന താവളത്തില്‍ കടന്ന ഭീകരനെ എതിരിട്ട ഹവീല്‍ദാര്‍ ജഗദീശ് ചന്ദിന് ജീവന്‍ നഷ്ടമായത് ധീരമായ ചെറുത്തു നില്‍പ്പിനു ശേഷമാണ്. ഡിഫന്‍സ് സെക്യൂരിറ്റി കോര്‍പ്‌സിന്റെ (ഡിഎസ്‌സി) പത്താന്‍കോട്ടിലെ പാചകകാരന്‍ ആയിരുന്ന ജഗദീശ് ഭീകരരില്‍ നിന്നും തോക്ക് തട്ടിയെടുത്ത് ഒരു ഭീകരനെ വധിച്ച ശേഷമാണ് മരണത്തിന് കീഴടങ്ങിയത്. 
പുലര്‍ച്ചെ മൂന്നു മണിയോടെ ഭീകരര്‍ ആക്രമണം നടത്തുമ്പോള്‍ അടുക്കളയിലായിരുന്നു ജഗദീശ്. ആക്രമണം ശക്തമായതോടെ ജഗദീശും പോരാട്ടത്തിനിറങ്ങി. ആയുധം ഇല്ലാതിരുന്നിട്ടും ഭീകരരുമായി ഏറ്റുമുട്ടാന്‍ മുന്നിട്ടറങ്ങി. ഭീകരരില്‍ ഒരാളുടെ കയ്യില്‍ നിന്നും തോക്ക് തട്ടിയെടുത്തായിരുന്നു ജഗദീശിന്റെ പ്രത്യാക്രമണം. ഒടുവില്‍ ഭീകരന്റെ വെടിയേറ്റ് അദ്ദേഹം വീരമൃത്യു വരിച്ചു. 
പത്താന്‍കോട്ടിലെത്തിയ പ്രതിരോധ മന്ത്രി മനോഹര്‍ പരീക്കറും ജഗദീശിന്റെ ധീരതയെ ഓര്‍ത്തു. ഭീകരരുമായി നേരിട്ട് ഏറ്റുമുട്ടി കൊല്ലപ്പെട്ടവരില്‍ ഒരാള്‍ അദ്ദേഹമാണെന്ന് പരീക്കര്‍ പറഞ്ഞു. ആക്രമണത്തില്‍ വീരമൃത്യുവരിച്ച സൈനികരുടെ കുടുംബത്തിന് യുദ്ധത്തില്‍ മരിച്ചവരുടെ ആനുകൂല്യങ്ങള്‍ നല്‍കുമെന്നും മന്ത്രി അറിയിച്ചു.
ഹിമാചല്‍ പ്രദേശിലെ ചമ്പയില്‍ നിന്നുള്ള സൈനികനാണ് ഹവീല്‍ദാര്‍ ജഗദീഷ് ചന്ദ്. ആക്രമണത്തിന് ഒരു ദിവസം മുന്‍പാണു 10 ദിവസത്തെ അവധി കഴിഞ്ഞ് ഹവീല്‍ദാര്‍ തിരികെ എത്തിയത്. ഭാര്യയും രണ്ട് പെണ്‍മക്കളും ഒരു മകനും അടങ്ങിയതാണു ഹവീല്‍ദാര്‍ ജഗദീഷ് ചന്ദിന്റെ കുടുംബം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha