ജമ്മു കശ്മീര്‍ മുഖ്യമന്ത്രി മുഫ്തി മുഹമ്മദ് സയീദിന്റെ വിയോഗത്തില്‍ രാഷ്ട്രപതി പ്രണബ് മുഖര്‍ജിയും പ്രധാനമന്ത്രി നരേന്ദ്ര മോഡിയും മുന്‍ മുഖ്യമന്ത്രി ഒമര്‍ അബ്ദുള്ളയും അനുശോചിച്ചു. അനുശോചന സന്ദേശത്തില്‍ ജമ്മു കശ്മീരിനും രാജ്യത്തിനും മുഫ്തി മുഹമ്മദ് നല്‍കിയ സംഭാവനകള്‍ എന്നും സ്മരിക്കപ്പെടുമെന്ന് രാഷ്ട്രപതി പറഞ്ഞു. മുഫ്തിയുടെ മരണം രാജ്യത്തിനും ജമ്മു കശ്മീരിനും സൃഷ്ടിച്ച ശൂന്യത നികത്താനാവാത്തതാണെന്ന് പ്രധാനമന്ത്രി ചൂണ്ടിക്കാട്ടി. അദ്ദേഹത്തിന്റെ അനുകരണീയമായ നേതൃത്വം ജനങ്ങളില്‍ ഏറെ സ്വാധീനിക്കപ്പെട്ടിരുന്നു. അദ്ദേഹത്തിന്റെ രാഷ്ട്രതന്ത്രജ്ഞതയാണ് ഉയര്‍ന്നുനില്‍ക്കുന്നത്. ദീര്‍ഘകാലത്തെ രാഷ്ട്രീയ പ്രവര്‍ത്തനത്തിനിടെ സുപ്രധാനമായ പല പദവികളും അദ്ദേഹത്തിനു ലഭിച്ചു. തന്റെ നേതൃത്വം കൊണ്ട് ജമ്മു കശ്മീരിന് ആശ്വാസം പകരാന്‍ അദ്ദേഹത്തിനു കഴിഞ്ഞിരുന്നു. അദ്ദേഹത്തിന്റെ വിയോഗത്തില്‍ കുടുംബത്തേയും പ്രവര്‍ത്തകരെയും അനുശോചനം അറിയിക്കുന്നുവെന്നും മോഡി പ്രസ്താവനയില്‍ പറയുന്നു.
തന്റേയും കുടുംബത്തിന്റേയും പ്രാര്‍ത്ഥന സയീദിന്റെ കുടുംബത്തിനൊപ്പമാണെന്ന് ഒമര്‍ അബ്ദുള്ള അനുശോചന സന്ദേശത്തില്‍ പറയുന്നു. കേന്ദ്രമന്ത്രി രാജ്‌നാഥ് സിംഗ്, കോണ്‍ഗ്രസ് വൈസ് പ്രസിഡന്റ് രാഹുല്‍ ഗാന്ധി, കോണ്‍ഗ്രസ് നേതാവ് ഗുലാം നബി ആസാദ്, ഷക്കീല്‍ അഹമ്മദ്, ദിഗ്‌വിജയ് സിംഗ്, ബി.ജെ.പി നേതാവ് രാം മാധവ്, പി.ഡി.പി നേതാവ് റഫീഖ് മീര്‍ തുടങ്ങിയവര്‍ അനുശോചിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha