വായു മലിനീകരണം രൂക്ഷം: ഡല്ഹിയില് സ്കൂളുകള്ക്ക് മൂന്ന്ദിവസം കൂടി അവധി; വാഹനങ്ങള്ക്ക് കര്ശന നിയന്ത്രണം
വായു മലനീകരണം മൂലം മൂന്നു ദിവസത്തേക്കു കൂടി സ്കൂളുകള്ക്ക് അവധി നല്കുമെന്ന് ഡല്ഹി മുഖ്യമന്ത്രി അരവിന്ദ്കെജ്രിവാള്. വാഹനങ്ങള്ക്ക് നിയന്ത്രണം ഏര്പ്പെടുത്തും. നിര്മാണ മേഖലയുമായി ബന്ധപ്പെട്ട പ്രവര്ത്തനങ്ങള് അഞ്ചു ദിവസത്തേക്ക് നിരോധിക്കുമെന്നും അദ്ദേഹം അറിയിച്ചു. വായു മലിനീകരണത്തിനെതിരെ നടപടി കൈക്കൊള്ളാനായി ചേര്ന്ന അടിയന്തര മന്ത്രിസഭാ യോഗത്തിനുശേഷം സംസാരിക്കുകയായിരുന്നു മുഖ്യമന്ത്രി.
റോഡുകളില് വെള്ളം തളിക്കുകയും മാലിന്യങ്ങള് കത്തിക്കുന്നതിനെതിരെ കര്ശന നടപടി സ്വീകരിക്കുകയും ചെയ്യും.
പത്തു ദിവസത്തേക്ക് ബദാര്പൂര് താപനിലയം അടച്ചിടാനും ഡീസല് ജനറേറ്ററുകള് നിരോധിക്കാനും തീരുമാനിച്ചു.
രാവിലെ എട്ടുമണിക്കും 200 മീറ്ററില് കൂടുതല് കാഴ്ച ലഭിക്കാത്തവിധം പുക മൂടിയ അന്തരീക്ഷമായിരുന്നു ഡല്ഹിയില്. ഹൃദയത്തിനും ശ്വാസകോശത്തിനും അപകടമുണ്ടാക്കുന്ന പൊടിപടലങ്ങള് ഒരു ക്യുബിക് മീറ്ററില് 700 മൈക്രോ ഗ്രാം എന്ന നിലയിലാണുള്ളത്. ലോകാരോഗ്യ സംഘടന നിര്ദേശിക്കുന്ന പരിധിയേക്കാള് 70 മടങ്ങ് കൂടുതലാണ് ഇത്.
എന്നാല് വാഹനങ്ങള് നിയന്ത്രിച്ചതു കൊണ്ട് മാത്രം മലിനീകരണം തടയാനാവില്ല. ഇതിനായി മറ്റു സംസ്ഥാനങ്ങള്കൂടി സഹകരിക്കണമെന്നും അദ്ദേഹം പറഞ്ഞു. വായു മലിനീകരണത്തിനെതിരെ സര്ക്കാര് ഉടന് നടപടി കൈക്കൊള്ളണമെന്നാവശ്യപ്പെട്ട് നൂറുകണക്കിനാളുകള് ജന്തര് മന്ദിറില് പ്രതിഷേധിച്ചിരുന്നു.
https://www.facebook.com/Malayalivartha
