സുനന്ദ പുഷ്‌കറിന്റെ മരണത്തിലെ ദുരൂഹതകള്‍ നീക്കണമെന്ന് ആവശ്യപ്പെട്ട് കേന്ദ്ര ആഭ്യന്തരമന്ത്രി സുശീല്‍കുമാര്‍ ഷിന്‍ഡെയ്ക്ക് തരൂര്‍ കത്തയച്ചു. അന്വേഷണത്തെ ബാധിക്കാതെ മാധ്യമങ്ങള്‍ക്ക് വിവരങ്ങള്‍ നല്‍കണമെന്നും കത്തില്‍ തരൂര്‍ ആവശ്യപ്പെട്ടു. ജനുവരി 17ന് ഡല്‍ഹിയിലെ ലീലാപാലസ് ഹോട്ടലില്‍ മരിച്ച നിലയില്‍ കാണപ്പെട്ട സുനന്ദ പുഷ്‌കറിന്റെ മരണകാരണം സംബന്ധിച്ച അവ്യക്തതകള്‍ തുടരുന്ന സാഹചര്യത്തിലാണ് ഇത് സംബന്ധിച്ച വിശദമായ അന്വേഷണം നടത്തണമെന്ന് ആവശ്യപ്പെട്ട് സുനന്ദയുടെ ഭര്‍ത്താവും കേന്ദ്രമന്ത്രിയുമായ ശശി തരൂര്‍ ആഭ്യന്തരമന്ത്രിക്ക് കത്തയച്ചിരിക്കുന്നത്. മരണം സംബന്ധിച്ച് തനിക്കെതിരായ ആരോപണങ്ങള്‍ ശരിയല്ലെന്നും ഹോട്ടലിലെയും വിമാനത്താവളത്തിലെയും സിസിടിവി ദൃശ്യങ്ങള്‍ അന്വേഷണത്തെ ബാധിക്കാത്ത വിധത്തില്‍ മാധ്യമങ്ങള്‍ക്ക് നല്‍കണമെന്നും കത്തില്‍ പറയുന്നു.

സുനന്ദയുടേത് പൊടുന്നനേയുള്ള അസ്വാഭാവിക മരണമാണെന്നാണ് പോസ്റ്റുമോര്‍ട്ടത്തിനു ശേഷം ഡോക്ടര്‍മാര്‍ അഭിപ്രായപ്പെട്ടത്. എന്നാല്‍ മരണം എങ്ങനെയാണ് സംഭവിച്ചതെന്നോ എപ്പോഴാണ് സംഭവിച്ചതെന്നോ ഡോക്ടര്‍മാര്‍ വ്യക്തമാക്കിയിരുന്നില്ല. ഇതേ തുടര്‍ന്ന് ശശി തരൂരിനെ സംശയിക്കുന്ന രീതിയില്‍ ചില ആരോപണങ്ങള്‍ പുറത്ത് വന്നിരുന്നു.

ശശി തരൂരും സുനന്ദയും തമ്മില്‍ നിരന്തരം വഴക്ക് ഉണ്ടാകാറുണ്ടായിരുന്നതായി തരൂരിന്റെ സഹായി പറഞ്ഞതായുള്ള വാര്‍ത്തകള്‍ പുറത്ത് വന്നിരുന്നു. മാത്രമല്ല തിരുവനന്തപുരത്ത് നിന്നും ഡല്‍ഹിയിലേക്കുള്ള യാത്രയിലുടനീളം ഇരുവരും തമ്മില്‍ കലഹിച്ചിരുന്നതായും റിപ്പോര്‍ട്ടുകളുണ്ടായിരുന്നു. ഈ സാഹചര്യത്തിലാണ് വിമാനത്താവളത്തിലേതുള്‍പ്പടെയുള്ള സിസിടിവി ദൃശ്യങ്ങള്‍ മാധ്യമങ്ങള്‍ക്ക് നല്‍കണമെന്ന് ആഭ്യന്തരമന്ത്രിയോട് തരൂര്‍ ആവശ്യപ്പെട്ടിരിക്കുന്നത്.

അതിനിടെ സുനന്ദ പുഷ്‌കറിന്റെ മരണവുമായി ബന്ധപ്പെട്ട് കേന്ദ്രമന്ത്രി ശശി തരൂരിന്റെ മൊഴിയെടുത്തു. ഡല്‍ഹി സബ് ഡിവിഷണല്‍ മജിസ്‌ട്രേറ്റിന് മുമ്പാകെയാണ് ശശി തരൂര്‍ മൊഴി നല്‍കിയത്. 

സുനന്ദയുടെയും തരൂരിന്റെയും കുടുംബബന്ധത്തില്‍ പാക് മാധ്യമപ്രവര്‍ത്തകയായ മെഹര്‍ തരാരിനെ ചൊല്ലി ദീര്‍ഘനാളുകളായി അസ്വാരസ്യം ഉണ്ടായിരുന്നതായാണ് ബന്ധപ്പെട്ട വൃത്തങ്ങള്‍ സൂചിപ്പിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha