കപു വിഭാഗത്തെ പിന്നോക്ക വിഭാഗത്തില്‍ ഉള്‍പ്പെടുത്തണമെന്ന ആവശ്യവുമായി നടത്തിവന്ന ഉപരോധസമരം രാത്രി വൈകി പിന്‍വലിച്ചു. ഹൈവേകളും റയില്‍വേ ലൈനുകളും ബ്ലോക്ക് ചെയ്തായിരുന്നു കപു വിഭാഗക്കാര്‍ സമരം നടത്തിയിരുന്നത്. ആന്ധ്രപ്രദേശിലെ കിഴക്കന്‍ ഗോദാവരി ജില്ലയില്‍ നടത്തിവന്ന സമരം അക്രമാസക്തമായിരുന്നു. ഉപരോധം പിന്‍വലിച്ചതോടെ പൊലീസും അഡ്മിനിസ്‌ട്രേഷന്‍ ഉദ്യോഗസ്ഥരും ചേര്‍ന്ന് റയില്‍വേ ലൈനുകള്‍ ഒഴിപ്പിച്ചു.

പ്രകോപിതരായ പ്രവര്‍ത്തകര്‍ ഗോധാവരി ജില്ലയിലെ തുണി സ്‌റ്റേഷനില്‍ വച്ച് രത്‌നാചല്‍ എക്‌സ്പ്രസിന്റെ നാലു കോച്ചുകള്‍ക്ക് തീയിട്ടു. റയില്‍വേ ഉദ്യോഗസ്ഥരുടെ സമയോചിതമായ ഇടപെടലിലൂടെ യാത്രക്കാര്‍ക്ക് അപകടമൊന്നും സംഭവിച്ചില്ലെന്ന് വിജയവാഡ സ്‌റ്റേഷന്‍ മാസ്റ്റര്‍ എന്‍.സുരേഷ് ബാബു പറഞ്ഞു. ട്രെയിന് നേരെ നടന്ന കല്ലേറില്‍ നാല് റെയില്‍വേ ജീവനക്കാര്‍ക്കും പരുക്കേറ്റു. രണ്ടു പേരുടെ നിലഗുരുതരമാണ്.
ദേശീയപാത 16 ബ്ലോക്ക് ചെയ്ത പ്രവര്‍ത്തകര്‍ രണ്ടു പൊലീസ് സ്‌റ്റേഷനുകള്‍ക്കും തീയിട്ടിരുന്നു. 25 ഓളം വാഹനങ്ങളും കത്തിച്ചു. അക്രമാസക്തരായ പ്രവര്‍ത്തകര്‍ നിരവധി പൊലീസ് ഉദ്യോഗസ്ഥരെയും മര്‍ദിച്ചു. പ്രവര്‍ത്തകര്‍ ചെന്നൈകൊല്‍ക്കത്ത ദേശീയ ഹൈവേ ഉപരോധിച്ചത് റോഡ് ഗതാഗതത്തെയും ബാധിച്ചിരുന്നു. കപു വിഭാഗത്തിന്റെ നേതാവ് എം. പദ്മനാഭനാണ് ഉപരോധസമരം പിന്‍വലിക്കുന്നതായി അറിയിച്ചത്. അക്രമങ്ങള്‍ നടക്കുമെന്ന് അറിയില്ലായിരുന്നുവെന്നും പ്രശ്‌നങ്ങള്‍ മുഖ്യമന്ത്രി ചന്ദ്രബാബു നായിഡുവുമായി സംസാരിച്ച് തീര്‍ക്കാമെന്നാണ് കരുതുന്നതെന്നും അദ്ദേഹം പറഞ്ഞു. 

ആന്ധ്രാപ്രദേശ് മുഖ്യമന്ത്രി എന്‍. ചന്ദ്രബാബു നായിഡു വാക്കുപാലിച്ചില്ലെന്നും പ്രതിഷേധക്കാര്‍ കുറ്റപ്പെടുത്തുന്നു. അതേസമയം, മുഖ്യമന്ത്രി ചന്ദ്രബാബു നായിഡുവിന്റെ നേതൃത്വത്തില്‍ അടിയന്തരയോഗം ചേരുകയും സ്ഥിതിഗതികള്‍ വിലയിരുത്തുകയും ചെയ്തു. മൊബൈല്‍, ഇന്റര്‍നെറ്റ് സേവനങ്ങള്‍ താല്‍ക്കാലികമായി തടഞ്ഞിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha