രാജ്യത്തെ 8 നിയസഭാ സീറ്റുകളിലേക്ക് നടന്ന ഉപതിരഞ്ഞെടുപ്പില്‍ ശക്തി തെളിയിച്ച് കോണ്‍ഗ്രസ്. രാജസ്ഥാനില്‍ ബിജെപിയുടെയും തെലങ്കാനയില്‍ ബിആര്‍എസിന്റെയും സിറ്റിങ് സീറ്റുകളാണ് കോണ്‍ഗ്രസ് പിടിച്ചെടുത്തത്. ഒഡീഷയില്‍ ബിജെഡിയുടെ സിറ്റിങ് സീറ്റ് ബിജെപിയും പിടിച്ചെടുത്തു. 8 ഉപതിരഞ്ഞെടുപ്പുകളില്‍ കോണ്‍ഗ്രസ് -2, ബിജെപി -2, എഎപി – 1, പിഡിപി – 1, മിസോ നാഷനല്‍ ഫ്രണ്ട് –1, ജെഎംഎം – 1 എന്നിങ്ങനെയാണ് സീറ്റ് നില.

തെലങ്കാനയിലെ ജൂബിലിഹില്‍സിലേക്ക് നടന്ന ഉപതിരഞ്ഞെടുപ്പില്‍ കോണ്‍ഗ്രസിന്റെ നവീന്‍ യാദവിന് വിജയം. ബിആര്‍എസിന്റെ മാഗന്തിയെയാണ് നവീന്‍ 24,729 വോട്ടുകള്‍ക്ക് പരാജയപ്പെടുത്തിയത്. ബിജെപി ഇവിടെ മൂന്നാം സ്ഥാനത്താണ്. 58 സ്ഥാനാര്‍ഥികളാണ് ജൂബിലി ഹില്‍സില്‍ മത്സരരംഗത്തുണ്ടായിരുന്നത്. ബിആര്‍എസിന്റെ മാഗന്തി ഗോപിനാഥ് അന്തരിച്ചതിനെ തുടര്‍ന്നാണ് മണ്ഡലത്തില്‍ ഉപതിരഞ്ഞെടുപ്പ് നടന്നത്. വിജയത്തോടെ ബിആര്‍എസ് സിറ്റിങ് സീറ്റ് കോണ്‍ഗ്രസ് പിടിച്ചെടുത്തു. ബിആര്‍എസിന്റെ പരാജയം പാര്‍ട്ടി നേതൃത്വത്തിന്റെ അഹങ്കാരത്തിനേറ്റ കനത്ത തിരിച്ചടിയാണെന്ന് ബിആര്‍എസില്‍ നിന്ന് പുറത്താക്കപ്പെട്ട കവിതാ റാവു പ്രതികരിച്ചു.

രാജസ്ഥാനിലെ ആന്റയില്‍ നടന്ന ഉപതിരഞ്ഞെടുപ്പില്‍ കോണ്‍ഗ്രസിന്റെ പ്രമോദ് ജയിന്‍ വിജയിച്ചു. 15,612 വോട്ടുകള്‍ക്കാണ് പ്രമോദ് ബിജെപിയുടെ സ്ഥാനാര്‍ഥിയെ പരാജയപ്പെടുത്തിയത്. ബിജെപിയുടെ കന്‍വര്‍ലാല്‍ മീണ അന്തരിച്ചതിനെ തുടര്‍ന്നാണ് മണ്ഡലത്തില്‍ ഉപതിരഞ്ഞെടുപ്പ് നടന്നത്. വിജയത്തോടെ ബിജെപിയുടെ സിറ്റിങ് സീറ്റ് കോണ്‍ഗ്രസ് പിടിച്ചെടുത്തു.

ജമ്മു കശ്മീരിലെ ബദ്ഗാം നിയമസഭാ സീറ്റിലേക്ക് നടന്ന തിരഞ്ഞെടുപ്പില്‍ പിഡിപി സ്ഥാനാര്‍ഥി ആഗാ സയിദ് മെഹ്ദി ആണ് വിജയിച്ചത്. നാഷനല്‍ കോണ്‍ഫറന്‍സിന്റെ ആഗാ സയിദ് മഹ്മൂദിനെ 4,478 വോട്ടുകള്‍ക്കാണ് പിഡിപി സ്ഥാനാര്‍ഥി പരാജയപ്പെടുത്തിയത്. ഇവിടെ മത്സരിച്ച ബിജെപി സ്ഥാനാര്‍ഥി ആറാം സ്ഥാനത്താണ്. 2024ല്‍ നടന്ന നിയമസഭാ തിരഞ്ഞെടുപ്പില്‍ മത്സരിച്ച മുഖ്യമന്ത്രി ഒമര്‍ അബ്ദുള്ള രണ്ട് സീറ്റുകളില്‍ വിജയിച്ചതിനെ തുടര്‍ന്ന് ബദ്ഗാം ഒഴിയുകയായിരുന്നു. ഇതേതുടര്‍ന്നാണ് ഉപതിരഞ്ഞെടുപ്പ് വേണ്ടിവന്നത്.

ജമ്മു കശ്മീരിലെ നഗ്രോദയില്‍ നടന്ന ഉപതിരഞ്ഞെടുപ്പില്‍ ബിജെപി സീറ്റ് നിലനിര്‍ത്തി. ദേവയാനി റാണയാണ് ഇവിടെ വിജയിച്ചത്. 24,267 വോട്ടുകള്‍ക്കാണ് ബിജെപിയുടെ വിജയം. നാഷനല്‍ പാന്തേഴ്‌സ് പാര്‍ട്ടി ഇവിടെ രണ്ടാം സ്ഥാനത്തെത്തി. ബിജെപി എംഎല്‍എയായിരുന്ന ദേവേന്ദര്‍ സിങ് റാണ അന്തരിച്ചതിനെ തുടര്‍ന്നാണ് ഉപതിരഞ്ഞെടുപ്പ് നടന്നത്.

ഒഡീഷയിലെ നുവാപാഡയില്‍ നടന്ന ഉപതിരഞ്ഞെടുപ്പില്‍ ബിജെപിക്ക് ഉജ്ജ്വല വിജയം. 83,748 വോട്ടുകള്‍ക്കാണ് ബിജെപിയുടെ ജയ് ധൊലാകിയ കോണ്‍ഗ്രസിന്റെ ഘാസി റാമിനെ പരാജയപ്പെടുത്തിയത്. ബിജെഡി സ്ഥാനാര്‍ഥിയായിരുന്ന രാജേന്ദ്ര ധോലാകിയ അന്തരിച്ചതിനെ തുടര്‍ന്നാണ് മണ്ഡലത്തില്‍ ഉപതിരഞ്ഞെടുപ്പ് നടന്നത്. വിജയത്തോടെ മണ്ഡലം ബിജെഡിയില്‍ നിന്ന് ബിജെപി പിടിച്ചെടുത്തു. ബിജെഡി മണ്ഡലത്തില്‍ മൂന്നാം സ്ഥാനത്തേക്ക് തള്ളപ്പെട്ടു.

ജാര്‍ഖണ്ഡിലെ ഗട്‌സീല മണ്ഡലത്തിലേക്ക് നടന്ന ഉപതിരഞ്ഞെടുപ്പില്‍ ജാര്‍ഖണ്ഡ് മുക്തി മോര്‍ച്ചയുടെ സോമേഷ് ചന്ദ്ര സോറന്‍ വിജയം ഉറപ്പിച്ചു. ബിജെപിയുടെ ബാബുലാല്‍ സോറനാണ് ഇവിടെ രണ്ടാം സ്ഥാനത്ത്. മന്ത്രിയായിരുന്ന ജെഎംഎമ്മിന്റെ രാംദാസ് സോറന്‍ അന്തരിച്ചതിനെ തുടര്‍ന്നാണ് മണ്ഡലത്തില്‍ ഉപതിരഞ്ഞെടുപ്പ് നടന്നത്. വിജയത്തോടെ ജെഎംഎം മണ്ഡലം നിലനിര്‍ത്തി.

പഞ്ചാബിലെ തരന്‍ തരന്‍ മണ്ഡലത്തിലേക്ക് നടന്ന ഉപതിരഞ്ഞെടുപ്പില്‍ എഎപിയുെട ഹര്‍മീത് സിങ് സന്ധുവിന് വിജയം. ശിരോമണി അകാലിദളിന്റെ സുക്‌വീന്ദര്‍ കൗറിനെയാണ് 12,091 വോട്ടുകള്‍ക്ക് എഎപി സ്ഥാനാര്‍ഥി പരാജയപ്പെടുത്തിയത്. കോണ്‍ഗ്രസ് ഇവിടെ നാലാം സ്ഥാനത്തും ബിജെപി അഞ്ചാം സ്ഥാനത്തുമാണ്. എഎപി അംഗം അന്തരിച്ചതിനെ തുടര്‍ന്നാണ് മണ്ഡലത്തില്‍ ഉപതിരഞ്ഞെടുപ്പ് നടന്നത്. വിജയത്തോടെ എഎപി മണ്ഡലം നിലനിര്‍ത്തി.

മിസോറാമിലെ ദംബയില്‍ നടന്ന ഉപതിരഞ്ഞെടുപ്പില്‍ മിസോ നാഷനല്‍ ഫ്രണ്ടിന്റെ ലാല്‍തംഗ്ലീനയ്ക്ക് വിജയം. സോറം പീപ്പിള്‍സ് മൂവ്‌മെന്റെ സ്ഥാനാര്‍ഥിയെയാണ് ലാല്‍ 562 വോട്ടുകള്‍ക്ക് പരാജയപ്പെടുത്തിയത്. ലീഡ് നിലയില്‍ ഇവിടെ കോണ്‍ഗ്രസ് മൂന്നാം സ്ഥാനത്തും ബിജെപി നാലാം സ്ഥാനത്തുമാണ്. വിജയത്തോടെ മിസോ നാഷനല്‍ ഫ്രണ്ട് സീറ്റ് നിലനിര്‍ത്തി.