വിവാദ മദ്യവ്യവസായി വിജയ് മല്യക്ക് എക്‌സില്‍ പിറന്നാള്‍ ആശംസയുമായി മുന്‍ ഇന്ത്യന്‍ പ്രീമിയര്‍ ലീഗ് (ഐപിഎല്‍) ചെയര്‍മാന്‍ ലളിത് മോദി. ഇതിന് മല്യ നല്‍കിയ മറുപടി ട്വീറ്റ് ക്ഷണനേരംകൊണ്ട് വൈറലുമായി. ഇന്ന് 69-ാം ജന്മദിനം ആഘോഷിക്കുന്ന മല്യക്ക് പിറന്നാള്‍ ആശംസിച്ചതിനൊപ്പം ജീവിതത്തില്‍ ഉയര്‍ച്ച താഴ്ചകളുണ്ടാകുമെന്നും ഈ സമയവും കടന്നുപോകുമെന്നു പറഞ്ഞ മോദി, ഇനിയുള്ള വര്‍ഷം നിങ്ങളുടേതാകുമെന്നും സ്‌നേഹവും പുഞ്ചരിയും നിറയുമെന്നും ട്വീറ്റിലെഴുതി. ഇതിനു നന്ദി പറഞ്ഞ വിജയ് മല്യ, ''പ്രിയപ്പെട്ട സുഹൃത്തേ, നമ്മള്‍ ഇരുവരും സ്വന്തം രാജ്യത്തിനുവേണ്ടി പ്രയത്‌നിച്ചിട്ടും തെറ്റിദ്ധരിക്കപ്പെട്ടവരായി'' എന്ന് മറുപടിയിട്ടു.

ഇന്ത്യന്‍ ക്രിക്കറ്റിന്റെ തലവര തന്നെ മാറ്റിയ ഐപിഎല്ലിന്റെ ചെയര്‍മാനായിരുന്നു ലളിത് മോദി. എന്നാല്‍, പണം തിരിമറി ആരോപണങ്ങള്‍ ഉയര്‍ന്നതിന് പിന്നാലെ അദ്ദേഹവും വിദേശത്തേക്ക് കടന്നു. 2009ലെ ഐപിഎല്ലിന് മുമ്പായി ക്രിക്കറ്റ് സൗത്ത് ആഫ്രിക്കയ്ക്ക് വിദേശനാണയ വിനിമയ ചട്ടം (ഫെമ ലംഘിച്ചും റിസര്‍വ് ബാങ്കിന്റെ അനുമതി ഇല്ലാതെയും 243.45 കോടി രൂപ നല്‍കിയതായിരുന്നു ആരോപണങ്ങള്‍ക്ക് ഇടയാക്കിയത്. 2010ലാണ് മോദി ലണ്ടനിലേക്ക് കടന്നത്. അദ്ദേഹത്തിനെതിരെയും ഇ.ഡിയുടെ അന്വേഷണം നടക്കുന്നുണ്ട്.

വിജയ് മല്യ, പഞ്ചാബ് നാഷണല്‍ ബാങ്കില്‍ നിന്ന് അനധികൃതമായി വായ്പയെടുത്ത് തിരിമറി നടത്തിയശേഷം വിദേശത്തേക്ക് മുങ്ങിയ വജ്രവ്യാപാരി നീരവ് മോദി, അദ്ദേഹത്തിന്റെ അമ്മാവന്‍ മെഹുല്‍ ചോക്‌സി തുടങ്ങിയവരുടെ 22,280 കോടി രൂപയുടെ ആസ്തികള്‍ ഇ.ഡി കണ്ടുകെട്ടിയെന്ന് കഴിഞ്ഞദിവസം ധനമന്ത്രി നിര്‍മല സീതാരാമന്‍ പാര്‍ലമെന്റില്‍ പറഞ്ഞിരുന്നു.

കിങ്ഫിഷര്‍ എയര്‍ലൈന്‍സിന്റെ 6,203 കോടി രൂപയുടെ ആസ്തികള്‍ കണ്ടുകെട്ടാനായിരുന്നു ഡെറ്റ് റിക്കവറി ട്രൈബ്യൂണലിന്റെ ഉത്തരവ്. എന്നാല്‍ ഇ.ഡിയും ബാങ്കുകളും ചേര്‍ന്ന് തന്റെ ആസ്തിയില്‍ നിന്ന് 14,131.60 കോടി രൂപ കണ്ടുകെട്ടി. എന്നിട്ടും താന്‍ സാമ്പത്തിക കുറ്റവാളി (economic offender) ആകുന്നത് എങ്ങനെയെന്ന് മല്യ എക്‌സില്‍ ചോദിച്ചു. 1,200 കോടി രൂപ പലിശയടക്കം 6,203 കോടി രൂപ കണ്ടുകെട്ടാനായിരുന്നു ഉത്തരവ്. അതിന്റെ ഇരട്ടിയിലേറെ തുക കണ്ടുകെട്ടിയതിനെ ഇ.ഡിയും ബാങ്കുകളും എങ്ങനെയാണ് ന്യായീകരിക്കുക? തനിക്ക് നീതി വേണമെന്നും അതിനായി ശ്രമിക്കുമെന്നും മല്യ പറഞ്ഞു.

മല്യയില്‍ നിന്ന് 14,131.6 കോടി രൂപയും നീരവ് മോദിയില്‍ നിന്ന് 1,052.58 കോടി രൂപയും ചോക്‌സിയില്‍ നിന്ന് 2,565.90 കോടി രൂപയും മതിക്കുന്ന ആസ്തികള്‍ കണ്ടുകെട്ടിയെന്നാണ് നിര്‍മല ലോക്‌സഭയില്‍ പറഞ്ഞത്. പണംതിരിമറി തടയല്‍ നിയമപ്രകാരം (പിഎംഎല്‍എ) മൊത്തം 22,280 കോടി രൂപയുടെ ആസ്തികളാണ് ഇ.ഡി കണ്ടുകെട്ടിയത്. എസ്ആര്‍എസ് ഗ്രൂപ്പ്, റോസ് വാലി തുടങ്ങിയ കമ്പനികളുടെ ആസ്തികളും ഇതിലുണ്ട്. ഈ ആസ്തികള്‍ വൈകാതെ ലേലം ചെയ്യും.

കിംഗ്ഫിഷര്‍ എയര്‍ലൈന്‍സിന് വായ്പയായി ജാമ്യം (ഗ്യാരന്റി) നിന്നതല്ലാതെ താന്‍ നയാ പൈസ വായ്പ എടുത്തിട്ടില്ലെന്ന് വിജയ് മല്യ പറഞ്ഞു. തനിക്കെതിരെ സിബിഐ ക്രിമിനല്‍ കേസ് എടുത്തിട്ടുണ്ടെന്നാണ് സര്‍ക്കാരും വിമര്‍ശകരും പറയുന്നത്. ''ഞാന്‍ ഒരു രൂപ പോലും വായ്പ എടുക്കുകയോ കട്ടിട്ടോ ഇല്ല. എന്നാല്‍, കിങ്ഫിഷറിന് വായ്പയ്ക്കായി ജാമ്യം നിന്നിട്ടുണ്ട്''.

സിബിഐയും 900 കോടി രൂപ വായ്പ തന്ന ഐഡിബിഐ ബാങ്ക് ഉദ്യോഗസ്ഥരും തന്നെ കുറ്റവാളിയായി ചിത്രീകരിക്കുകയാണ്. ബാങ്കിന്റെ ക്രെഡിറ്റ് കമ്മിറ്റിയും ഡയറക്ടര്‍ ബോര്‍ഡുമാണ് വായ്പ തന്നത്. അത് പലിശയടക്കം പൂര്‍ണമായി തിരിച്ചടച്ചു. 9 വര്‍ഷം കഴിഞ്ഞിട്ടും തനിക്കെതിരെ തട്ടിപ്പിന് തെളിവ് കണ്ടെത്താനായിട്ടില്ല. പണം തിരിമറി നടത്തിയതിനും തെളിവില്ലെന്ന് മല്യ പറഞ്ഞു.