ഇന്ത്യന്‍ റെയില്‍വേയില്‍ ഏകദേശം 600 കോടി രൂപയുടെ അധിക വരുമാനം പ്രതീക്ഷിക്കുന്ന പുതിയ പരിഷ്‌കാരങ്ങള്‍ ഡിസംബര്‍ 26 മുതല്‍ പ്രാബല്യത്തില്‍ വരും. എന്നാല്‍ സാധാരണക്കാരായ യാത്രക്കാരെയും കുറഞ്ഞ വരുമാനക്കാരെയും ഇത് പ്രതികൂലമായി ബാധിക്കില്ലെന്നാണ് വിവരം.

പുതിയ ഉത്തരവ് പ്രകാരം ഓര്‍ഡിനറി ക്ലാസുകളില്‍ 215 കിലോമീറ്ററിന് മുകളിലുള്ള യാത്രകള്‍ക്ക് കിലോമീറ്ററിന് ഒരു പൈസ വീതം അധികം നല്‍കണം. മെയില്‍, എക്‌സ്പ്രസ് ട്രെയിനുകളുടെ നോണ്‍ എസി, എസി ക്ലാസുകളില്‍ കിലോമീറ്ററിന് രണ്ട് പൈസയാണ് വര്‍ദ്ധിപ്പിച്ചത്. 215 കിലോമീറ്ററില്‍ താഴെ യാത്ര ചെയ്യുന്നവര്‍ക്ക് നിരക്ക് വര്‍ദ്ധന ബാധകമല്ല. അതായത് നോണ്‍ എസി കോച്ചില്‍ 500 കിലോമീറ്റര്‍ ദൂരം യാത്ര ചെയ്യുന്ന ഒരാള്‍ക്ക് 10 രൂപ മാത്രമാണ് അധികമായി ചെലവാകുക.

റെയില്‍വേയുടെ ചെലവിലുണ്ടായ വര്‍ദ്ധനവാണ് നിരക്ക് പരിഷ്‌കാരണത്തിന് പ്രധാന കാരണമായത്. നിലവില്‍ ജീവനക്കാരുടെ ശമ്പളഇനത്തില്‍ മാത്രം 1,15,000 കോടി രൂപ റെയില്‍വേയ്ക്ക് വേണം. പെന്‍ഷന് 60,000 കോടി രൂപയാണ് ചെലവ്. 2024 25 സാമ്പത്തിക വര്‍ഷത്തില്‍ റെയില്‍വേയുടെ ആകെ പ്രവര്‍ത്തന ചെലവ് 2,63,000 കോടി രൂപയായി വര്‍ദ്ധിച്ചു. ഈ അധിക ബാദ്ധ്യത മറികടക്കുന്നതിനായി ചരക്ക് നീക്കം വര്‍ദ്ധിപ്പിക്കുന്നതിനൊപ്പം യാത്രാനിരക്കകളില്‍ ചെറിയതോതിലുള്ള മാറ്റങ്ങള്‍ വരുത്തിയതെന്ന് അധികൃതര്‍ അറിയിച്ചു.