പഞ്ചാബിലെ പട്യാല ജില്ലയിലെ ശംഭു റെയില്‍വേ സ്റ്റേഷനില്‍ കര്‍ഷകര്‍ അഞ്ചാം ദിവസവും ട്രാക്ക് ഉപരോധിച്ചു. ഇതോടെ അംബാല-അമൃത്സര്‍ റൂട്ടിലെ 73 ട്രെയിനുകള്‍ ഞായറാഴ്ച റദ്ദാക്കിയതായി അധികൃതര്‍ അറിയിച്ചു. കഴിഞ്ഞ അഞ്ച് ദിവസമായി തീവണ്ടികള്‍ റദ്ദാക്കിയത് യാത്രക്കാര്‍ക്ക് ബുദ്ധിമുട്ടുണ്ടാക്കുന്നതിനൊപ്പം സാമ്പത്തിക നഷ്ടവും ഉണ്ടാക്കുന്നുണ്ടെന്ന് അവര്‍ പറഞ്ഞു. കര്‍ഷകരുടെ പ്രതിഷേധത്തെത്തുടര്‍ന്ന് പല ട്രെയിനുകളും വഴിതിരിച്ചുവിട്ടതായും ഉദ്യോഗസ്ഥര്‍ കൂട്ടിച്ചേര്‍ത്തു. ഹരിയാന പോലീസ് അറസ്റ്റ് ചെയ്ത മൂന്ന് കര്‍ഷകരെ വിട്ടയക്കണമെന്ന് ആവശ്യപ്പെട്ടാണ് കര്‍ഷകരുടെ പ്രതിഷേധം.

പാട്യാല ജില്ലയിലെ ശംഭുവില്‍ സംയുക്ത കിസാന്‍ മോര്‍ച്ച (നോണ്‍-പൊളിറ്റിക്കല്‍), കിസാന്‍ മസ്ദൂര്‍ മോര്‍ച്ച (കെഎംഎം) എന്നിവയുടെ ബാനറിനു കീഴിലാണ് കര്‍ഷകര്‍ പ്രതിഷേധിക്കുന്നത്. പഞ്ചാബ്-ഹരിയാന അതിര്‍ത്തിക്കടുത്തുള്ള ശംഭുവിലെ അംബാല ലുധിയാന-അമൃത്സര്‍ റൂട്ടിലെ ട്രാക്കില്‍ കുത്തിയിരുന്ന് അറസ്റ്റ് ചെയ്ത കര്‍ഷകരെ മോചിപ്പിക്കുന്നതിനായി ബുധനാഴ്ചയാണ് അവര്‍ പ്രതിഷേധം ആരംഭിച്ചത്. മൂന്ന് കര്‍ഷകരെ വിട്ടയക്കുന്നത് വരെ സമരം തുടരുമെന്ന് കര്‍ഷക നേതാക്കള്‍ അറിയിച്ചു.

കര്‍ഷക സംഘടനാ പ്രവര്‍ത്തകരായ അനീഷ് ഖട്കര്‍, നവ്ദീപ് സിംഗ് ജല്‍വേദ, ഗുര്‍കിരത് സിംഗ് എന്നിവരെ മോചിപ്പിക്കണമെന്ന് കര്‍ഷക സംഘടനകള്‍ ആവശ്യപ്പെട്ടിരുന്നു. അനീഷ് ഖട്കര്‍ പഞ്ചാബിലെ ജിന്ദ് ജയിലിലും മറ്റ് രണ്ട് പേര്‍ അംബാല സെന്‍ട്രല്‍ ജയിലിലുമാണ്. 'മൂന്ന് പ്രവര്‍ത്തകരെ വിട്ടയക്കാനുള്ള സമയപരിധി അധികൃതര്‍ പാലിക്കാത്തതിനാല്‍ റെയില്‍വേ ട്രാക്ക് തടയാന്‍ ഞങ്ങള്‍ നിര്‍ബന്ധിതരായി. അവരെ വിട്ടയക്കുന്നതുവരെ ഞങ്ങളുടെ പ്രതിഷേധം തുടരും,' കര്‍ഷക നേതാവ് ജഗ്ജിത് സിംഗ് ദല്ലേവാള്‍ പറഞ്ഞു.

സംയുക്ത കിസാന്‍ മോര്‍ച്ചയുടെ (എസ്‌കെഎം നോണ്‍ പൊളിറ്റിക്കല്‍) ബാനറിന് കീഴിലുള്ള കര്‍ഷക സംഘടനകള്‍ പ്രവര്‍ത്തകരെ മോചിപ്പിക്കാന്‍ ഏപ്രില്‍ 16 വരെ സമയപരിധി നല്‍കിയിരുന്നു. മിനിമം താങ്ങുവില (എംഎസ്പി), കാര്‍ഷിക-വായ്പ എഴുതിത്തള്ളല്‍, നേരത്തെ അറസ്റ്റിലായ കര്‍ഷകരുടെ മോചനം എന്നിവയ്ക്ക് നിയമപരമായ ഗ്യാരണ്ടി ഉള്‍പ്പെടെ വിവിധ ആവശ്യങ്ങള്‍ക്കായി സംയുക്ത കിസാന്‍ മോര്‍ച്ച 2024 ഫെബ്രുവരി 13 ന് ശംഭു അതിര്‍ത്തിയില്‍ പ്രതിഷേധം ആരംഭിച്ചിരുന്നു.