രാഷ്ട്രീയ പ്രതിസന്ധി രൂക്ഷമായ അരുണാചല്പ്രദേശില് രാഷ്ട്രപതി ഭരണം ഏര്പ്പെടുത്തി
ഭരണ പ്രതിപക്ഷ തര്ക്കത്തെ തുടര്ന്ന് രാഷ്ട്രീയ പ്രതിസന്ധി രൂക്ഷമായ അരുണാചല്പ്രദേശില് രാഷ്ട്രപതി ഭരണം ഏര്പ്പെടുത്തി. ഇതുമായി ബന്ധപ്പെട്ട് കേന്ദ്ര സര്ക്കാര് നല്കിയ ശിപാര്ശക്ക് രാഷ്ട്രപതി പ്രണബ് മുഖര്ജി അംഗീകാരം നല്കി. രാഷ്ട്രപതിഭരണം പ്രഖ്യാപിക്കാനുള്ള കേന്ദ്ര മന്ത്രിസഭാ ശിപാര്ശ അംഗീകരിക്കരുതെന്ന് ആവശ്യപ്പെട്ട് അരുണാചല് ഭരണകക്ഷിയായ കോണ്ഗ്രസിന്റെ പ്രതിനിധിസംഘം പ്രണബ് മുഖര്ജിക്കു നിവേദനം നല്കിയിരുന്നു. കൂടാതെ ശിപാര്ശ ചോദ്യംചെയ്ത് സുപ്രീംകോടതിയെയും കോണ്ഗ്രസ് സമീപിച്ചിരുന്നു. ഇതിന് പിന്നാലെയാണ് രാഷ്ട്രപതി ശിപാര്ശക്ക് അംഗീകാരം നല്കിയത്.
നബാം ടുക്കിയുടെ നേതൃത്വത്തിലുള്ള കോണ്ഗ്രസ് സര്ക്കാറിനെ ഗവര്ണര് പുറത്താക്കുകയും പിന്നീട് ഈ നടപടി ഹൈകോടതി റദ്ദാക്കുകയും ചെയ്തതിനെ തുടര്ന്നാണ് അരുണാചലില് രാഷ്ട്രീയ പ്രതിസന്ധി രൂക്ഷമായത്. കഴിഞ്ഞ നവംബറിലാണ് പ്രതിസന്ധി തുടങ്ങിയത്. അറുപതംഗ നിയമസഭയില് കോണ്ഗ്രസ്സിന് 47 ഉം ബി.ജെ.പി.ക്ക് 11 അംഗങ്ങളുമാണുള്ളത്. മുഖ്യമന്ത്രിയുടെ ഏകാധിപത്യ നയങ്ങളില് പ്രതിഷേധിച്ച് നിയമസഭാകക്ഷി യോഗത്തില്നിന്ന് വിട്ടുനില്ക്കുകയാണെന്ന് വിമത കോണ്ഗ്രസ് എം.എല്.എ.മാര് പ്രഖ്യാപിച്ചതോടെയാണ് അരുണാചലില് കുഴപ്പങ്ങള് തുടങ്ങിയത്.
പ്രതിപക്ഷമായ ബി.ജെ.പി.ക്കൊപ്പം കോണ്ഗ്രസ്സിലെ വിമത എം.എല്.എ.മാരും ചേര്ന്ന് അവിശ്വാസ പ്രമേയം പാസാക്കിയാണ് നബാം ടുക്കി സര്ക്കാറിനെ പുറത്താക്കിയത്. പിന്നീട് ഇവര് ചേര്ന്ന് വിമത കോണ്ഗ്രസ് എം.എല്.എ.യെ മുഖ്യമന്ത്രിയായി തെരഞ്ഞെടുത്തു. എന്നാല് ഇതടക്കം നിയമസഭയെടുത്ത എല്ലാ തീരുമാനങ്ങളും ഹൈകോടതി റദ്ദാക്കിയിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
