ബംഗളൂരു യെലഹങ്കയില് മുസ്ലിം ഭൂരിപക്ഷ മേഖലയില് മുന്നൂറോളം വീടുകള് തകര്ത്തു; സംഭവത്തില് വിമര്ശനം ഉന്നയിച്ചതിന് കര്ണാടകയുടെ ആഭ്യന്തര കാര്യങ്ങളില് കേരള മുഖ്യമന്ത്രി ഇടപെടരുതെന്ന് ഡികെ ശിവകുമാര്
കര്ണാടകയിലെ കുടിയൊഴിപ്പിക്കല് നടപടിക്കെതിരെ വിമര്ശനം ഉന്നയിച്ച മുഖ്യമന്ത്രി പിണറായി വിജയനെതിരെ കര്ണാടക ഉപമുഖ്യമന്ത്രി ഡികെ ശിവകുമാര്. കര്ണാടകയുടെ ആഭ്യന്തര കാര്യങ്ങളില് ഇടപെടരുതെന്ന് ഡികെ ശിവകുമാര് മുന്നറിയിപ്പ് നല്കി. കഴിഞ്ഞ ദിവസം പുലര്ച്ചെയാണ് ബംഗളൂരു യെലഹങ്കയില് മുസ്ലിം ഭൂരിപക്ഷ മേഖലയില് മുന്നൂറോളം വീടുകള് തകര്ത്തത്. പിന്നാലെ 3000ത്തോളം പേര് തെരുവിലായി. യു.പിയിലുള്പ്പെടെ ബി.ജെ.പിയുടെ ബുള്ഡോസര് രാജിനെ വിമര്ശിക്കുന്ന കോണ്ഗ്രസ്, യെലഹങ്കയില് ബുള്ഡോസര് രംഗത്തിറക്കിയതിന്റെ പേരില് രൂക്ഷമായ വിമര്ശനമാണ് നേരിടുന്നത്.
കര്ണാടകയുടെ തലസ്ഥാന നഗരിയില് മുസ്ലിം ജനത വര്ഷങ്ങളായി താമസിച്ചുവരുന്ന ഫക്കീര് കോളനിയും വസീം ലേഔട്ടും ബുള്ഡോസര് വെച്ചു തകര്ത്ത നടപടി അങ്ങേയറ്റം ഞെട്ടലും വേദനയുമുളവാക്കുന്നതാണെന്നാണ് പിണറായി വിജയന് സോഷ്യല് മീഡിയയില് കുറിച്ചത്. ഉത്തരേന്ത്യയില് സംഘപരിവാര് നടപ്പാക്കുന്ന ന്യൂനപക്ഷ വിരുദ്ധ ആക്രമോത്സുക രാഷ്ട്രീയത്തിന്റെ മറ്റൊരു പതിപ്പാണ് കര്ണാടകയില് കണ്ടത്. കൊടുംതണുപ്പില് ഒരു ജനതയാകെ തെരുവിലിറക്കപ്പെട്ട് പലായനം ചെയ്യാന് നിര്ബന്ധിതരായിരിക്കുകയാണെന്നും പിണറായി കുറിച്ചു.
എന്നാല് പിണറായി വിജയന്റേത് രാഷ്ട്രീയ പ്രേരിതമായ പ്രസ്താവനയാണെന്നും കര്ണാടകയുടെ ആഭ്യന്തര കാര്യങ്ങളില് അദ്ദേഹം ഇടപെടേണ്ടതില്ലെന്നും ഡികെ. ശിവകുമാര് പറഞ്ഞു. ബംഗളൂരുവിലെ വസ്തുതകള് മനസിലാക്കാതെയാണ് മുതിര്ന്ന നേതാവായ പിണറായി വിജയന് പ്രതികരിക്കുന്നതെന്ന് അദ്ദേഹം പറഞ്ഞു. ഖരമാലിന്യങ്ങള് നിക്ഷേപിക്കേണ്ട അപകടകരമായ ഒരു ക്വാറിയിലാണ് നിയമവിരുദ്ധമായി താമസിച്ചിരുന്നതെന്നും ഈ സ്ഥലം സംരക്ഷിക്കേണ്ടത് സര്ക്കാരിന്റെ ഉത്തരവാദിത്വമാണെന്നും ശിവകുമാര് വിശദീകരിച്ചു.
അതേസമയം, സംഭവത്തില് കോണ്ഗ്രസ് നേതൃത്വം ഇടപെട്ടിട്ടുണ്ട്. കര്ണാടക സര്ക്കാരില് നിന്ന് എഐസിസി വിശദീകരണം തേടി. എഐസിസി ജനറല് സെക്രട്ടറി കെസി വേണുഗോപാലാണ് കര്ണാടക കോണ്ഗ്രസ് അദ്ധ്യക്ഷന് ഡി.കെ. ശിവകുമാറില് നിന്ന് വിശദീകരണം തേടിയത്. കൈയേറ്റ സ്ഥലമാണ് ഒഴിപ്പിച്ചതെന്നും നടപടികള് പാലിച്ചാണ് ഇത് നടത്തിയതെന്നുമാണ് ശിവകുമാറിന്റെ വിശദീകരണം. അതിനിടെ വിവാദം ശക്തമായതോടെ കുടിയൊഴിപ്പിച്ചവര്ക്ക് വീടുകള് നിര്മ്മിച്ച് നല്കുമെന്നും സര്ക്കാര് പ്രഖ്യാപിച്ചു. 200 ഫ്ളാറ്റുകളടങ്ങിയ സമുച്ചയം നിര്മ്മിച്ച് നല്കാനാണ് ആലോചന.
https://www.facebook.com/Malayalivartha
