പ്രധാനമന്ത്രി നരേന്ദ്രമോഡി നാളെ കോഴിക്കോട്ട്; സന്ദര്ശനത്തോടനുബന്ധിച്ച് നഗരം വന്സുരക്ഷാവലയത്തില്
പ്രധാനമന്ത്രി നരേന്ദ്ര മോഡി നാളെ ഗ്ലോബല് ആയുര്വേദ ഫെസ്റ്റിവലിന്റെ ഭാഗമായുള്ള വിഷന് കോണ്ക്ലേവ് ഉദ്ഘാടനം ചെയ്യാന് കോഴിക്കോട്ടെത്തും. സ്വപ്നനഗരിയിലാണു പരിപാടി. പ്രധാനമന്ത്രിയുടെ സന്ദര്ശനത്തോടനുബന്ധിച്ചു നഗരത്തില് കനത്ത സുരക്ഷാ ഏര്പ്പെടുത്തി. വാഹനവ്യൂഹത്തിന്റെ ട്രയല് റണ് നടക്കുന്നതിനാല് ഇന്നു രാവിലെ 11 മുതല് നഗരത്തില് ഗതാഗതനിയന്ത്രണം.
ഡി.ഐ.ജി: സേവാങ് നമ്ഗ്യാലിന്റെ നേതൃത്വത്തില് 40 അംഗ സ്പെഷല് പ്രട്ടക്ഷന് ഗ്രൂപ്പിനു പുറമേ നാല് എസ്.പിമാരുള്പ്പെടെ 1314 പോലീസ് ഉദ്യോഗസ്ഥരെയും പ്രധാനമന്ത്രിയുടെ സുരക്ഷയ്ക്കായി വിന്യസിച്ചു. കേന്ദ്രസംസ്ഥാന രഹസ്യാന്വേഷണവിഭാഗങ്ങളുടെ നിരീക്ഷണത്തിലാണു നഗരം.
പ്രത്യേകവിമാനത്തില് കരിപ്പൂരിലെത്തുന്ന പ്രധാനമന്ത്രി അവിടെനിന്നു ഹെലികോപ്റ്ററില് 12.05നു കോഴിക്കോട് വെസ്റ്റ്ഹില് മൈതാനത്തിറിങ്ങും. തുടര്ന്നു റോഡ് മാര്ഗം സ്വപ്നനഗരിയിലേക്ക്. മടക്കയാത്രയും ഇതേ രീതിയിലാണു ക്രമീകരിച്ചിരിക്കുന്നത്. 01.05നു വെസ്റ്റ്ഹില് വിക്രം മൈതാനത്തുനിന്ന് അദ്ദേഹം കരിപ്പൂരിലേക്കു യാത്രതിരിയ്ക്കും.
ഉത്തരമേഖലാ എ.ഡി.ജി.പി: നിഥിന് അഗര്വാള്, തൃശൂര് റേഞ്ച് ഐ.ജി: എം.ആര്. അജിത്കുമാര്, സിറ്റി പോലീസ് കമ്മിഷണര് ഉമാ ബെഹ്റ, ഡി.സി.പി: ഡി. സാലി എന്നിവരുടെ നേതൃത്വത്തിലാണു സുരക്ഷാക്രമീകരണങ്ങള്. നാല് എസ്.പിമാര്ക്കു പുറമേ 40 സി.ഐമാരും 100 എസ്.ഐമാരും വനിതകള് ഉള്പ്പെടെ 1150 പോലീസുകാരും നഗരത്തിന്റെ വിവിധ ഭാഗങ്ങളില് നിലയുറപ്പിക്കും. വെസ്റ്റ്ഹില് മൈതാനത്തെ വീതി കൂട്ടിയ ഹെലിപ്പാഡില് ഇന്നലെ പരീക്ഷണാടിസ്ഥാനത്തില് രണ്ടുതവണ ഹെലികോപ്റ്റര് ഇറങ്ങി. എസ്.പി.ജി. ഡി.ഐ.ജി: സേവാങ് നമ്ഗ്യാല്, സിറ്റി പോലീസ് കമ്മിഷണര് ഉമാ െബഹ്റ, ഡി.സി.പി: ഡി. സാലി, സ്പെഷല്ബ്രാഞ്ച് അസിസ്റ്റന്റ് കമ്മിഷണര് എം.പി. പ്രേംദാസ്, നോര്ത്ത് അസി. കമ്മിഷണര് ജോസി ചെറിയാന്, ഫയര്ഫോഴ്സ് ഉദ്യോഗസ്ഥര് എന്നിവര് മൈതാനത്തെ ക്രമീകരണങ്ങള് വിലയിരുത്തി. പ്രധാനമന്ത്രി വെസ്റ്റ്ഹില് ഗസ്റ്റ്ഹൗസില് എത്തുന്നില്ലെങ്കിലും അവിടെ എല്ലാ സൗകര്യങ്ങളും ഒരുക്കിയിട്ടുണ്ട്. മൈതാനത്തുനിന്നു ഗസ്റ്റ് ഹൗസിലേക്കുള്ള റോഡ് ടാറിങ് പൂര്ത്തിയായി.
ബുള്ളറ്റ് പ്രൂഫ് കാര്, മൊബൈല് സിഗ്നലുകള് നിഷ്ക്രിയമാക്കുന്ന ജാമര് കാര്, വാണിങ് പൈലറ്റ് വാഹനം, പൈലറ്റ് വാഹനം, എസ്.പി.ജി. വാഹനം, രണ്ട് അകമ്പടി വാഹനങ്ങള്, പോലീസ് വാഹനങ്ങള് എന്നിവയാണു പ്രധാനമന്ത്രിയുടെ വാഹനവ്യൂഹത്തിലുണ്ടാവുക.
സ്വപ്നനഗരിയില് ബോംബ് ഡോഗ് സ്ക്വാഡുകള് തുടര്ച്ചയായി പരിശോധന നടത്തിവരുന്നു. ഫയര്ഫോഴ്സ്, ആംബുലന്സ് എന്നിവയുടെ സേവനവും വേദിക്കരികിലുണ്ടാവും. 18 പേരാണു പ്രധാനമന്ത്രിക്കൊപ്പം വേദി പങ്കിടുന്നത്. ഓരോരുത്തര്ക്കുമുള്ള ഇരിപ്പിട ക്രമീകരണങ്ങള് പൂര്ത്തിയായി. ഓരോരുത്തരും പ്രസംഗിക്കേണ്ട സമയം കൃത്യമായി നിജപ്പെടുത്തിയിട്ടുണ്ട്. ചടങ്ങില് പങ്കെടുക്കുന്നവരെ പരിശോധനയ്ക്കുശേഷമേ കടത്തിവിടൂ. ഡല്ഹിയില്നിന്നുള്ള സ്പെഷല് പ്രട്ടക്ഷന് ഗ്രൂപ്പ് (എസ്.പി.ജി) കോഴിക്കോട്ടെത്തി. പ്രധാനമന്ത്രിയുടെ ബുള്ളറ്റ് പ്രൂഫ് കാറുകളും മൊബൈല് ജാമര് കാറുകളും എത്തിച്ചിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
