ദളിത് വിദ്യാര്‍ഥി രോഹിത് വെമുലയുടെ ആത്മഹത്യയ്ക്ക് കാരണക്കാരായവരെ അറസ്റ്റു ചെയ്യാത്തതില്‍ പ്രതിഷേധിച്ച് ജോയിന്റ് ആക്ഷന്‍ കമ്മിറ്റി ദേശവ്യാപകമായി യൂണിവേഴ്‌സിറ്റി സമരത്തിന് ആഹ്വാനം ചെയ്തു.

കഴിഞ്ഞദിവസം രാജ്യത്തെ വിവിധ യൂണിവേഴ്‌സിറ്റികളില്‍ നിന്നും പ്രതിനിധികള്‍ ഹൈദരാബാദ് യൂണിവേഴ്‌സിറ്റിയിലെത്തുകയും 'ചലോ എച്ച്.സി.യു' എന്ന പേരില്‍ പ്രതിഷേധ പ്രകടനം നടത്തുകയും ചെയ്തിരുന്നു. ഇതിനുപിന്നാലെയാണ് ജനുവരി 27ന് സമരത്തിന് ആഹ്വാനം ചെയ്തിരിക്കുന്നത്.
തങ്ങളുടെ ആവശ്യങ്ങള്‍ അംഗീകരിച്ചില്ലെങ്കില്‍ തെലങ്കാനയിലും ആന്ധ്രപ്രദേശിലും ബന്ദിന് ആഹ്വാനം ചെയ്യുമെന്നും ജോയിന്റ് ആക്ഷന്‍ കമ്മിറ്റി മുന്നറിയിപ്പു നല്‍കിയിട്ടുണ്ട്.
രോഹിതിന്റെ ആത്മഹത്യയുമായി ബന്ധപ്പെട്ട പ്രതിഷേധങ്ങളെ തുടര്‍ന്ന് അവധിയില്‍ പ്രവേശിച്ച സര്‍വ്വകലാശാല വി.സി അപ്പ റാവു രാജിവെക്കണമെന്നാണ് വിദ്യാര്‍ഥികളുടെ പ്രധാന ആവശ്യം. കൂടാതെ സര്‍വ്വകലാശാലകളില്‍ ദളിത് വിദ്യാര്‍ഥികളുടെ ആത്മഹത്യ തടയുകയെന്ന ലക്ഷ്യമിട്ട് 'രോഹിത് ആക്ട്' എന്ന പേരില്‍ നിയമനിര്‍മാണം നടത്തണമെന്നും വിദ്യാര്‍ഥികള്‍ ആവശ്യപ്പെടുന്നു.
'രോഹിതിനു നീതി ലഭിക്കും വരെ ഈ സമരം മുന്നോട്ടുകൊണ്ടുപോകാന്‍ ദേശീയ തലത്തില്‍ ഒരു ജോയിന്റ് ആക്ഷന്‍ കമ്മിറ്റി രൂപീകരിക്കാന്‍ ചര്‍ച്ചകള്‍ നടക്കുന്നുണ്ട്. ജനുവരി 27ന് രാജ്യത്തെ യൂണിവേഴ്‌സിറ്റികളില്‍ ജോയിന്റ് ആക്ഷന്‍ കമ്മിറ്റി സമരത്തിന് ആഹ്വാനം നടത്തിയിട്ടുണ്ട്.' ജാക് വക്താവ് പറഞ്ഞു.

അതേസമയം വി.സിയുടെ താല്‍ക്കാലി ചുമതല വഹിക്കുന്ന വിപിന്‍ ശ്രീവാസ്തവ കുട്ടികളോട് നിരാഹാരസമരം അവസാനിപ്പിക്കണമെന്നാവശ്യപ്പെട്ട് രംഗത്തെത്തിയിട്ടുണ്ട്. ചര്‍ച്ചകളിലൂടെ മാത്രമേ പ്രശ്‌നങ്ങള്‍ പരിഹരിക്കാന്‍ കഴിയൂ. സര്‍വ്വകലാശാല സംവിധാനത്തെ പ്രവര്‍ത്തിക്കാന്‍ അനുവദിക്കണമെന്നും അദ്ദേഹം ആഴശ്യപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha