ഷെല്ട്ടര് ഹോമില് അന്തേവാസികളായ കുട്ടികള് മരിച്ചുവീഴുന്നു... കഴിഞ്ഞ 20 ദിവസത്തിനുള്ളില് ഡല്ഹി സര്ക്കാര് ഷെല്ട്ടര് ഹോമില് 13 കുട്ടികള് മരിച്ചതായി റിപ്പോര്ട്ട്
ഷെല്ട്ടര് ഹോമില് അന്തേവാസികളായ കുട്ടികള് മരിച്ചുവീഴുന്നു. അസ്വാഭാവികമായി തന്നെ അന്തേവാസികളായ കുട്ടികള് മരിച്ചുവീഴുന്നു. സബ് ഡിവിഷണല് മജിസ്ട്രേറ്റിന്റെ അന്വേഷണത്തിലാണ് കഴിഞ്ഞ 20 ദിവസത്തിനുള്ളില് ഡല്ഹി സര്ക്കാര് ഷെല്ട്ടര് ഹോമില് 13 കുട്ടികള് മരിച്ചതായി കണ്ടെത്തുന്നത്. രോഹിണിയിലെ ആശാ കിരണ് ഷെല്ട്ടര് ഹോമില് ജനുവരി മുതല് ഇതുവരെ 27 മരണങ്ങള് റിപ്പോര്ട്ട് ചെയ്യപ്പെട്ടിട്ടുണ്ട്. ഷെല്ട്ടര് ഹോമിലെ മരണത്തിന്റെ കാരണം ഇതുവരെ കണ്ടെത്തിയിട്ടില്ല. മരണസംഖ്യ കഴിഞ്ഞ വര്ഷത്തേക്കാള് വളരെ കൂടുതലാണെന്ന് ചൂണ്ടിക്കാട്ടി, മരണങ്ങളുടെ യഥാര്ത്ഥ കാരണം പോസ്റ്റ്മോര്ട്ടം റിപ്പോര്ട്ടുകള്ക്ക് ശേഷമേ വ്യക്തമാകൂവെന്ന് എസ്ഡിഎം പറഞ്ഞു.
കുട്ടികള്ക്ക് നല്കുന്ന കുടിവെള്ളത്തിന്റെ ഗുണനിലവാരം സംബന്ധിച്ച് എസ്ഡിഎമ്മിന്റെ റിപ്പോര്ട്ട് ചോദ്യങ്ങള് ഉയര്ത്തിയിട്ടുണ്ട്. എഎപി സര്ക്കാരിന്റെ അവഗണനയ്ക്കെതിരെ ആഞ്ഞടിച്ച് ദേശീയ വനിതാ കമ്മീഷന് (എന്സിഡബ്ല്യു) വസ്തുതാന്വേഷണ സംഘത്തെ ഷെല്ട്ടര് ഹോമിലേക്ക് അയച്ചു. 'വര്ഷങ്ങളായി, ഡല്ഹി സര്ക്കാര് നടത്തുന്ന ആശാ കിരണ് ഷെല്ട്ടര് ഹോമിന് എല്ലാ ആശകളും (പ്രതീക്ഷ) നഷ്ടപ്പെട്ടു. ആളുകള് അതില് കഷ്ടപ്പെടുകയും മരിക്കുകയും ചെയ്യുന്നു, ഡല്ഹി സര്ക്കാര് ഒന്നും ചെയ്യുന്നില്ല, ഒന്നും ചെയ്യുന്നില്ല, അത് അന്വേഷിക്കാന് എന്റെ ടീമിനെ അയച്ചു. NCW ചെയര്പേഴ്സണ് രേഖ ശര്മ്മ പറഞ്ഞു.
ഡല്ഹി മന്ത്രി അതിഷി, മരണസംഖ്യയില് ഭിന്നത രേഖപ്പെടുത്തി, മജിസ്ട്രേറ്റ് തല അന്വേഷണം ആരംഭിച്ച് 48 മണിക്കൂറിനുള്ളില് റിപ്പോര്ട്ട് സമര്പ്പിക്കാന് റവന്യൂ വകുപ്പ് അഡീഷണല് ചീഫ് സെക്രട്ടറിയോട് (എസിഎസ്) ആവശ്യപ്പെട്ടു. 2024 ജനുവരി മുതല് ഷെല്ട്ടര് ഹോമില് 14 മരണങ്ങള് ഉണ്ടായതായി അതിഷി തന്റെ കത്തില് കുറിച്ചു. അശ്രദ്ധമൂലം മരണത്തിന് ഇടയാക്കിയവര്ക്കെതിരെ നടപടിയെടുക്കാന് ശുപാര്ശ ചെയ്യണമെന്നും മന്ത്രി ആവശ്യപ്പെട്ടു. ഭാവിയില് ഇത്തരം സംഭവങ്ങള് ഉണ്ടാകാതിരിക്കാന് ആവശ്യമായ മുന്കരുതലുകള് സ്വീകരിക്കണമെന്നും അവര് ആവശ്യപ്പെട്ടു.
സ്ഥിതിഗതികള് വിലയിരുത്താന് ഡല്ഹി ബിജെപിയുടെ സംഘവും ആശാ കിരണ് ഷെല്ട്ടര് ഹോമിലെത്തി. 'ഞങ്ങളുടെ വിവരമനുസരിച്ച്, കുട്ടികള്ക്ക് മലിനജലം ലഭിക്കുന്നു, അവര്ക്ക് ഭക്ഷണം ലഭിക്കുന്നില്ല, അവര്ക്ക് ചികിത്സ ലഭിക്കുന്നില്ല, അന്വേഷണം നടത്തണം, ഇതില് ഉള്പ്പെട്ട എല്ലാ ഉദ്യോഗസ്ഥരെയും ശിക്ഷിക്കണം,' രേഖാ ഗുപ്ത, ബി.ജെ.പി. മഹിളാ മോര്ച്ച വൈസ് പ്രസിഡന്റ് പറഞ്ഞു. മയൂര് വിഹാറിലെ അഴുക്കുചാലില് മുങ്ങിമരിച്ച അമ്മയുടെയും മകന്റെയും വീട് കാവി പാര്ട്ടി നേതാക്കള് സന്ദര്ശിച്ചില്ലെന്ന് ബിജെപിക്കെതിരെ ആഞ്ഞടിച്ച് ഡല്ഹി മന്ത്രി ഗോപാല് റായ് പറഞ്ഞു.
'ബിജെപി പ്രതിഷേധിക്കുന്നു. പക്ഷേ, മയൂര് വിഹാറില് ഒരു സ്ത്രീയും മകനും അഴുക്കുചാലില് വഴുതിവീണ് മരിച്ചപ്പോള് അവര് പ്രതിഷേധിച്ചില്ല. അവര് ആശാ കിരണില് പ്രതിഷേധിക്കാന് വന്നത് അത് ദില്ലി സര്ക്കാരിന്റെ കീഴിലാണെന്ന് അവര്ക്കറിയാം,' റായ് പറഞ്ഞു. ബന്ധപ്പെട്ട മന്ത്രി കേസ് സൂക്ഷ്മമായി നിരീക്ഷിച്ചു വരികയാണെന്നും കുറ്റവാളികളെ വെറുതെ വിടില്ലെന്നും അദ്ദേഹം പറഞ്ഞു. ഡല്ഹി സര്ക്കാര് ജനങ്ങള്ക്കൊപ്പമാണ് നിലകൊള്ളുന്നതെന്നും അദ്ദേഹം പറഞ്ഞു.
https://www.facebook.com/Malayalivartha
