കൈകുഞ്ഞ് അബദ്ധത്തില്‍ ജനലിലൂടെ താഴേക്ക് വീണ് മരിച്ച സംഭവത്തില്‍ പിതാവിന് നാല് വര്‍ഷം തടവ്. ചൈനയിലെ സിന്‍ജിയാങ് ഉയ്ഗൂര്‍ പ്രവിശ്യലാണ് സംഭവമെന്ന് സൗത്ത് ചൈന മോണിങ് പോസ്റ്റ് റിപ്പോര്‍ട്ട് ചെയ്തു. സംഭവ സമയത്ത് പിതാവ് മദ്യ ലഹരിയിലായിരുന്നുവെന്നാണ് റിപ്പോര്‍ട്ടില്‍ പറയുന്നത്.

ആറാം നിലയിലെ ജനലില്‍ നിന്നാണ് കുഞ്ഞ് താഴേക്ക് വീണത്. ഉടന്‍ ഓടിയെത്തി ആശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല. സംഭവത്തില്‍ വിചാരണ പൂര്‍ത്തിയാക്കിയ കോടതി യുവാവ് കുറ്റക്കാരനാണെന്ന് കണ്ടെത്തി ശിക്ഷ വിധിച്ചു. സംഭവ ദിവസം വൈകുന്നേരം ഭക്ഷണം കഴിക്കാന്‍ യുവാവ് ഭാര്യയെയും മകളെയും കൂട്ടി പുറത്തുപോയിരുന്നു. മദ്യപിച്ചാണ് യുവാവ് മടങ്ങിയെത്തിയത്.

വീട്ടിലെത്തിയ ശേഷം കരയുന്ന കുഞ്ഞിനെ യുവാവിനെ ഏല്‍പ്പിച്ചിട്ട് ഭാര്യ, വീട്ടുജോലികള്‍ ചെയ്യാന്‍ തുടങ്ങി. എന്നാല്‍ കുഞ്ഞ് കരഞ്ഞിട്ടും ഇയാള്‍ ശ്രദ്ധിക്കാത്തതിനെച്ചൊല്ലി ഭാര്യ ബഹളമുണ്ടാക്കി. ഇതോടെ യുവാവ് കുഞ്ഞിനെ കൈയില്‍ പിടിച്ചുകൊണ്ട് തിരികെ സംസാരിക്കാന്‍ തുടങ്ങി. കുഞ്ഞിന്റെ കരച്ചില്‍ മാറ്റാന്‍ കൈയിലെടുത്ത് താലോലിച്ചുകൊണ്ട് ഭാര്യയുമായി വഴക്കുണ്ടാക്കുന്നതിനിടെ അബദ്ധത്തില്‍ കുഞ്ഞ് പിന്നിലെ ജനലിലൂടെ ആറാം നിലയില്‍ നിന്ന് താഴേക്ക് വീഴുകയായിരുന്നു.

ഉടന്‍ തന്നെ ഇരുവരും ഓടി താഴെയെത്തുകയും അച്ഛന്‍ തന്നെ കുഞ്ഞിനെ ആശുപത്രിയില്‍ എത്തിക്കുകയും ചെയ്തു. എന്നാല്‍ നേരത്തെ തന്നെ മരണം സംഭവിച്ചിരുന്നു. തലയ്‌ക്കേറ്റ ഗുരുതരമായ ആഘാതമാണ് മരണകാരണമായതെന്ന് ഡോക്ടര്‍മാര്‍ കണ്ടെത്തി. ആശുപത്രി അധികൃതരാണ് പൊലീസില്‍ വിവരമറിയിച്ചത്. ഭര്‍ത്താവ് ദിവസവും മദ്യപിക്കുമായിരുന്നെങ്കിലും കുഞ്ഞിനോട് എപ്പോഴും സ്‌നേഹമായിരുന്നുവെന്ന് ഭാര്യ കോടതിയില്‍ മൊഴി നല്‍കി.

എന്നാല്‍ വിചാരണയ്‌ക്കൊടുവില്‍ കുഞ്ഞിന്റെ മരണത്തിന് യുവാവ് ഉത്തരവാദിയാണെന്ന് കോടതി കണ്ടെത്തുകയായിരുന്നു. കൊല്ലണമെന്ന് ഉദ്ദേശിച്ചിരുന്നില്ലെന്നതും ജീവന്‍ രക്ഷിക്കാന്‍ പരമാവധി ശ്രമിച്ചതും ആശുപത്രിയില്‍ എത്തിച്ചതും കണക്കിലെടുത്ത് കൊലക്കുറ്റം ഒഴിവാക്കി. പകരം നാല് വര്‍ഷം ജയില്‍ ശിക്ഷ വിധിക്കുകയായിരുന്നു.