ജമ്മു കശ്മീരിലെ അനന്ത് നാഗിൽ വീണ്ടും ഏറ്റുമുട്ടൽ. ശനിയാഴ്ച ഉച്ചയ്ക്കു ശേഷമാണ് ഏറ്റുമുട്ടൽ ആരംഭിച്ചത്. കോകർനാഗ് ഗ്രാമത്തിൽ ഭീകരരുടെ സാനിധ്യമുണ്ടെന്ന് വിവരം ലഭിച്ചതിനെത്തുടർന്നാണ് സൈന്യവും പൊലീസും സിആർപിഎഫും സംയുക്തമായി പരിശോധന നടത്തിയത് . ഇതിനിടെ ഭീകരർ വെടിയുതിർത്തതിനെ തുടർന്ന് രണ്ട് സൈനികർക്ക് പരിക്കേറ്റു.

കോക്കർനാഗിലെ അഹ്‌ലൻ ഗഡോളിലെ പർവത വനങ്ങളിൽ സംയുക്ത സുരക്ഷാ സംഘം തിരച്ചിൽ നടത്തുന്നതിനിടെ, അവിടെ ഒളിച്ചിരുന്ന ചില തീവ്രവാദികൾ വെടിയുതിർക്കുകയായിരുന്നു, മേഖലയിൽ രണ്ട് ഭീകരർ കുടുങ്ങിയതായാണ് സൂചന. ഇതോടെ സുരക്ഷാ സേന പ്രദേശത്ത് തിരച്ചിൽ കൂടുതൽ ശക്തമാക്കിയിട്ടുണ്ട്. കഴിഞ്ഞ ചൊവ്വാഴ്ച ഉധംപുരിലെ ബസന്ത്ഗറിലും ഭീകരരുമായി ഏറ്റുമുട്ടൽ നടന്നിരുന്നു.

കോക്കർനാഗ് സബ്‌സിവിഷനിലെ വനത്തിൽ ഭീകരവിരുദ്ധ ഓപ്പറേഷൻ നടത്തുന്നതിനിടെ പട്രോളിംഗ് സംഘത്തെ ലക്ഷ്യമിട്ട് ഭീകരർ നടത്തിയ ആക്രമണത്തിലാണ് രണ്ട് സൈനികർക്ക് പരിക്കേറ്റത്. വിദേശികളെന്ന് കരുതുന്ന ഭീകരരെ തുരത്താനുള്ള ഓപ്പറേഷന്റെ ഭാഗമായാണ് സൈന്യത്തിന്റെ സ്‌പെഷ്യൽ ഫോഴ്‌സ് ഇവിടെയെത്തിയത്. X-ലെ ഒരു പോസ്റ്റിൽ, ഒരു ഏറ്റുമുട്ടൽ നടക്കുകയാണെന്ന് കശ്മീർ പോലീസ് സ്ഥിരീകരിച്ചു

കഴിഞ്ഞ ദിവസം ജമ്മു കശ്മീർ പോലീസ് കത്വ ജില്ലയിലെ മൽഹാർ, ബാനി, സിയോജ്ധർ എന്നിവിടങ്ങളിൽ അവസാനമായി കണ്ട നാല് ഭീകരരുടെ രേഖാചിത്രങ്ങൾ പുറത്തുവിട്ടിരുന്നു. ഇവരെ കുറിച്ച് വിവരം നൽകുന്നവർക്ക് പോലീസ് അഞ്ച് ലക്ഷം രൂപ പാരിതോഷികവും പ്രഖ്യാപിച്ചിട്ടുണ്ട് .കത്വയിലെ സൈനിക വാഹനവ്യൂഹത്തിന് നേരെയുണ്ടായ ഭീകരാക്രമണവും ജമ്മു മേഖലയിലെ ദോഡയിലും ഉധംപൂരിലും നടന്ന ഏറ്റുമുട്ടലുകളും ഉൾപ്പെടെ ജമ്മു മേഖലയിൽ അടുത്തിടെ നടന്ന ഭീകരാക്രമണങ്ങളുടെ പശ്ചാത്തലത്തിലാണിത്.

ഏകദേശം രണ്ടാഴ്‌ച മുമ്പ്, കുപ്‌വാര ജില്ലയിലെ നിയന്ത്രണ രേഖയിൽ (എൽഒസി) പാകിസ്ഥാൻ ബോർഡർ ആക്ഷൻ ടീം (ബിഎടി) നടത്തിയ ആക്രമണം സൈന്യം പരാജയപ്പെടുത്തിയെങ്കിലും ഒരു സൈനികൻ മരിക്കുകയും ഒരു മേജർ റാങ്ക് ഓഫീസർ ഉൾപ്പെടെ നാല് പേർക്ക് സാരമായി പരിക്കേൽക്കുകയും ചെയ്‌തിരുന്നു.