പാമ്പു കടിയേറ്റു മരിച്ച അന്‍പത്തിയാറുകാരന്റെ മരണം കൊലപാതകമെന്ന് പോലീസ്. ഇന്‍ഷുറന്‍സ് തുക തട്ടിയെടുക്കാനായി മക്കള്‍ പാമ്പിനെ കൊണ്ട് കടുപ്പിച്ചതാണെന്നാണ് കണ്ടെത്തിയിരിക്കുന്നത്. മക്കളായ മോഹന്‍രാജ്(26), ഹരിഹരന്‍(27) എന്നിവരെ പോലീസ് അറസ്റ്റ് ചെയ്തു. സംഭവത്തില്‍ രണ്ട് മക്കള്‍ക്ക് പുറമേ ഇവര്‍ക്ക് സഹായം നല്‍കിയ നാലുപേരെയും പോലീസ് അറസ്റ്റ്‌ചെയ്തിട്ടുണ്ട്. കേസില്‍ വിശദമായ അന്വേഷണം തുടരുകയാണെന്നും പോലീസ് പറഞ്ഞു.

തമിഴ്‌നാട്ടിലെ തിരുവള്ളൂരിലാണ് സംഭവം. തിരുവള്ളൂര്‍ പോത്താട്ടൂര്‍പേട്ടൈ സ്വദേശിയും ഗവ. സ്‌കൂളിലെ ലബോറട്ടറി അസിസ്റ്റന്റുമായി ഇ.പി. ഗണേശനാണ് ഇക്കഴിഞ്ഞ ഒക്ടോബറില്‍ പാമ്പ് കടിയേറ്റ് മരിച്ചത്. വീട്ടില്‍ വെച്ചു ഗണേശന് പാമ്പു കടിയേല്‍ക്കുകയായിരുന്നു എന്നായിരുന്നു വീട്ടുകാരുടെ മൊഴി. തുടര്‍ന്ന് പോലീസ് ഇത് അപകടമരണമായി കേസ് എടുക്കുകയായിരുന്നു.

എന്നാല്‍, ഗണേശന്റെ പേരിലുള്ള ഇന്‍ഷുറന്‍സ് പോളിസിയുടെ ക്ലെയിം നടപടികള്‍ ആരംഭിച്ചതിന് പിന്നാലെയാണ് മരണത്തില്‍ സംശയമുയര്‍ന്നത്. ഗണേശന്റെ പേരില്‍ ഉയര്‍ന്ന തുകയുടെ ഒട്ടേറെ പോളിസികള്‍ എടുത്തിരുന്നതും വീട്ടുകാരുടെ പെരുമാറ്റത്തിലെ അസ്വാഭാവികതയുമാണ് ഇന്‍ഷുറന്‍സ് കമ്പനി അധികൃതര്‍ക്ക് സംശയത്തിനിടയാക്കിയത്. ഇത് ഇന്‍ഷുറന്‍സ് കമ്പനികാര്‍ക്ക് മരണത്തില്‍ സംശയം ഉയരുകയും തുടര്‍ അന്വേഷിക്കണം എന്ന് തമിഴ്‌നാട് നോര്‍ത്ത് ഐജിക്ക് പരാതി നല്‍കുകയും ചെയ്തു.

തുടര്‍ന്ന് നടത്തിയ അന്വേഷണത്തിലാണ് കൊലപാതകം പുറത്തുവരുന്നത്. ഗണേശനെ കൊലപ്പെടുത്തുന്നതിന് മുമ്പ് അയാളുടെ പേരില്‍ മക്കളായ മോഹന്‍രാജും ഹരിഹരനും ഇന്‍ഷുറന്‍സ് പോളിസി എടുത്തു. ഇതിന് ശേഷം ആയിരുന്നു കൊലപാതക ശ്രമം ആരംഭിച്ചത്.
വിഷമുള്ള പാമ്പിനെ കൊണ്ട് കടിപ്പിച്ചു അപകടമരണമാക്കാനായിരുന്നു ഇവരുടെ പദ്ധതി. അതിനായി ആദ്യം ഇവര്‍ മൂര്‍ഖനെ ഉപയോഗിച്ച് ഗണേഷിന്റെ കാലില്‍ കടിപ്പിച്ചു. എന്നാല്‍ വിഷം ഉള്ളില്‍ ചെല്ലാത്തതിനാല്‍ ആശുപത്രിയില്‍ എത്തിച്ചു രക്ഷപെട്ടു. ഇതോടെയാണ് അടുത്ത പദ്ധതി ഇവര്‍ ആസൂത്രണം ചെയ്യുന്നത്.

ഇവരുടെ ചില സഹായികള്‍ വഴി ഉഗ്രവിഷമുള്ള വെള്ളിക്കെട്ടന്‍ പാമ്പിനെ ഇവര്‍ സംഘടിപ്പിച്ചു. തുടര്‍ന്ന് സംഭവദിവസം പുലര്‍ച്ചെ ഗണേഷന്‍ ഉറങ്ങുന്നതിനിടയില്‍ പാമ്പിനെക്കൊണ്ട് കഴുത്തില്‍ കടിപ്പിച്ചു. തുടര്‍ന്ന് മരിക്കുന്നത് വരെ നോക്കി ഇരുന്നതിന് ശേഷം ആണ് ആശുപത്രിയില്‍ എത്തിച്ചത്.